தில்லியில் காங்கிரஸ் தனித்துப்போட்டி! ஆம் ஆத்மி மீது நம்பிக்கையின்மை?

மக்களவைத் தேர்தலில் தில்லியில் தனித்துப் போட்டியிட காங்கிரஸ் கட்சி முடிவு செய்துள்ளது. இதன்மூலம் ஆம் ஆத்மி உடன் கூட்டணி அமைக்காமல் தில்லியிலுள்ள 7 மக்களவைத் தொகுதிகளிலும் காங்கிரஸ் நேரடியாக களமிறங்க திட்டமிட்டுள்ளது. 

தில்லியில் காங்கிரஸ் தலைவர் மல்லிகார்ஜுன கார்கே தலைமையில் ஆலோசனைக் கூட்டம் நடைபெற்றது. இதில் ராகுல் காந்தி உள்ளிட்ட பல முக்கியத் தலைவர்கள் கலந்துகொண்டனர். இந்தக் கூட்டத்தின் முடிவில் தில்லியிலுள்ள 7 மக்களவைத் தொகுதிகளிலும் காங்கிரஸ் தனித்துப் போட்டியிட முடிவு செய்துள்ளது. 

இது தொடர்பாக பேசிய காங்கிரஸ் தலைவர் அல்கா லம்பா, மக்களவைத் தேர்தலுக்கு தயாராவது தொடர்பாக கூட்டத்தில் ஆலோசிக்கப்பட்டது. முடிவில் தில்லியின் 7 இடங்களிலும் காங்கிரஸ் வேட்பாளர்களை நிறுத்த முடிவு செய்யப்பட்டது. தேர்தலுக்கு இன்னும் 7 மாதங்களே உள்ளன. இதனால், எங்கள் கட்சி வேட்பாளரையே நிறுத்த முடிவு செய்துள்ளோம் எனக் குறிப்பிட்டார். 

காங்கிரஸ் கட்சியின் இந்த முடிவுக்கு ஆம் ஆத்மி கட்சி அதிருப்தி தெரிவித்துள்ளது.