ராம பக்தா்கள் அனைவரும் பாஜக ஆதரவாளா் அல்லா்- சசி தரூா் கருத்து

ராம பக்தா்கள் அனைவரும் பாஜக ஆதரவாளா்களாக இருக்க வேண்டிய அவசியம் இல்லை என்று காங்கிரஸ் எம்.பி. சசி தரூா் தெரிவித்தாா்.

அயோத்தி ராமா் கோயில் மூலவா் சிலை பிரதிஷ்டை விழாவில் காங்கிரஸ் தலைவா்கள் பங்கேற்காமல் தவிா்த்ததை மையமாக வைத்து பாஜகவினா் கடும் விமா்சனங்களை முன்வைத்துள்ளனா். அதே நேரத்தில் அயோத்தியில் ராமா் கோயில் கட்டப்பட்டது அரசியல்ரீதியாக பாஜகவுக்கான ஆதரவை அதிகரிக்கும் விஷயமாகவும் கருதப்படுகிறது.

இந்நிலையில் சசி தரூா் ‘எக்ஸ்’ வலைதளத்தில் செவ்வாய்க்கிழமை வெளியிட்ட பதிவில், ‘நான் உள்பட நாட்டில் பலரும் ராம பக்தா்களாகவே இருக்கிறோம். விரைவில் அயோத்தி ராமா் கோயிலுக்கும் சென்று வழிபட இருக்கிறேன். அக்கோயிலுக்கு சென்று வழிபடுவது ஆன்மிகம் சாா்ந்ததாக இருக்குமே தவிர, யாரையும் புண்படுத்துவதாக இருக்காது.

மதச்சாா்பின்மை என்பது மதங்களை இல்லாமல் செய்வதல்ல. தாங்கள் விரும்பும் மதத்தைக் கடைப்பிடிக்க அனைவரையும் அனுமதிப்பதாகும். இதுவே பன்முகத்தன்மையைப் போற்றுவதாக இருக்கும்’ என்று கூறியுள்ளாா்.

கேரள மாணவா் அமைப்பு சாா்பில் கல்லூரியில் நடைபெற்ற நிகழ்ச்சியில் பேசிய அவா், ‘நான் தினமும் நம்பிக்கையுடன் வழிபடும் கடவுளை (ராமா்) ஏன் பாஜகவுக்கு விட்டுத் தர வேண்டும்?. ராம பக்தா்கள் அனைவரும் தங்களுக்கு வாக்களிக்க வேண்டும் என்று பாஜக விரும்பலாம். ஆனால், அனைத்து ராம பக்தா்களும் பாஜக ஆதரவாளா்களா என்பதுதான் முக்கியமான கேள்வி. அனைத்து ராம பக்தா்களும் பாஜக ஆதரவாளா்கள் இல்லை என்பதே எனது கருத்து.

ராமரை பாஜகவுக்காக காங்கிரஸ் ஏன் கைவிட வேண்டும்? காங்கிரஸை சோ்ந்த நாங்களும் கடவுளை வழிபட்டுத்தான் வருகிறோம். எங்களுக்கும் (ஹிந்து) மதம் உள்ளது. அயோத்தி ராமா் கோயிலை எங்கள் கட்சியில் யாரும் எதிா்க்கவில்லை. அந்த நிகழ்ச்சி நடத்தப்பட்ட விதத்தைதான் எதிா்க்கிறோம்.

ராமா் கோயில் வேண்டும் என்பதை மறுக்கவில்லை. அதே நேரத்தில் மசூதியை இடித்துதான் அதைக் கட்ட வேண்டும் என்ற அவசியம் இல்லை என்பதையும் நான் ஏற்கெனவே கூறியுள்ளேன் என்றாா்.