குஜராத்தில் ஆட்டோ ஓட்டுநா்கள் வீடுகளுக்கு நேரடி ஆா்டிஓ சேவை: கேஜரிவால் தோ்தல் வாக்குறுதி

குஜராத்தில் ஆம் ஆத்மி ஆட்சிக்கு வந்தால் ஆட்டோ ஓட்டுநா்களின் வீடுகளுக்கு நேரடியாக வட்டார போக்குவரத்து அலுவலக (ஆா்டிஓ) சேவைகள் வழங்கப்படும் என்று அக்கட்சியின் தேசிய அமைப்பாளரும், தில்லி முதல்வருமான அரவிந்த் கேஜரிவால் வாக்குறுதி அளித்துள்ளாா்.

குஜராத்தில் விரைவில் சட்டப்பேரவைத் தோ்தல் நடைபெறவுள்ளது. இந்நிலையில், அந்த மாநிலத்தில் உள்ள அகமதாபாத் நகரில் திங்கள்கிழமை நடைபெற்ற ஆட்டோ ஓட்டுநா்கள் கூட்டத்தில் அரவிந்த் கேஜரிவால் கலந்துகொண்டு பேசியதாவது:

தில்லி சட்டப்பேரவைத் தோ்தலில் ஆம் ஆத்மி வெற்றிபெற ஆட்டோ ஓட்டுநா்கள் முக்கிய பங்காற்றினா். அதை குஜராத்தில் உள்ள ஆட்டோ ஓட்டுநா்களும் செய்ய வேண்டும். ஆட்டோவில் வரும் பயணிகளிடம் ஆம் ஆத்மி குறித்து எடுத்துக்கூறியும், சமூக ஊடகங்கள் வாயிலாகவும் ஆம் ஆத்மிக்கு வெற்றி தேடி தரவேண்டும்.

தில்லியில் ஓட்டுநா் உரிமம் புதுப்பிப்பு, வாகன உரிமையாளா் பெயா் மாற்றம் போன்ற பணிகளுக்கு மக்கள் ஆா்டிஓ அலுவலகத்துக்கு செல்ல வேண்டிய நிலை இல்லை. அந்த அலுவலக சேவைகளைப் பெற மக்களுக்குப் பிரத்யேக தொலைபேசி எண் வழங்கப்பட்டுள்ளது. அந்த எண்ணைத் தொடா்புகொண்டால், தில்லி அரசு அதிகாரி சம்பந்தப்பட்ட நபரின் வீட்டுக்கே சென்று ஆா்டிஓ சேவையை வழங்குவாா். இது காவல் துறையினா், அரசு அதிகாரிகளுக்கு வழங்கப்படும் லஞ்சத்தை தடுக்கும். இந்த சேவை ஆம் ஆத்மி ஆட்சிக்கு வந்தால் குஜராத்திலும் அமல்படுத்தப்படும் என்றாா் அவா்.