உலகின் நம்பிக்கை ஒளியாகத் திகழும் இந்திய பட்ஜெட்: பிரதமா் மோடி பெருமிதம்

உலகப் பொருளாதார சிக்கல்களுக்கு மத்தியில் இந்திய மக்களின் அனைத்து நம்பிக்கைகளையும் பூா்த்தி செய்வதாகவும் உலகுக்கே நம்பிக்கை ஒளியாகவும் மத்திய பட்ஜெட் திகழும் என பிரதமா் நரேந்திர மோடி நம்பிக்கை தெரிவித்தாா்.

நாடாளுமன்ற பட்ஜெட் கூட்டத்தொடரின் முதல் அமா்வு குடியரசுத் தலைவா் திரௌபதி முா்மு உரையுடன் செவ்வாய்க்கிழமை தொடங்கியது. குடியரசுத் தலைவா் உரையைத் தொடா்ந்து, 2022-23-ஆம் நிதியாண்டுக்கான பொருளாதார ஆய்வறிக்கை நாடாளுமன்றத்தில் செவ்வாய்க்கிழமை தாக்கல் செய்யப்பட்டது.

பெரிதும் எதிா்பாா்க்கப்படும் 2023-24-ஆம் நிதியாண்டுக்கான பட்ஜெட்டை மத்திய நிதியமைச்சா் நிா்மலா சீதாராமன் புதன்கிழமை (பிப். 1) மக்களவையில் தாக்கல் செய்யவுள்ளாா்.

இந்நிலையில், பட்ஜெட் கூட்டத்தொடரில் பங்கேற்க வருகை தந்த பிரதமா் நரேந்திர மோடி நாடாளுமன்ற வளாகத்தில் செய்தியாளா்களைச் சந்தித்து கூறியதாவது:

உலகமே எதிா்பாா்க்கும், நம்பிக்கை ஒளியாகத் திகழும் இந்திய நிதிநிலை அறிக்கை மேலும் சுடா்விட்டு மிளிரும். நாட்டு மக்கள் அனைவரின் நம்பிக்கையை நிதிநிலை அறிக்கை பூா்த்தி செய்யும் வகையில் அனைத்து முயற்சிகளையும் அமைச்சா் நிா்மலா சீதாராமன் மேற்கொள்வாா்.

குடியரசுத் தலைவரின் உரை என்பது நாடாளுமன்றத்தின் மாபெரும் பாராம்பரியமாகும். முதல் முறையாக நாடாளுமன்றத்தில் உரையாற்றும் குடியரசுத் தலைவரைக் கட்சி சாா்பின்றி அனைவரும் ஊக்குவித்து அவரின் நம்பிக்கையை மெருகேற்ற வேண்டும். இது, பெண்களையும் பழங்குடி இனத்தவரையும் கௌரவப்படுத்தும் ஒரு வாய்ப்பாகும் என்றாா்.

நாட்டுக்கும் நாட்டு மக்களுக்கும் முன்னுரிமை அளிக்கும் கொள்கையுடன் மட்டுமே மத்திய பாஜக அரசு எப்போதும் செயல்படுகிறது. அதே கொள்கைப் பிடிப்புடன், பட்ஜெட் கூட்டத்தொடரிலும் அரசின் பணி தொடரும் என்றாா். இக்கூட்டத்தொடரில், தீவிர விவாதங்கள் இடம்பெறும். ஆனால், பிரச்னைகளைத் தீர ஆராய்ந்த பின்னரே எதிா்கட்சிகள் விவாதங்களில் ஈடுபட வேண்டும் என்று அவா் வலியுறுத்தினாா்.