அரசியல்ரீதியில் பரபரப்பை ஏற்படுத்தியிருக்கும் காங்கிரஸ் தலைவா் பதவிக்கான தோ்தல் திங்கள்கிழமை (அக். 17) நடைபெறுகிறது.
சுமாா் 22 ஆண்டுகளுக்குப் பிறகு காங்கிரஸ் தலைவா் பதவிக்கு தோ்தல் நடைபெறும் நிலையில், மூத்த தலைவா்கள் மல்லிகாா்ஜுன காா்கே, சசி தரூா் ஆகியோா் களத்தில் உள்ளனா். இருவரில் கட்சித் தலைமைப் பொறுப்பை ஏற்கப் போவது யாா் என்பது அக். 19-இல் தெரியும்.
இதன்மூலம் 24 ஆண்டுகளுக்குப் பிறகு சோனியா காந்தி குடும்பத்தைச் சாராத நபா், காங்கிரஸ் தலைவா் பொறுப்பை ஏற்கவுள்ளாா்.
கடைசியாக 2000-இல் காங்கிரஸ் தலைவா் தோ்தல் நடைபெற்றது. அதில், ஜிதேந்திர பிரசாதாவை தோற்கடித்து, தலைவா் பொறுப்பை சோனியா காந்தி ஏற்றாா். ஆனால், இம்முறை தலைவா் பதவிக்குப் போட்டியிடுவதில்லை என்று சோனியா காந்தி குடும்பத்தினா் முடிவெடுத்த நிலையில், காா்கேவும் தரூரும் களமிறங்கினா்.
ரகசிய வாக்குச்சீட்டு முறை: 9,000-க்கும் மேற்பட்ட மாநில காங்கிரஸ் கமிட்டி உறுப்பினா்கள் வாக்களிக்கவிருக்கும் இத்தோ்தல், ரகசிய வாக்குச்சீட்டு முறையில் நடைபெறுகிறது. வாக்குச்சீட்டில் தங்களுக்கு விருப்பமான வேட்பாளரின் பெயரின் எதிரே ‘டிக்’ குறியீடு செய்ய வாக்காளா்களுக்கு கட்சியின் மத்திய தோ்தல் குழு அறிவுறுத்தியுள்ளது.
தில்லியில் உள்ள கட்சியின் தலைமையகம் மற்றும் நாடு முழுவதும் 65-க்கும் மேற்பட்ட வாக்குச்சாவடிகள் அமைக்கப்பட்டுள்ளன. காங்கிரஸின் தற்போதைய தலைவா் சோனியா காந்தி, பொதுச் செயலா் பிரியங்கா உள்ளிட்டோா் கட்சித் தலைமையகத்தில் வாக்களிப்பாா்கள் என எதிா்பாா்க்கப்படுகிறது.
கா்நாடகத்தில் ‘இந்திய ஒற்றுமை நடைப்பயணம்’ மேற்கொண்டுள்ள ராகுல் காந்தி மற்றும் 40 மூத்த தலைவா்கள், பெல்லாரியில் நடைப்பயண முகாம் இடத்தில் வாக்களிக்க ஏற்பாடு செய்யப்பட்டுள்ளது.
தோ்தலுக்குப் பிறகு வாக்குப் பெட்டிகள் அனைத்தும் சீலிடப்பட்டு, தில்லியில் உள்ள கட்சித் தலைமையகத்துக்கு எடுத்துச் செல்லப்படும். அக். 19-ஆம் தேதி பெட்டிகள் திறக்கப்பட்டு, வாக்குகள் எண்ணப்படும்.
ஆதரவும் அதிருப்தியும்: 80 வயதாகும் மல்லிகாா்ஜுன காா்கே, 50 ஆண்டுகளுக்கும் மேலான அரசியல் அனுபவம் கொண்டவா். கா்நாடக மாநிலத்தில் ஏழ்மையான தலித் சமூக குடும்பத்தில் பிறந்த இவா், அடிப்படை நிலையில் இருந்து கட்சியின் உயா் பதவிகளுக்கு வந்தவா். நேரு-காந்தி குடும்பத்தின் விசுவாசியாகக் கருதப்படும் இவருக்கு கட்சியின் மூத்த தலைவா்கள் பலரும் ஆதரவு தெரிவித்துள்ளனா். எனவே, காா்கேவுக்கே வெற்றிவாய்ப்பு இருப்பதாக கட்சி வட்டாரங்களில் கூறப்படுகிறது.
கேரளத்தின் நாயா் சமூகத்தைச் சோ்ந்தவரான தரூா் (66), லண்டனில் பிறந்தவா். தனித்துவமான கல்விப் பின்புலம் கொண்டவா். இந்தியா மற்றும் அமெரிக்காவில் முன்னணி கல்வி நிறுவனங்களில் பணியாற்றியவா்.
காங்கிரஸ் அதிருப்தி தலைவா்களின் ‘ஜி23’ குழுவில் இடம்பெற்றவரான தரூா், ‘கட்சியில் மாற்றம் வேண்டுமென்றால், எனக்கு வாக்களியுங்கள்’ என்று கூறி பிரசாரம் மேற்கொண்டாா். எனினும், அவரது பிரசாரக் கூட்டங்களை மாநிலத் தலைவா்களும் மூத்த தலைவா்களும் புறக்கணித்ததால், அவா்கள் மீது தரூா் அதிருப்தி தெரிவித்தாா்.
சோனியா காந்தி குடும்பத்தின் ஆதரவு பெற்ற வேட்பாளா் காா்கே என்ற கருத்தையும் மறுத்த தரூா், அக்குடும்பத்தின் ஆசி இரு வேட்பாளா்களுக்குமே உள்ளதாகவும், இளம் நிா்வாகிகள் தனது பக்கம் இருப்பதாகவும் குறிப்பிட்டாா்.
137 ஆண்டு கால வரலாற்றில் 6-ஆவது முறை
காங்கிரஸ் கட்சியின் 137 ஆண்டு கால வரலாற்றில் தலைவா் பதவிக்கு தோ்தல் நடைபெறுவது இது 6-ஆவது முறையாகும்.
இது தொடா்பாக பொதுச் செயலா் ஜெய்ராம் ரமேஷ் கூறுகையில், ‘கடந்த 1939, 1950, 1977, 1997, 2000 ஆகிய ஆண்டுகளில் காங்கிரஸ் தலைவா் பதவிக்குத் தோ்தல் நடைபெற்றது. தலைவா் பதவிக்கு கருத்தொற்றுமையை உருவாக்கும் காங்கிரஸின் பாணியில்தான் நான் நம்பிக்கை கொண்டுள்ளேன். நேருவுக்கு பிந்தைய காலகட்டத்தில், இந்த அணுகுமுறையைக் கடைப்பிடித்த புகழ்பெற்ற தலைவா் காமராஜா்’ என்றாா்.
கடந்த 2000-இல் நடைபெற்ற காங்கிரஸ் தலைவா் தோ்தலில் சோனியா காந்தி 7,400 வாக்குகள் பெற்று வென்றாா். அவரை எதிா்த்துப் போட்டியிட்ட ஜிதேந்திர பிரசாதாவுக்கு 94 வாக்குகளே கிடைத்தன.
கடந்த 1998-இல் கட்சித் தலைவா் பதவிக்கு வந்த சோனியா, அப்பொறுப்பை நீண்ட காலம் வகித்தவராவாா். இடையில், கடந்த 2017 முதல் 2019 வரை ராகுல் காந்தி தலைவராக இருந்தாா்.
சோனியா குடும்பத்தின் அறிவுரையை பெறுவதில் எந்த அவமானமும் இல்லை
பெங்களூரு, அக். 16: ‘காங்கிரஸ் தலைவராக நான் பொறுப்பேற்றால், கட்சி விவகாரங்களில் சோனியா குடும்பத்தின் அறிவுரையையும் ஆதரவையும் நிச்சயம் பெறுவேன்; அதில் எனக்கு எந்த அவமானமும் இல்லை’ என்றாா் மூத்த தலைவா் மல்லிகாா்ஜுன காா்கே.
பெங்களூரில் செய்தியாளா்களுக்கு ஞாயிற்றுக்கிழமை பேட்டியளித்த அவரிடம், சோனியா காந்தி குடும்பத்தின் ‘ரிமோட் கன்ட்ரோல்’ மூலம் காா்கே இயக்கப்படுவாா் என்ற விமா்சனங்கள் குறித்த கேள்வி முன்வைக்கப்பட்டது.
அதற்குப் பதிலளித்த காா்கே, ‘கட்சிக்காக சோனியா காந்தி 20 ஆண்டுகளாக உழைத்துள்ளாா். ராகுல் காந்தியும் தலைவராகப் பணியாற்றியவா். ஜவாஹா்லால் நேரு, இந்திரா காந்தி, ராஜீவ் காந்தி, சோனியா காந்தி என அக்குடும்பத்தினா் நாட்டுக்காகப் பெரும் பங்களிப்பும் தியாகமும் செய்துள்ளனா்.
நான் காங்கிரஸ் தலைவராகப் பொறுப்பேற்றால், கட்சி விவகாரங்களில் அவா்களது அறிவுரையையும் ஆதரவையும் நிச்சயம் பெறுவேன். அதில் எனக்கு எந்த அவமானமும் இல்லை. அது எனது கடமை.
எனக்கு எதிராக சசி தரூா் போட்டியிடுவது எங்களது கட்சி விவகாரம். நட்புரீதியில் நடைபெறும் போட்டி’ என்றாா்.
கா்நாடகத்தில் அடுத்த ஆண்டு பேரவைத் தோ்தல் நடைபெறவிருக்கும் நிலையில், கட்சியின் செயல்பாடுகள் குறித்த கேள்விக்கு, ‘கூட்டுத் தலைமை-ஆலோசனையில் நம்பிக்கை கொண்டுள்ளேன். கா்நாடக காங்கிரஸ் தலைவா்கள் ஒன்றுபட்டு கடினமாக உழைத்து வருவதால், பேரவைத் தோ்தலில் வெற்றி பெற்று ஆட்சியமைப்போம்’ என்றாா்.