ஹோலி கொண்டாட்டத்தில் வெளிநாட்டு பெண்ணிடம் அத்துமீறல்: தில்லி போலீஸாா் விசாரணை

 தில்லியில் ஹோலி கொண்டாட்டத்தின்போது வெளிநாட்டு பெண்ணிடம் சில ஆண்கள் கூட்டமாக சூழ்ந்து அத்துமீறிய சம்பவம் குறித்து தில்லி போலீஸாா் விசாரித்து வருகின்றனா்.

இதுதொடா்பான விடியோ இணையத்தில் வேகமாக பரவி வருகிறது. அதில் சில ஆண்கள் கூட்டமாக சூழ்ந்து கொண்டு வெளிநாட்டு பெண்ணின் விருப்பமில்லாமல் தலையில் முட்டையை உடைத்தும், வண்ணங்கள் பூசும் காட்சி இடம்பெற்றுள்ளது.

இதுதொடா்பாக தில்லி மகளிா் ஆணையத்தின் தலைவா் சுவாதி மாலிவால் தில்லி போலீஸாருக்கு நோட்டீஸ் அனுப்பி உள்ளாா். அதில், இந்த விடியோவை ஆய்வு செய்து, பெண்ணிடம் பாலியல் சீண்டலில் ஈடுபட்டவா்களை கைது செய்ய வேண்டும் என்று மாலிவால் கேட்டுக் கொண்டுள்ளாா்.

ஹோலி பண்டிகையின்போது இதுபோன்ற சம்பவம் நடைபெற்றுள்ளது வெட்கக்கேடானது என்றும் அவா் தெரிவித்துள்ளாா்.

தேசிய மகளிா் ஆணையத்தின் தலைவா் ஷா்மா ரேகாவும் தில்லி போலீஸாருக்கு கடிதம் எழுதியுள்ளாா். அதில், இந்தச் சம்பவம் தொடா்பாக உடனடியாக வழக்குப் பதிவு செய்து விசாரணை நடத்தி விரிவான அறிக்கையை தாக்கல் செய்ய வேண்டும் என்று தெரிவித்துள்ளாா்.

இதுதொடா்பாக தில்லி காவல் துறை துணை ஆணையா் சஞ்சய் குமாா் ஜெயின் கூறுகையில், ‘பகாா்கஞ் பகுதியில் இந்த விடியோ எடுக்கப்பட்டதாக தெரிகிறது. இது அண்மையில் நடந்த சம்பவமா அல்லது பழையதா என்று ஆய்வு செய்யப்பட்டு வருகிறது.

இந்தச் சம்பவம் தொடா்பாக எந்தவித புகாரும் இதுவரை பதிவாகவில்லை. பாதிக்கப்பட்ட பெண் ஜப்பான் நாட்டு பயணியாக இருக்கலாம் என்பதால் அந்நாட்டு தூதரகத்திலும் விசாரித்தோம். அங்கும் எந்தப் புகாரும் பதிவாகவில்லை’ என்றாா்.