காங்கிரஸ் பதவிக்கான தோ்தலில் போட்டியிடும் வேட்பாளா்கள் இடையே பொது விவாதம் நடத்துவதற்கு வேட்பாளா்களில் ஒருவரான சசி தரூா் விருப்பம் தெரிவித்துள்ளாா்.
காங்கிரஸ் தலைவா் தோ்தலில் மல்லிகாா்ஜுன காா்கே, சசி தரூா் ஆகியோா் போட்டியிடும் நிலையில், இருவரும் தங்களது பிரசாரத்தை தொடங்கியுள்ளனா்.
இந்நிலையில், பிடிஐ செய்தியாளருக்கு அளித்த பேட்டியில் சசி தரூா் கூறியதாவது:
காங்கிரஸ் தற்போது எதிா்கொண்டுள்ள சவால்களுக்கான தீா்வு திறன்மிக்க தலைமை மற்றும் அமைப்புரீதியிலான சீா்திருத்தங்கள் ஆகிய இரண்டிலும்தான் அடங்கியுள்ளது. ஐ.நா. உள்ளிட்ட உயா்நிலை அமைப்புகளில், எனது நம்பகமான தலைமைத்துவ செயல்பாடுகள் ஏற்கெனவே நிரூபணமாகியுள்ளது. காங்கிரஸ் கட்சிக்காக, அகில இந்திய தொழில் வல்லுநா்கள் பிரிவை கடந்த 2017-இல் ஏற்படுத்தினேன். கடந்த 5 ஆண்டுகளில் 20 மாநிலங்களைச் சோ்ந்த 10,000 போ் இப்பிரிவில் இணைந்துள்ளனா் என்றாா் அவா்.
பிரிட்டன் உள்ளிட்ட மேற்கத்திய நாடுகளில் நடைபெறுவதைப் போல, காங்கிரஸ் தலைவா் தோ்தலில் வேட்பாளா்கள் இடையே பொது விவாதம் நடத்த விரும்புகிறீா்களா? என்று தரூரிடம் செய்தியாளா் கேள்வியெழுப்பினாா். அதற்கு அவா் அளித்த பதில்:
காங்கிரஸ் தலைவா் தோ்தலில் வேட்புமனு தாக்கலின் இறுதி நாளுக்கும் தோ்தலுக்கும் இடையே இரண்டரை வார இடைவெளிதான் உள்ளது. இந்த காலகட்டத்தில் 9,000 கமிட்டி உறுப்பினா்களையும் நான் அணுகி வாக்கு சேகரிப்பது சிரமமானது.
எனவே, கட்சிக்கான தங்களது கருத்துகள் மற்றும் பாா்வைகளை ஒரே மேடையில் வேட்பாளா்கள் பரிமாறிக் கொள்ளும்போது, அது வாக்காளா்களை எளிதாகச் சென்றடையும். அத்துடன் கட்சி மீதான பொதுமக்கள், ஊடகங்கள், இதர தரப்பினரின் கவனத்தையும் பெரிதும் ஈா்க்கும். மேற்கண்ட யோசனைக்கு நான் விருப்பத்துடன் உள்ளேன் என்றாா் சசி தரூா்.
நேரு-காந்தி குடும்பத்தைச் சாராத நபா் காங்கிரஸ் தலைவராகப் பொறுப்பேற்றாலும் அக்குடும்பத்துக்கு முதன்மையான இடம் தொடருமா என்ற கேள்விக்கு, ‘அது மிகத் தெளிவாக உள்ள விஷயம். காங்கிரஸ் தொண்டா்களின் மனதில் நேரு-காந்தி குடும்பத்துக்கு எப்போதுமே சிறப்பான இடம் உண்டு’ என்றாா்.
காா்கே கருத்து:
பொது விவாதம் தொடா்பான தரூரின் கருத்துகள் குறித்து மல்லிகாா்ஜுன காா்கே கூறுகையில், ‘இந்த விவகாரத்துக்குள் செல்ல விரும்பவில்லை. எனக்கு பணியாற்றத்தான் தெரியும். அதற்கான வாய்ப்பையே கமிட்டி உறுப்பினா்களிடம் கோருகிறேன்’ என்றாா்.