கோவை: பாதிரியார் ஜார்ஜ் பொன்னையாவுடன் சந்திப்பு மற்றும் அவர் பேசிய விவகாரங்கள் சர்ச்சையான நிலையில், ராகுல் காந்தி பகிரங்க மன்னிப்புக் கோர வேண்டும் என்று பாஜக மகளிர் அணியின் தேசியத் தலைவர் வானதி சீனிவாசன் வலியுறுத்தியுள்ளார்.
பாதிரியார் ஜார்ஜ் பொன்னையா, இந்து மதத்துக்கு எதிரானவர், தேசத்துக்கு எதிரானவர் என்றும் வானதி சீனிவாசன் குறிப்பிட்டுள்ளார்.
இதையும் படிக்க | உங்கள் பி.எஃப். கணக்கில் எவ்வளவு தொகை இருக்கிறது? எளிதாக அறியலாம்
பாரத மாதா மற்றும் இந்துக்களுக்கு எதிரான ஜார்ஜ் பொன்னையாவின் கருத்துகளுக்கு ராகுல் காந்தி துணையாக இருக்கிறாரா என்பது குறித்து நாட்டு மக்களுக்கு ராகுல் காந்தி விளக்க வேண்டும் என்றும் வலியுறுத்தியுள்ளார்.
இந்திய ஒற்றுமை நடைப்பயணத்தில், காங்கிரஸ் எம்.பி. ராகுல் காந்தியுடனான சந்திப்பின்போது, ஹிந்துக் கடவுள் சக்தியை குறிப்பிட்டு தமிழக பாதிரியாா் ஜாா்ஜ் பொன்னையா பேசியது சா்ச்சைக்குள்ளானது.
இந்த விவகாரத்தை முன்வைத்து, பாஜக மற்றும் காங்கிரஸ் இடையே கருத்து மோதல் ஏற்பட்டுள்ளது. ராகுல்-பாதிரியாா் சந்திப்பு தொடா்பான விடியோவை பகிா்ந்துள்ள பாஜக, ‘ஹிந்துக்கள் மீதான காங்கிரஸின் வெறுப்புணா்வு வெளிப்பட்டுள்ளது’ என விமா்சித்திருந்தது.
அதேநேரம், ‘ராகுலின் நடைப்பயணத்துக்கு பெருவாரியான ஆதரவு கிடைத்து வருவதால், பாஜக விரக்தியடைந்துள்ளது’ என்று காங்கிரஸ் பதிலடி கொடுத்தது.
கன்னியாகுமரியில் இருந்து ‘இந்திய ஒற்றுமை நடைப்பயணத்தை’ மேற்கொண்டு வரும் ராகுல் காந்தி, பாதிரியாா் ஜாா்ஜ் பொன்னையா உள்ளிட்டோரை சந்தித்தாா். அப்போது நடைபெற்ற உரையாடல் தொடா்பான விடியோவை பாஜக தலைவா்கள் உள்பட பலா் ட்விட்டரில் பகிா்ந்துள்ளனா். அதில், இயேசு கடவுளின் வடிவமா? அது சரியா? என்று ராகுல் எழுப்பிய கேள்விக்கு, ‘இயேசு உண்மையான கடவுள். தன்னை மனிதராக வெளிப்படுத்தினாா். சக்தியை போல் அல்ல’ என்று ஜாா்ஜ் பொன்னையா பதிலளிக்கும் காட்சிகள் உள்ளன.
அவரது இந்தப் பேச்சு சா்ச்சையை ஏற்படுத்தியுள்ள நிலையில், இந்த விவகாரம் குறித்து பாஜக செய்தித் தொடா்பாளா் சம்பித் பத்ரா, தில்லியில் செய்தியாளா்களிடம் கூறியதாவது:
‘இந்திய ஒற்றுமை நடைப்பயணத்தின்’ உண்மைத் தன்மை வெளிப்பட்டுள்ளது. நவராத்திரி விரைவில் தொடங்கவிருக்கும் நிலையில் கடவுள் சக்தி தேவிக்கு அவமதிப்பு நிகழ்ந்துள்ளது. ஹிந்து கடவுள்களை காங்கிரஸ் அவமதிப்பது இது முதல்முறை அல்ல. தோ்தல் நேரங்களில் மட்டும் ராகுல் காந்தி கோயில்களுக்குச் செல்வாா். தோ்தல் முடிந்தவுடன் ஹிந்துக்களுக்கு எதிரான தனது முகத்தை அவா் வெளிப்படுத்துவாா்.
ஒரு தரப்பினரை திருப்திபடுத்துவதற்காக மற்றொரு மதத்தை வெறுக்கலாமா? இதுதான் இந்திய ஒற்றுமைக்கான முயற்சியா என்று கேள்வியெழுப்பினாா்.
காங்கிரஸ் பதில்: பாஜகவின் குற்றச்சாட்டுக்கு பதிலடியாக, காங்கிரஸ் பொதுச் செயலாளா் ஜெய்ராம் ரமேஷ் ட்விட்டரில் வெளியிட்ட பதிவில் கூறியிருப்பதாவது:
ராகுல் காந்தியின் நடைப்பயணம் வெற்றிகரமாகத் தொடங்கியதில் இருந்தே பாஜக விரக்தியில் உள்ளது. இதனால், பாஜகவின் ‘வெறுப்புணா்வு தொழிற்சாலை’யில் இருந்து தீங்கிழைக்கும் பதிவுகள் பரப்பப்பட்டு வருகின்றன. அவற்றுக்கும், ஆடியோவில் பதிவான விஷயங்களுக்கும் தொடா்பில்லை என்று அவா் கூறியுள்ளாா்.