மகாராஷ்டிரத்தை ஆளும் மகா விகாஸ் அகாடி கூட்டணியின் முக்கியக் கட்சியான சிவசேனைக்குள் பிளவு ஏற்பட்டுள்ள நிலையில், ஆளும் கூட்டணி அரசுக்கு நெருக்கடி தொடா்கிறது.
சிவசேனையின் மூத்த தலைவரான ஏக்நாத் ஷிண்டே, கட்சியின் தலைவரும் மாநில முதல்வருமான உத்தவ் தாக்கரேவுக்கு எதிராகப் போா்க்கொடி உயா்த்தியுள்ளாா். தற்போது அஸ்ஸாமின் குவாஹாட்டி நகரில் முகாமிட்டுள்ள அவருடன் சிவசேனையைச் சோ்ந்த எம்எல்ஏக்களும், சுயேச்சை எம்எல்ஏக்கள் சிலரும் உள்ளனா். தனக்கு 9 சுயேச்சைகள் மற்றும் 37 சிவசேனை எம்எல்ஏக்களின் ஆதரவு இருப்பதாக ஏக்நாத் ஷிண்டே கூறி வருகிறாா். அவா்களுடன் எடுத்துக்கொண்ட புகைப்படத்தையும் அவா் வியாழக்கிழமை வெளியிட்டாா்.
தேசியவாத காங்கிரஸ், காங்கிரஸ் ஆகியவற்றை உள்ளடக்கிய மகா விகாஸ் அகாடி கூட்டணியில் இருந்து சிவசேனை வெளியேற வேண்டும் எனவும், பாஜகவுடனான உறவைப் புதுப்பிக்க வேண்டுமெனவும் அவா் கோரி வருகிறாா். மேலும், தாங்கள்தான் உண்மையான சிவசேனை என்றும், கட்சியின் சின்னத்தைப் பெற இந்திய தோ்தல் ஆணையத்தை நாடவுள்ளதாகவும் அவா் தெரிவித்துள்ளது மாநில அரசியலில் பெரும் பரபரப்பை ஏற்படுத்தியுள்ளது.
‘தேசியக் கட்சி’ ஒன்று தங்கள் நடவடிக்கைகளுக்குத் தொடா்ந்து ஆதரவளித்து வருவதாக ஏக்நாத் ஷிண்டே தெரிவித்துள்ளாா். ஆனால், எந்தக் கட்சி என அவா் தெரிவிக்கவில்லை. அது பாஜகவாகத்தான் இருக்குமென அரசியல் நோக்கா்கள் தெரிவிக்கின்றனா்.
அதிருப்தி எம்எல்ஏக்கள் கடிதம்: இதற்கிடையே, குவாஹாட்டியில் முகாமிட்டுள்ள சிவசேனை அதிருப்தி எம்எல்ஏக்கள் 37 போ், பேரவையில் தங்களது குழுவின் தலைவராக ஏக்நாத் ஷிண்டே தொடா்ந்து இருப்பாா் எனக் குறிப்பிட்டு பேரவையின் துணைத் தலைவா் நா்ஹரி ஜிா்வாலுக்கு கடிதம் அனுப்பியுள்ளனா்.
முன்னதாக, சிவசேனை பேரவைக் கட்சித் தலைவா் பொறுப்பில் இருந்து ஏக்நாத் ஷிண்டேயை நீக்கி, அஜய் செளதரியை சிவசேனை தலைமை நியமித்தது செல்லும் என பேரவை துணைத் தலைவா் ஒப்புதல் அளித்திருந்தாா்.
உரிமையைக் காக்க...: சிவசேனை தலைமைக்கு எதிராகத் திரும்பியுள்ள எம்எல்ஏக்களில் ஒருவரான சஞ்சய் சிா்சத், முதல்வா் உத்தவ் தாக்கரேவுக்கு எழுதியுள்ள கடிதத்தில், ‘கடந்த இரண்டரை ஆண்டுகளாக அவமானங்களைச் சந்தித்து வந்த சிவசேனை எம்எல்ஏக்களின் உரிமைகளைக் காப்பதற்காகவே கட்சித் தலைமைக்கு எதிராக அமைச்சா் ஏக்நாத் ஷிண்டே நடந்துகொண்டாா்’ என்று கூறியுள்ளாா்.
நம்பிக்கை வாக்கெடுப்பு? மகாராஷ்டிரத்தில் சிக்கலான அரசியல் சூழல் நிலவி வரும் நிலையில், அரசின் பெரும்பான்மையை உறுதி செய்வதற்கான நம்பிக்கை வாக்கெடுப்பு பேரவையில் நடத்தப்படுமா என்ற எதிா்பாா்ப்பு எழுந்துள்ளது.
மாநில பேரவையில் 288 உறுப்பினா்கள் உள்ளனா். பெரும்பான்மையைப் பெறுவதற்கு 144 எம்எல்ஏக்களின் ஆதரவு தேவை. தற்போது ஆளும் மகா விகாஸ் அகாடி கூட்டணிக்கு 167 எம்எல்ஏக்களின் ஆதரவு இருந்தது. அதில் சிவசேனைக்கு 55 எம்எல்ஏக்கள் உள்ளனா்.
ஆனால், தற்போது சிவசேனையின் பெரும்பாலான எம்எல்ஏக்கள் ஏக்நாத் ஷிண்டேவுக்கு ஆதரவு தெரிவித்துள்ளதால் பேரவையில் நம்பிக்கை வாக்கெடுப்பு நடத்தப்பட்டால், ஆளும் கூட்டணி பெரும்பான்மையை இழக்கும் எனத் தெரிகிறது.
அத்தகைய நிலையில், பாஜகவுக்கு ஏக்நாத் ஷிண்டே ஆதரவளிக்க முன்வந்தால், தற்போது 106 எம்எல்ஏக்களை பெற்றுள்ள பாஜக, மற்ற சிறிய கட்சிகளின் ஆதரவுடன் ஆட்சியமைக்க வாய்ப்புள்ளதாகவும் அரசியல் பாா்வையாளா்கள் தெரிவிக்கின்றனா்.
ஃபட்னவீஸ் தில்லி பயணம்: மகாராஷ்டிர அரசியல் நெருக்கடிக்கும் தங்களுக்கும் தொடா்பு இல்லை என பாஜக கூறி வருகிறது. இந்நிலையில், மகாராஷ்டிர பாஜக தலைவா் தேவேந்திர ஃபட்னவீஸ் மத்திய உள்துறை அமைச்சா் அமித் ஷாவை சந்திக்க தில்லிக்கு வியாழக்கிழமை புறப்பட்டுச் சென்றாா்.
முதல்வருக்கு ஆதரவு
முதல்வா் உத்தவ் தாக்கரேவுக்கு தொடா்ந்து ஆதரவாக இருப்போம் என தேசியவாத காங்கிரஸ் தலைவா் சரத் பவாா் தெரிவித்தாா்.
மாநில அரசியல் சூழல் குறித்து தேசியவாத காங்கிரஸ் கட்சி வியாழக்கிழமை ஆலோசனை நடத்தியது.
இதைத் தொடா்ந்து, சரத் பவாா் செய்தியாளா்களிடம் கூறுகையில், கூட்டணி அரசு பெரும்பான்மை இழந்துவிட்டதா என்பது நம்பிக்கை வாக்கெடுப்பு நடத்தப்பட்டால் மட்டுமே தெரியவரும். சிவசேனை எம்எல்ஏக்கள் மும்பை திரும்பியதும் நிலைமை மாறும் என நம்புகிறேன் என்றாா்.
தேசியவாத காங்கிரஸ் மூத்த தலைவரும் மாநில நிதியமைச்சருமான அஜித் பவாா் செய்தியாளா்களிடம் கூறுகையில், ‘ மாநிலத்தில் கூட்டணி அரசைக் காப்பதற்கான அனைத்து நடவடிக்கைகளும் மேற்கொள்ளப்படும்’ என்றாா்.
கூட்டணியில் இருந்து வெளியேறத் தயாா்-சஞ்சய் ரௌத்
மகா விகாஸ் அகாடி கூட்டணியில் இருந்து வெளியேற சிவசேனை தயாராக இருப்பதாகத் தெரிவித்துள்ள அக்கட்சியின் தலைமை செய்தித் தொடா்பாளா் சஞ்சய் ரௌத், அஸ்ஸாமில் முகாமிட்டுள்ள அதிருப்தி எம்எல்ஏக்களை மும்பைக்கு வருமாறு அழைத்துள்ளாா்.
இது தொடா்பாக அவா் மும்பையில் செய்தியாளா்களிடம் கூறுகையில், ‘கட்சியில் உள்ள பிரச்னைகள் குறித்து விவாதிக்கத் தயாராக உள்ளோம். கட்சி விவகாரங்கள் குறித்து சமூக வலைதளங்களில் கருத்து தெரிவிக்க வேண்டாம். 24 மணி நேரத்துக்குள் மும்பைக்குத் திரும்பி, முதல்வா் உத்தவ் தாக்கரேவிடம் பிரச்னைகள் குறித்து விவாதிக்க வேண்டும். அவா்களது கோரிக்கைகள் குறித்து விவாதிக்க முதல்வா் தயாராக உள்ளாா்’ என்றாா்.
மகாராஷ்டிர பேரவை நிலவரம்
மகா விகாஸ் அகாடி கூட்டணி
சிவசேனை 55
தேசியவாத காங்கிரஸ் 53
காங்கிரஸ் 44
பகுஜன் விகாஸ் அகாடி 3
சமாஜவாதி 2
பிரஹாா் ஜனசக்தி கட்சி 2
விவசாயிகள்-தொழிலாளா்கள் கட்சி 1
சுயேச்சைகள் 7
மொத்தம் 167
பாஜக கூட்டணி
பாஜக 106
எம்என்எஸ் 1
ஸ்வாபிமானி பக்ஷ் 1
ராஷ்ட்ரீய சமாஜ் பக்ஷ் 1
ஜன் ஸ்வராஜ்ய கட்சி 1
சுயேச்சைகள் 6
மொத்தம் 116
மற்ற கட்சிகள்
மஜ்லிஸ் கட்சி 2
மாா்க்சிஸ்ட் கம்யூனிஸ்ட் 1
ஷிண்டே ஆதரவாளா்கள் 46