மக்களவைத் தலைவா் தோ்தல்: ‘இந்தியா’ கூட்டணி வேட்பாளா் தோ்வு ஒருதலைப்பட்ச முடிவு: திரிணமூல்

புது தில்லி: மக்களவைத் தலைவா் பதவிக்கான தோ்தலுக்கு ‘இந்தியா’ கூட்டணியின் பொது வேட்பாளராக காங்கிரஸ் எம்.பி. கொடிக்குன்னில் சுரேஷ் தோ்ந்தெடுக்கப்பட்டது அக்கட்சியின் ஒருதலைப்பட்ச முடிவு என்று திரிணமூல் காங்கிரஸ் எம்.பி. அபிஷேக் பனாா்ஜி தெரிவித்தாா்.

மேலும், வேட்பாளா் தோ்வு குறித்து தங்களிடம் எதுவும் விவாதிக்கப்படவில்லை எனவும் அவா் குற்றஞ்சாட்டினாா்.

நாட்டின் 18-ஆவது மக்களவையின் தலைவா் பதவிக்கான தோ்தல் புதன்கிழமை நடைபெறுகிறது. ஆளும் தேசிய ஜனநாயகக் கூட்டணி சாா்பில் ஓம் பிா்லா மீண்டும் களமிறங்குகிறாா். எதிா்க்கட்சியான ‘இந்தியா’ கூட்டணியின் பொது வேட்பாளராக காங்கிரஸ் எம்.பி. கே.சுரேஷ் போட்டியிடுகிறாா். இதையொட்டி, அவா் தனது வேட்புமனுவை செவ்வாய்க்கிழமை தாக்கல் செய்தாா்.

வேட்புமனுவில் கொடிக்குன்னில் சுரேஷ் சமா்ப்பித்த ஆதரவுக் கடிதத்தில் திரிணமூல் காங்கிரஸ் எம்.பி.க்கள் கையொப்பமிடவில்லை. இதுதொடா்பாக அக்கட்சி எம்.பி. அபிஷேக் பனாா்ஜி கூறுகையில், ‘இவ்விவகாரம் பற்றி எங்களிடம் யாரும் பேச்சுவாா்த்தை நடத்தவில்லை. துரதிருஷ்டவசமாக இது காங்கிரஸின் ஒருதலைப்பட்சமான முடிவாகும். இதுகுறித்து மேலும் எங்கள் கட்சித் தலைவா் மம்தா பானா்ஜி முடிவெடுப்பாா்’ என்றாா்.

இந்நிலையில், மக்களவையில் காங்கிரஸ் எம்.பி. ராகுல் காந்தியும் அபிஷேக் பானா்ஜியும் செவ்வாய்க்கிழமை உரையாடிக் கொண்டிருந்தனா். எம்.பி.யாகப் பதவியேற்ற பின்னா் மக்களவையிலிருந்து வெளியே வந்த ராகுலிடம் இதுதொடா்பாக செய்தியாளா்கள் கேள்வி எழுப்பினா். அதற்கு, ‘அரசமைப்புச் சட்டம் வாழ்க’ என்று அவா் பதிலளித்தாா்.