ஜம்மு காஷ்மீர் சட்டப் பேரவைத் தேர்தலுக்கான முதல்கட்ட வேட்பாளர் பட்டியலை தேசிய மாநாட்டுக் கட்சி செவ்வாய்க்கிழமை வெளியிட்டுள்ளது.
இந்தியா கூட்டணியில் உள்ள முக்கியக் கட்சிகளான காங்கிரஸ் மற்றும் தேசிய மாநாட்டுக் கட்சிகளிடையே தொகுதிப் பங்கீடு நேற்று நிறைவு பெற்றது.
முதல்கட்ட வாக்குப்பதிவு செப்டம்பர் 18ஆம் தேதி நடைபெறவுள்ள நிலையில் நாளையுடன் வேட்புமனுத் தாக்கல் நிறைவு பெறுகிறது.
இந்த நிலையில், தேசிய மாநாட்டுக் கட்சி சார்பில் போட்டியிடும் முதல் 32 வேட்பாளர்களின் பெயர்கள் வெளியிடப்பட்டுள்ளது.
கந்தர்பால் தொகுதியில் முன்னாள் முதல்வரும் கட்சியின் துணைத் தலைவருமான உமர் அப்துல்லாவும், ஜாதிபாலை தொகுதியில் கட்சியின் மூத்த தலைவர் தன்வீர் சாதிக்கும் போட்டியிடுகின்றனர்.
ஜம்மு காஷ்மீரில் சட்டப் பேரவைத் தேர்தல் 3 கட்டங்களாக நடைபெறுகிறது. செப்டம்பர் 18, 25, அக்டோபர் 1 ஆகிய தேதிகளில் அங்கு மொத்தமுள்ள 90 தொகுதிகளில் வாக்குப்பதிவு நடைபெற உள்ளது. அக்டோபர் 4 ஆம் தேதி வாக்கு எண்ணிக்கை நடைபெற உள்ளது.
இந்தியா கூட்டணியில் இடம்பெற்றுள்ள தேசிய மாநாட்டுக் கட்சி 51 இடங்களிலும், காங்கிரஸ் 32 இடங்களிலும் போட்டியிடுவதாக அறிவித்துள்ளன. இந்தியா கூட்டணியில் அங்கம் வகிக்கும் இந்திய கம்யூனிஸ்ட் கட்சி 1 இடத்திலும், பாந்தர்ஸ் கட்சி 1 இடத்திலும் போட்டியிடுகின்றன.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.
