எதிா்க்கட்சிகள் மீண்டும் அமளி: நாடாளுமன்ற நடவடிக்கைகள் பாதிப்பு

நாடாளுமன்ற மழைக்கால கூட்டத்தொடரின்போது, அத்தியாவசியப் பொருள்களின் விலையேற்றம், சில பொருள்கள் மீது சரக்கு-சேவை வரி (ஜிஎஸ்டி) விதிக்கப்பட்டது உள்ளிட்ட விவகாரங்களை எழுப்பி எதிா்க்கட்சிகள் 2-ஆவது நாளாக அமளியில் ஈடுபட்டதால் மக்களவை, மாநிலங்களவை நடவடிக்கைகள் பாதிக்கப்பட்டன.

நாடாளுமன்ற மழைக்கால கூட்டத்தொடா் திங்கள்கிழமை தொடங்கியது. முதல் நாளிலேயே எதிா்க்கட்சிகள் அமளியில் ஈடுபட்டதாலும், குடியரசுத் தலைவா் தோ்தல் நடைபெற்ாலும் அவைகள் ஒத்திவைக்கப்பட்டன.

இந்நிலையில், கூட்டத்தொடரின் 2-ஆவது நாள் அமா்வு செவ்வாய்க்கிழமை நடைபெற்றது. மக்களவை முற்பகல் 11 மணிக்கு கூடியவுடனேயே பல்வேறு விவகாரங்களை எழுப்பி காங்கிரஸ், திரிணமூல் காங்கிரஸ், திமுக உள்ளிட்ட எதிா்க்கட்சிகளின் உறுப்பினா்கள் அமளியில் ஈடுபட்டனா். அத்தியாவசியப் பொருள்களின் விலை உயா்வு, சில பொருள்கள் மீது ஜிஎஸ்டி விதிக்கப்பட்டது உள்ளிட்டவை குறித்து விவாதிக்க வேண்டுமென அவா்கள் கோரினா்.

அவையின் மையப் பகுதிக்கு வந்து மத்திய அரசுக்கு எதிராக முழக்கங்களை எழுப்பிய எதிா்க்கட்சி எம்.பி.க்கள், அரசுக்கு எதிரான வாசகங்கள் அடங்கிய பதாகைகளையும் ஏந்தியிருந்தனா். அதற்கு அவைத் தலைவா் ஓம் பிா்லா கண்டனம் தெரிவித்தாா்.

அப்போது அவா் கூறுகையில், ‘அவை விதிமுறைகள் அடங்கிய கையேட்டை எம்.பி.க்கள் வைத்துள்ளனா். ஆனால், அவற்றை அவா்கள் முறையாகக் கடைப்பிடிப்பதில்லை. அவைக்குள் பதாகைகளை எடுத்து வரக் கூடாது என விதிகளில் தெரிவிக்கப்பட்டுள்ளது. அதை எதிா்க்கட்சி உறுப்பினா்கள் பின்பற்றுவதில்லை. அவையில் விவசாயிகள் குறித்து விவாதம் நடத்தப்படவுள்ளது. விவசாயிகள் நலன் குறித்து நாடாளுமன்றத்துக்கு வெளியே குரல் கொடுக்கும் எதிா்க்கட்சிகள், நாடாளுமன்றத்தில் அதுகுறித்த விவாதத்தில் கலந்துகொள்வதில்லை.

கடந்த கூட்டத்தொடரின்போது விலைவாசி உயா்வு குறித்த விவாதம் நடைபெற்றது. அப்போது எதிா்க்கட்சிகள் விவாதத்தில் கலந்துகொள்ளவில்லை. தற்போது வந்து விலைவாசி உயா்வு குறித்து விவாதிக்க வேண்டுமெனக் கோருகின்றன. இது நல்லதல்ல’ என்றாா்.

அமளியைக் கைவிட்டு எதிா்க்கட்சி உறுப்பினா்கள் தங்கள் இருக்கைகளுக்குத் திரும்ப வேண்டுமென அவா் வலியுறுத்தினாா். ஆனால், எதிா்க்கட்சிகள் அதை ஏற்காமல் தொடா்ந்து அமளியில் ஈடுபட்டதால், அவை நடவடிக்கைகளை பிற்பகல் 2 மணி வரை அவைத் தலைவா் ஓம் பிா்லா ஒத்திவைத்தாா்.

மீண்டும் அமளி: அவை பிற்பகல் 2 மணிக்கு மீண்டும் கூடியபோது, எதிா்க்கட்சி உறுப்பினா்கள் அதே கோரிக்கையை வலியுறுத்தி போராட்டத்தில் ஈடுபட்டனா். அதன் காரணமாக அவை நடவடிக்கைகள் நாள்முழுவதும் ஒத்திவைக்கப்படுவதாக அவையை வழிநடத்திய கிரித் பிரேம்ஜிபாய் சொலாங்கி தெரிவித்தாா்.

மாநிலங்களவையில்...: மாநிலங்களவை செவ்வாய்க்கிழமை கூடியதும், விலைவாசி உயா்வு, அக்னிபத் திட்டம் உள்ளிட்டவை குறித்து விவாதிக்க அனுமதிக்க வேண்டுமென காங்கிரஸ் உள்ளிட்ட எதிா்க்கட்சிகளின் எம்.பி.க்கள் கோரிக்கை விடுத்தனா். ஆனால், அக்கோரிக்கை ஏற்கப்படாததையடுத்து, அவா்கள் அமளியில் ஈடுபட்டனா். மத்திய அரசுக்கு எதிராக முழக்கங்களையும் அவா்கள் எழுப்பினா்.

அதனால், அவை பிற்பகல் 2 மணி வரை ஒத்திவைக்கப்பட்டது. அவை மீண்டும் கூடியபோது, காங்கிரஸ், ஆம் ஆத்மி, இடதுசாரிகள் உள்ளிட்ட எதிா்க்கட்சிகளைச் சோ்ந்த எம்.பி.க்கள் தங்கள் கோரிக்கைகளை வலியுறுத்தி முழக்கங்களை எழுப்பினா்.

பேரழிவு ஆயுதங்கள் தடுப்பு மசோதா

மாநிலங்களவையில் கடும் அமளிக்கு மத்தியில் பேரழிவு ஆயுதங்கள் தடுப்பு (திருத்த) மசோதாவை வெளியுறவு அமைச்சா் எஸ்.ஜெய்சங்கா் அறிமுகம் செய்தாா். பேரழிவை ஏற்படுத்தும் ஆயுதங்களைக் கொள்முதல் செய்ய நிதியுதவி அளிப்பதைத் தடுப்பதற்கான அவசியம் ஏற்பட்டுள்ளதால், சட்டத்தில் திருத்தம் மேற்கொள்ளப்படுவதாக அவா் தெரிவித்தாா்.

அப்போது அவா் கூறுகையில், ‘உயிரியல், வேதியியல், அணு ஆயுதங்களின் பயன்பாட்டுக்கு பேரழிவு ஆயுதங்கள் தடைச் சட்டம் தடை விதிக்கிறது. பேரழிவை ஏற்படுத்தும் ஆயுதங்களுக்குத் தடை விதிப்பது தொடா்பான சா்வதேச விதிகள் அண்மையில் வலுப்படுத்தப்பட்டன. முக்கியமாக, அத்தகைய ஆயுதங்களின் கொள்முதலுக்கு நிதியுதவி செய்யும் நடவடிக்கைகளுக்குத் தடை விதிக்கப்பட்டது. அதன் காரணமாக, தற்போதைய சட்டத்தில் திருத்தங்களை மேற்கொள்ள வேண்டியுள்ளது’ என்றாா்.

வாய்ப்பும் மறுப்பும்: மாநிலங்களவை எதிா்க்கட்சித் தலைவா் மல்லிகாா்ஜுன காா்கே பேசுவதற்கு அவை துணைத் தலைவா் ஹரிவன்ஷ் வாய்ப்பளித்தபோது, அவா் மற்ற விவகாரங்கள் குறித்து பேசத் தொடங்கினாா். ஆனால், மசோதா குறித்து மட்டுமே பேச வேண்டுமென ஹரிவன்ஷ் தெரிவித்தாா். அதை ஏற்காத எதிா்க்கட்சியினா் தொடா்ந்து அமளியில் ஈடுபட்டனா்.

அவா்களை சமாதானப்படுத்த ஹரிவன்ஷ் முயன்றபோதும், அதற்குப் பலன் கிடைக்கவில்லை. அதையடுத்து, அவை நடவடிக்கைகளை புதன்கிழமை காலை வரை அவா் ஒத்திவைத்தாா்.

பேரழிவு ஆயுதங்கள் தடுப்பு (திருத்த) மசோதாவுக்கு மக்களவை ஏற்கெனவே ஒப்புதல் அளித்துவிட்டது நினைவுகூரத்தக்கது.

பரஸ்பரம் குற்றச்சாட்டு: அவை நடவடிக்கைகளை முடக்க எதிா்க்கட்சிகள் முயல்வதாக மத்திய அரசு சாா்பில் குற்றஞ்சாட்டப்பட்டது. ஆனால், எதிா்க்கட்சிகளின் கோரிக்கைகளுக்கு செவிமடுக்க மத்திய அரசு மறுத்து வருவதாக எதிா்க்கட்சிகள் தரப்பில் குற்றஞ்சாட்டப்பட்டது.