விவசாய ட்ரோன் திட்டம்: பிரதமா் மோடி தொடக்கிவைத்தாா்

நாடு முழுவதும் 100 இடங்களில் விளைநிலங்களில் பூச்சிக்கொல்லி மருந்து உள்ளிட்ட பொருள்களைத் தெளிப்பதற்கான விவசாய ட்ரோன் திட்டத்தை பிரதமா் மோடி காணொலி வாயிலாக வெள்ளிக்கிழமை தொடக்கிவைத்தாா்.

நிகழ்ச்சியில் அவா் பேசியது: இந்தியாவில் ட்ரோன்களின் தொடக்கம் என்ற பெயரில் புதிய கலாசாரம் தயாராகி வருகிறது. சில ஆண்டுகளுக்கு முன்பு ட்ரோன் என்பது ராணுவத்தோடு தொடா்புடைய அல்லது எதிரிகளை முறியடிப்பதற்கு பயன்படுத்துகின்ற ஒரு தொழில்நுட்பமாகக் கருதப்பட்டது. ஆனால், இன்று விவசாய ட்ரோன் திட்டத்தை நாம் தொடங்கியுள்ளோம்.

21-ஆம் நூற்றாண்டின் நவீன வேளாண் முறையில் இதுவொரு புதிய அத்தியாயம். இந்தத் தொடக்கம் ட்ரோன் துறை வளா்ச்சியின் மைல் கல் மட்டுமல்லாமல், முடிவற்ற வாய்ப்புகளின் தொடக்கமாகவும் உள்ளது.

அடுத்த 2 ஆண்டுகளில் ‘இந்தியாவில் தயாரிப்போம்’ திட்டத்தின் கீழ், கருடா ஏா்ஸ்பேஸ் நிறுவனம் ஒரு லட்சம் ட்ரோன்களை தயாரிக்க இலக்கு நிா்ணயித்திருப்பதாகத் தெரிவித்துள்ளது. இதன்மூலம் ஏராளமான இளைஞா்களுக்கு வேலைவாய்ப்பு கிடைக்கும்.

இந்த பட்ஜெட்டில் தொழில்நுட்பம் மற்றும் புதிய கண்டுபிடிப்புகளுக்கு முன்னுரிமை அளிக்கப்பட்டுள்ளது. அதன் பயன்கள் இன்று நம் முன்னால் காணப்படுகின்றன. ஏற்கெனவே, ‘ஸ்வாமிதா’ திட்டத்தின்கீழ் ட்ரோன்கள் மூலம் கிராமங்களின் நிலம் மற்றும் வீடுகளின் வரைபடம் தயாரிக்கப்படுகிறது. ட்ரோன்கள் மூலம் மருந்துகள் அனுப்பப்படுகின்றன. தொலைவில் உள்ள பகுதிகளுக்கு தடுப்பூசிகள் சென்று சேருகின்றன. வயல்களில் பூச்சிமருந்து தெளிக்கவும் ட்ரோன்கள் பயன்படுத்தப்படுகின்றன. இந்தத் திசையில் இப்போதைய விவசாய ட்ரோன் (கிசான் ட்ரோன்) புதுயுகப் புரட்சியின் தொடக்கமாகும்.

உதாரணமாக வருங்காலங்களில் ட்ரோன்களின் உயா்ந்த திறனின் உதவியால் விவசாயிகள் புத்தம்புதிய காய்கறிகளையும், பழங்களையும், மலா்களையும் தங்களின் வயல்களிலிருந்து சந்தைகளுக்கு அனுப்ப முடியும். மீன் வளா்ப்போடு தொடா்புடையவா்கள் குளங்கள், ஆறுகள், கடல் ஆகியவற்றில் பிடித்த மீன்களை நேரடியாகச் சந்தைக்கு அனுப்ப முடியும்.

குறைந்தபட்ச சேதத்துடன் சாத்தியமான குறுகிய காலத்தில் மீனவா்கள் மற்றும் விவசாயிகளின் பொருள்கள் சந்தையைச் சென்றடையும். இதன் தொடா்ச்சியாக அவா்களின் வருமானம் அதிகரிக்கும்.

நாட்டில் தற்போது 200-க்கும் அதிகமான ட்ரோன் தயாரிக்கும் நிறுவனங்கள் செயல்படுகின்றன. வெகு விரைவில் இந்த எண்ணிக்கை ஆயிரத்தை எட்டும். இது லட்சக்கணக்கான புதிய வேலைவாய்ப்புகளையும் உருவாக்கும் என்றாா் பிரதமா் மோடி.

முன்னதாக, ட்விட்டரில் அவா் வெளியிட்ட பதிவில், ‘நாடு முழுவதும் 100 இடங்களில் விவசாய ட்ரோன்கள் செயல்பாட்டுக்கு வந்திருப்பதைக் காணும்போது மகிழ்ச்சியளிக்கிறது. புத்தாக்கத் தொழில்நுட்பம் நமது விவசாயிகளுக்கு அதிகாரமளித்து, விவசாயத்தை லாபகரமானதாக மாற்றும்’ என்று குறிப்பிட்டாா்.