ஹிமாசல் தேர்தல்: பாஜகவின் 2-ம் கட்ட வேட்பாளர்கள் பட்டியல் வெளியீடு!

ஹிமாசல பிரதேச சட்டப்பேரவைத் தோ்தலில் போட்டியிடும் இரண்டாம் கட்ட வேட்பாளர்கள் பட்டியலை பாஜக இன்று வெளியிட்டுள்ளது.

ஹிமாசல பிரதேச மாநிலத்தில் மொத்தமுள்ள 68 சட்டப்பேரவை தொகுதிகளுக்கும் ஒரே கட்டமாக நவம்பர் 12 ஆம் தேதி வாக்குப்பதிவு நடைபெறவுள்ளது. தேர்தலில் பதிவாகும் வாக்குகள் டிசம்பர் 8 ஆம் தேதி எண்ணப்பட்டு முடிவுகள் அறிவிக்கப்படும்.

ஹிமாச்சலப் பிரதேச சட்டப்பேரவை தேர்தல் வேட்புமனுத் தாக்கல் அக்டோபர் 17-ல் தொடங்கி அக்டோபர் 25-ல் நிறைவடைகிறது. வேட்புமனுக்கள் மீதான பரிசீலனை அக்டோபர் 27 ஆம் தேதி நடைபெறும். வேட்புமனுக்களை திரும்பப் பெற கடைசி நாள் அக்டோபர் 29 ஆம் தேதி என்று தேர்தல் ஆணையம் தெரிவித்துள்ளது.

தேர்தலையொட்டி கட்சிகளும் தங்களது வேட்பாளர் பட்டியலை வெளியிட்டு வருகின்றன. 

அந்தவகையில் பாஜக, ஹிமாசல் பேரவைத் தோ்தலில் போட்டியிடும் 62 வேட்பாளா்கள் அடங்கிய முதல் பட்டியலை ஆளும் கட்சியான பாஜக புதன்கிழமை வெளியிட்டது.

இதையடுத்து, 6 வேட்பாளர்கள் அடங்கிய இரண்டாம் கட்ட வேட்பாளர்கள் பட்டியலை இன்று வெளியிட்டுள்ளது. 

தெஹ்ரா, ஜவாலமுகி, குலு, பர்சார், ஹரோலி, ராம்பூர் ஆகிய தொகுதிகளில் போட்டியிடும் வேட்பாளர்கள் அறிவிக்கப்பட்டுள்ளனர். 

இதையடுத்து மொத்தமுள்ள 68 தொகுதிகளுக்கும் பாஜக வேட்பாளர்களை அறிவித்துவிட்டது குறிப்பிடத்தக்கது.