அரசியல்வாதிகள், நீதிபதிகளுக்கு அரசு நிலம் ஒதுக்குவதை தடைசெய்ய சட்டம்: உச்சநீதிமன்றத்தில் அட்டாா்னி ஜெனரல் வலியுறுத்தல்

‘நகா்புறங்களில் அரசியல்வாதிகள் மற்றும் நீதிபதிகளுக்கு விருப்புரிமை அடிப்படையில் அரசு நிலம் அல்லது குடியிருப்பு ஒதுக்கீடு செய்யப்படுவதை தடுக்க சட்டம் இயற்றப்பட வேண்டும்’ என்று உச்சநீதிமன்றத்தில் அட்டாா்னி ஜெனரல் கே.கே.வேணுகோபால் புதன்கிழமை வலியுறுத்தினாா்.

மேலும், ‘நகா்ப்புற பகுதிகளில் பிறந்த அல்லது குடியிருக்கும் இந்திய குடிமகன் மட்டுமே, அரசின் விருப்புரிமை ஒதுக்கீடு அதிகாரத்தின் கீழ் நிலம் பெறும் தகுதியுடையவராக வேண்டும்’ என்றும் அவா் கூறினாா்.

பெருநகர ஹைதராபாத் மாநகராட்சி எல்லைக்கு உள்பட்ட அரசு நிலங்களை எம்எல்ஏ, எம்.பி., ஐஏஎஸ் அதிகாரிகளை உள்ளடக்கிய குடியிருப்பு சங்கங்களுக்கு சொத்துரிமை மாற்றம் செய்யப்பட்டதை எதிா்த்து ஹைதராபாத் உயா்நீதிமன்றத்தில் கடந்த 2008-ஆம் ஆண்டு வழக்கு தொடரப்பட்டது. இந்த வழக்கை விசாரித்த உயா்நீதிமன்றம், பல்வேறு குடியிருப்பு சங்கங்களுக்கு அரசு நிலத்தை உரிம மாற்றம் செய்து முந்தைய ஒருங்கிணைந்த ஆந்திர அரசு பிறப்பித்த அரசாணைகளை தள்ளுபடி செய்து உத்தரவிட்டது.

இந்த உத்தரவை எதிா்த்து ஆந்திர அரசு (தற்போதைய தெலங்கானாஅரசு) சாா்பில் உச்சநீதிமன்றத்தில் மேல்முறையீடு செய்யப்பட்டது.

இந்த மேல்முறையீட்டு மனுவை கடந்த 8-ஆம் தேதி விசாரித்த உச்சநீதிமன்ற தலைமை நீதிபதி என்.வி.ரமணா, நீதிபதிகள் ஏ.எஸ்.போபண்ணா, ஹிமா கோலி ஆகியோா் அடங்கிய அமா்வு, ‘அரசு நிலம் ஒதுக்கீட்டை முறைப்படுத்த உரிய வழிக்காட்டுதலை சமா்ப்பிக்க வேண்டும்’ என அட்டாா்னி ஜெனரல் வேணுகோபாலுக்கு உத்தரவிட்டது.

அதனடிப்படையில், அரசு நிலம் ஒதுக்கீடு வழிகாட்டுதல் தொடா்பான விவரங்களை வேணுகோபால் உச்சநீதிமன்ற அமா்வு முன்பாக புதன்கிழமை சமா்ப்பித்தாா். அப்போது அவா் கூறியதாவது:

நகா்புறங்களில் அரசியல்வாதிகள் மற்றும் உச்சநீதிமன்ற, உயா்நீதிமன்ற நீதிபதிகளுக்கு விருப்புரிமை அடிப்படையில் அரசு நிலம் அல்லது குடியிருப்பு ஒதுக்கீடு செய்யப்படுவதை தடுக்க சட்டம் இயற்றப்பட வேண்டும்.

அந்தச் சட்டத்தில், அரசு அறிவிக்கையின் அடிப்படையில் பயனாளிகளைச் இணைக்க இடமளிக்காத வகையில், நில ஒதுக்கீடுக்கு உரிய நபா்களின் தகுதிகள் மற்றும் தகுதியான நபா்களின் வகைப்பாடுகள் உள்ளிட்ட விவரங்கள் தெளிவாகவும் முழுமையாகவும் குறிப்பிடப்பட வேண்டும்.

இருந்தபோதும், அரசின் விருப்புரிமை நில ஒதுக்கீடு கொள்கையை, ஏழைகள் மற்றும் தேவையுள்ள மக்களுக்கு மட்டும் தொடர அனுமதிக்க வேண்டும். மற்ற அனைத்துப் பிரிவினருக்கும், சந்தை விலையின் அடிப்படையில் அரசு நிலத்துக்கான விலை நிா்ணயிக்கப்படுவதோடு, அந்த நிலத்தில் குடியிருப்பு கட்டுமானத்துக்கான செலவீன தொகையும் அரசால் தீா்மானிக்கப்பட வேண்டும்.

மேலும், அரசு நிலம் ஒதுக்கீடு என்பது மாநில சட்டப்பேரவையில் இயற்றப்பட்ட சட்ட விதிமுறைகளின் படி மட்டுமே மேற்கொள்ளப்பட வேண்டுமே தவிர, அரசின் கொள்கைகள் அல்லது வழிகாட்டுதல்களால் மேற்கொள்ளப்படக் கூடாது என்று வேணுகோபால் கூறினாா்.