கர்நாடக தேர்தல் காலை வாருமா, வாகை சூடுமா? வாரிசுகளின் நிலை என்ன?

கர்நாடக சட்டப்பேரவைத் தேர்தலில் பதிவான வாக்குகள் சனிக்கிழமை காலை முதல் எண்ணப்பட்டு வருகின்றன. இந்த தேர்தலில் போட்டியிட்ட முக்கிய கட்சித் தலைவர்களின் மகன்களின் நிலை என்ன என்பது தொடர்பான ஒரு கண்ணோட்டம்.

தற்போதைய நிலவரப்படி, காங்கிரஸ் கட்சி 119 இடங்களிலும், பாஜக 73 இடங்களிலும், மஜத 25 இடங்களில் முன்னிலையில் உள்ளன. 

தொடர்ந்து வாக்குகள் எண்ணப்பட்டு, முடிவுகள் அறிவிக்கப்பட்டு வரும் நிலையில், தேர்தலில் போட்டியிட்ட வாரிசுகளின் நிலை என்ன என்பதைப் பார்க்கலாம்.

குமாரசாமியின் மகன்
கர்நாடக மாநிலம் ராமநகர தொகுதியில், முன்னாள் முதல்வரும், மதச்சார்பற்ற ஜனதா தளம் கட்சியின் தலைவருமான எச்.டி. குமாரசாமியின் மகன் நிகில் குமாரசாமி போட்டியிட்டார். இந்தத் தொகுதியில் காங்கிரஸ் வேட்பாளர் இக்பால் உகேன், பாஜக வேட்பாளர் கௌதம் மாரிலிங்ககௌடா ஆகியோர் போட்டியிட்டனர்.

தற்போதைய நிலவரப்படி, ராமநகர தொகுதியில் நிகில் குமாரசாமி பின்னடைவில் உள்ளார். இக்பால் உசேன் கிட்டத்தட்ட 10 ஆயிரம் வாக்குகள் வித்தியாசத்தில் முன்னிலையில் உள்ளனார். இதனால், இவரது வெற்றி ஓரளவுக்கு உறுதியாகிவிட்டதாகவே கூறப்படுகிறது.

கடந்த 2018ஆம் ஆண்டு சட்டப்பேரவைத்தேர்தலில் இக்பாலை தோற்கடித்து குமாரசாமி வெற்றிபெற்றிருந்தார். இந்த தேர்தலில் அவருக்கு பதிலாக இந்தத் தொகுதியில் அவரது மகனை களமிறக்கினார். ஆனால், அவர் எதிர்பாராத வகையில், நிகில் பின்னடைவை சந்தித்துள்ளார். 

அடுத்து, எடியூரப்பாவின் மகன்
முன்னாள் முதல்வரும், பாஜக மூத்த தலைவருமான பி.எஸ். எடியூரப்பாவின் மகன் பி.ஒய். விஜயேந்திரா, கர்நாடக சட்டப்பேரவைத் தொகுதியில் போட்டியிட்டார். ஷிகாரிபுரா தொகுதியில் போட்டியிட்ட பி.ஒய். விஜயேந்திரா முன்னிலையில் உள்ளார். அங்கு போட்டியிட்ட காங்கிரஸ் வேட்பாளர் கோனி குறைந்த வாக்குகள் பெற்று பின்னடைவை சந்தித்துள்ளார். எனவே, இங்கு கிட்டத்தட்ட விஜயேந்திராவின் வெற்றி உறுதியாகியிருக்கிறது என்று கருதப்படுகிறது.

மல்லிகார்ஜுன கார்கே மகன்
காங்கிரஸ் கட்சியின் தலைவர் மல்லிகார்ஜுன கார்கேவின் மகன் பிரியங்க் கார்கே கர்நாடக மாநிலம் சித்தாப்பூர் தொகுதியில் போட்டியிட்டார். இந்த தொகுதியில் இதுவரை வெளியான நிலவரப்படி பிரியங்க் கார்கே முன்னிலையில் உள்ளார். பாஜக வேட்பாளர் மணிகண்ட் ரத்தோட்டைவிடவும் அவர் கிட்டத்தட்ட 9000 வாக்குகள் அதிகம் பெற்று முன்னிலையில் உள்ளார். 

2013 மற்றும் 2018 தேர்தல்களிலும் பிரியங்க் கார்கே இந்தத் தொகுதியில் வெற்றி பெற்று தொடர்ச்சியாக எம்எல்ஏவாக இருக்கிறார் என்பது குறிப்பிடத்தக்கது.