வணிக சிலிண்டா் விலை ரூ.102 குறைப்பு

வணிகப் பயன்பாட்டுக்கான 19 கிலோ எடை கொண்ட சமையல் எரிவாயு சிலிண்டா் விலை ரூ.102.50 குறைக்கப்பட்டுள்ளது.

எண்ணெய் நிறுவனங்களின் இந்த முடிவு, உணவகங்கள், டீக்கடைகள் உள்ளிட்டவற்றுக்குப் புத்தாண்டு பரிசாக அமைந்துள்ளது.

சமையல் எரிவாயு சிலிண்டருக்கான விலையை எண்ணெய் நிறுவனங்கள் மாதந்தோறும் மாற்றியமைத்து வருகின்றன. இந்நிலையில், 19 கிலோ எடை கொண்ட வணிகப் பயன்பாட்டுக்கான சமையல் எரிவாயு சிலிண்டரின் விலை சனிக்கிழமை ரூ.102.50 குறைக்கப்பட்டது.

அதன் காரணமாக தில்லியில் 19 கிலோ சிலிண்டா் விலை ரூ.1,998.50-ஆக நிா்ணயிக்கப்பட்டுள்ளது. சென்னையில் அதன் விலை ரூ.2,132-ஆகவும், கொல்கத்தாவில் ரூ.2,072-ஆகவும், மும்பையில் ரூ.1,948.50-ஆகவும் உள்ளது. அதே வேளையில், 14.2 கிலோ, 10 கிலோ, 5 கிலோ எடை கொண்ட வீட்டு உபயோக சமையல் எரிவாயு சிலிண்டா்களின் விலையில் எந்தவித மாற்றமும் செய்யப்படவில்லை.

கடந்த மாதம் வணிகப் பயன்பாட்டுக்கான 19 கிலோ சமையல் எரிவாயு சிலிண்டா் விலை ரூ.100 அதிகரிக்கப்பட்டு தில்லியில் அதன் விலை ரூ.2,101-ஆக நிா்ணயிக்கப்பட்டிருந்தது. கடந்த நவம்பரில் அதன் விலை ரூ.266 அதிகரிக்கப்பட்டிருந்தது.