குஜராத் தேர்தல்: வேட்பாளர்களை அறிவித்த பாரதிய பழங்குடியினர் கட்சி

குஜராத் சட்டப்பேரவைத் தேர்தலில் போட்டியிடும் வேட்பாளர்களில் முதல் கட்டமாக 12 வேட்பாளர்களை பாரதிய பழங்குடியினர் கட்சி அறிவித்துள்ளது.

முதல் கட்டமாக அறிவிக்கப்பட்டுள்ள 12 வேட்பாளர்களில் 9 பேர் பட்டியலின பழங்குடியைச் சேர்ந்தவர்கள் ஆவர்.

குஜராத் சட்டப்பேரவைத் தேர்தல் இரண்டு கட்டங்களாக வருகிற டிசம்பர் 1 மற்றும் டிசம்பர் 5 ஆகிய தேதிகளில் நடத்தப்படும் எனத் தேர்தல் ஆணையம் அண்மையில் அறிவித்தது. இதனையடுத்து, அரசியல் கட்சிகள் தங்களது தீவிர பிரசாரத்தை தொடங்கியுள்ளன. இந்நிலையில், பாரதிய பழங்குடியின கட்சி குஜராத் சட்டப்பேரவைத் தேர்தலில் போட்டியிடும் முதல் கட்ட வேட்பாளர்களை இன்று அறிவித்துள்ளது. 

இதையும் படிக்க: குஜராத் தேர்தல்: பாஜக மீது குற்றப் பத்திரிகை தாக்கல் செய்த காங்கிரஸ்

இது குறித்து குஜராத்தின் பாரதிய பழங்குடியின கட்சியின் மாநிலத் தலைவர் ரமேஷ் வசவா கூறியதாவது: அடுத்த மாதம் நடைபெற உள்ள குஜராத் சட்டப்பேரவைத் தேர்தலில் மாநிலம் முழுவதும் பட்டியலின பழங்குடியினருக்கு ஒதுக்கப்பட்டுள்ள 27 தொகுதிகளிலும் பாரதிய பழங்குடியின கட்சி வேட்பாளர்கள் போட்டியிடுவார்கள். கடந்த 2017ஆம் ஆண்டு நடைபெற்றத் தேர்தலில் பாரதிய பழங்குடியின கட்சி 2 தொகுதிகளில் வெற்றி பெற்றது. இன்று முதல் கட்டமாக பாரதிய பழங்குடியின கட்சி சார்பில் போட்டியிடும் 12 வேட்பாளர்கள் அறிவிக்கப்பட்டுள்ளனர். அதில் 3 பேர் பொதுத் தொகுதியிலும், 9 பேர் பட்டியலின பழங்குடியைச் சேர்ந்த வேட்பாளருக்கு ஒதுக்கப்பட்ட தொகுதியிலும் போட்டியிட உள்ளனர் என்றார்.