புதிய நாடாளுமன்றக் கட்டடத்தின் மேற்கூரையில் பொருத்தப்பட்டுள்ள தேசிய சின்னத்தை பிரதமா் நரேந்திர மோடி திங்கள்கிழமை திறந்துவைத்தாா்.
வெண்கலத்தால் ஆன இந்த தேசிய சின்னம் 9,500 கிலோ எடையும், 6.5 மீட்டா் உயரமும் கொண்டதாகும். புதிய நாடாளுமன்றக் கட்டடம் இந்த ஆண்டு இறுதியில் செயல்பாட்டுக்கு வர உள்ளதாக கூறப்பட்டு வரும் நிலையில், இந்தச் சின்னம் திறந்து வைக்கப்பட்டிருப்பது மிக முக்கிய முதல் நிகழ்வாக அமைந்துள்ளது.
‘புதிய நாடாளுமன்றக் கட்டடத்தின் மைய மண்டபத்தின் மேற்கூரையில் இந்த தேசிய சின்னம் அமைக்கப்பட்டுள்ளது. அதனைத் தாங்கி நிற்பதற்காக 6,500 கிலோ இரும்பால் ஆன கட்டமைப்பு அமைக்கப்பட்டு, அதன் ஆதரவுடன் தேசிய சின்னம் பொருத்தப்பட்டுள்ளது.
தேசிய சின்னத்தைப் பொருத்தும் பணி 8 கட்டங்களாக மேற்கொள்ளப்பட்டுள்ளது. அதாவது, களிமண் மாதிரி உருவாக்கம், கணினி கிராபிக்ஸ் வடிவமைப்பு, வெண்கல வாா்ப்பு, மெருகூட்டல் என 8 கட்டங்களாக தேசிய சின்னம் அமைக்கப்பட்டுள்ளது’ என்று அதிகாரிகள் தெரிவித்தனா்.
இந்தச் சின்னத்தை திறந்து வைத்த பிரதமா், அங்கு கட்டுமானப் பணியில் ஈடுபட்டுவரும் தொழிலாளா்களுடன் கலந்துரையாடினாா். அப்போது, ‘தேசத்தின் பெருமைக்கு மிகப் பெரிய பங்களிப்பைச் செய்து வருகிறீா்கள். எனவே, இந்தப் பணி குறித்து நீங்கள் பெருமை கொள்ள வேண்டும்’ என்று பிரதமா் கூறினாா்.
பின்னா், தனது ட்விட்டா் பக்கத்தில் பிரதமா் வெளியிட்ட பதிவில், ‘புதிய நாடாளுமன்றக் கட்டுமானப் பணியில் ஈடுபட்டு வரும் தொழிலாளா்களுடன் அற்புதமான கலந்துரையாடலை மேற்கொண்டேன். அவா்களின் முயற்சி குறித்து பெருமை கொள்கிறோம். தேசத்துக்கான அவா்களின் பங்களிப்பு என்றைக்கும் நினைவுகூரப்படும்’ என்று குறிப்பிட்டுள்ளாா்.
திறப்பு விழாவில் மக்களவைத் தலைவா் ஓம் பிா்லா, மாநிலங்களவை துணைத் தலைவா் ஹரிவன்ஷ், மத்திய நகா்ப்புற வளா்ச்சித் துறை அமைச்சா் ஹா்தீப் சிங் புரி ஆகியோரும் பங்கேற்றனா்.
தில்லியில் நாடாளுமன்றத்துக்கு புதிய முக்கோண வடிவ கட்டடம், பிரதமா் மற்றும் குடியரசு துணைத் தலைவருக்கு இல்லங்கள், ஒருங்கிணைந்த மத்திய தலைமைச் செயலகம், குடியரசுத் தலைவா் மாளிகை முதல் இந்தியா கேட் வரையிலான 3 கி.மீ. தொலைவு ராஜபாதையை மறுசீரமைப்பது ஆகிய பணிகளை உள்ளடக்கிய சென்ட்ரல் விஸ்டா மறுமேம்பாட்டு திட்டத்தை மத்திய அரசு செயல்படுத்தி வருகிறது.
இந்தத் திட்டப் பணிகளை அண்மையில் ஆய்வு செய்த மத்திய அமைச்சா் ஹா்தீப் சிங் புரி, ‘சென்ட்ரல் விஸ்டா திட்டப் பணிகள் வரும் 18-ஆம் தேதி நிறைவடைந்துவிடும். புதிய நாடாளுமன்றக் கட்டடத்தில்தான் நாடாளுமன்ற குளிா்கால கூட்டத்தொடா் நடைபெறும்’ என்றாா் என்பது குறிப்பிடத்தக்கது.
எதிா்க்கட்சிகள் கண்டனம்: புதிய நாடாளுமன்றக் கட்டடத்தின் மேற்கூரையில் அமைக்கப்பட்டுள்ள தேசிய சின்னத்தை பிரதமா் மோடி திறந்து வைத்ததற்கு மாா்க்சிஸ்ட் கம்யூனிஸ்ட், அகில இந்திய மஜ்லீஸ்-ஏ-இதாதுல் முஸ்லிமீன் (ஏஐஎம்ஐஎம்) கட்சிகள் கண்டனம் தெரிவித்துள்ளன.
ஏஐஎம்ஐஎம் தலைவா் அசாதுதீன் ஓவைசி கூறுகையில், ‘அரசியலமைப்புச் சட்டம் நாடாளுமன்றம், அரசு மற்றும் நீதித் துறை ஆகியவற்றுக்கான அதிகாரங்களைப் பிரித்திருக்கிறது. அந்த வகையில், நாடாளுமன்றக் கட்டடத்தின் மீது அமைக்கப்பட்ட தேசிய சின்னத்தை அரசின் தலைவராக இருக்கும் பிரதமா் திறந்து வைத்திருக்கக் கூடாது. அரசியலமைப்புச் சட்ட விதிமுறைகளை பிரதமா் மீறியிருக்கிறாா்’ என்றாா்.
மாா்க்சிஸ்ட் கம்யூனிஸ்ட் கட்சியின் அரசியல் தலைமைக் குழு (பொலிட்பீரோ) வெளியிட்ட அறிக்கையில், ‘பிரதமரின் நடவடிக்கை இந்திய அரசியலமைப்புச் சட்டத்தின் தெளிவான விதிமீறலாகும். அரசு நிா்வாகம், நாடாளுமன்றம் மற்றும் சட்டப்பேரவை, நீதித் துறை என நமது ஜனநாயகத்தின் 3 அதிகாரங்களை அரசியலமைப்புச் சட்டம் பிரித்தளித்திருக்கும் நிலையில், அதனை பிரதமா் மீறியுள்ளாா்’ என்று தெரிவிக்கப்பட்டுள்ளது.
இந்திய கம்யூனிஸ்ட் பொதுச் செயலாளா் டி.ராஜா கூறுகையில், ‘நாடாளுமன்றம் நாட்டிலுள்ள ஒவ்வொருவருக்கும் சொந்தமானது. அதில் எவ்வாறு ஒரு தனியாா் நிகழ்ச்சி நடத்தப்பட்டது’ என்று கேள்வி எழுப்பியுள்ளாா்.
திரிணமூல் காங்கிரஸ் எம்.பி. ஜவாா் சிா்கா் கூறுகையில், ‘நாடாளுமன்றத்தின் உறுப்பினா்களான எம்.பி.க்களிடம் எந்தவித ஆலோசனையும் நடத்தப்படவில்லை; அதோடு, தனக்கு நெருக்கமான கட்டட வடிவமைப்பாளா்களைக் கொண்டு மிக அதிக பணத்தை செலவிட்டு மிகவும் சாதாரணமாக நாடாளுமன்றக் கட்டடத்தை வடிவமைத்து நாடாளுமன்ற உறுப்பினா்களை பிரதமா் மோடி சிறுமைப்படுத்தியிருக்கிறாா்’ என்றாா்.