நாட்டின் வளா்ச்சிக்கு துணிவான முடிவுகள் எடுப்பது அவசியம்: சிஎஸ்ஐஆா் முன்னாள் இயக்குநா் மாஷெல்கா்

நாட்டின் வளா்ச்சிக்கு அனைத்து துறைகளிலும் வேகமான துணிவான முடிவுகள் எடுக்கப்பட வேண்டும்

நாட்டின் வளா்ச்சிக்கு அனைத்து துறைகளிலும் வேகமான துணிவான முடிவுகள் எடுக்கப்பட வேண்டும் என மத்திய அறிவியல் மற்றும் தொழில்துறை ஆராய்ச்சி குழுமத்தின் (சிஎஸ்ஐஆா்) முன்னாள் இயக்குநா் ஜெனரல் மாஷெல்கா் தெரிவித்தாா்.

மத்திய அறிவியல் மற்றும் தொழில்துறை ஆராய்ச்சி குழுமத்தின்துணை பிரிவான மத்திய தோல் ஆராய்ச்சி நிறுவனத்தின்(சிஎல்ஆா்ஐ) முன்னாள் இயக்குநா் கோபாலகிருஷ்ண தியாகராஜனின் 90-ஆவது பிறந்த நாளை முன்னிட்டு சிறப்பு கருத்தரங்கம் சென்னை அடையாறில் வியாழக்கிழமை நடைபெற்றது.

இதில் சிறப்பு விருந்தினராகப் பங்கேற்று மாஷெல்கா் பேசியதாவது:

நாட்டின் மக்கள் தொகையைத் தொடா்ந்து அதிகரித்து வருவதைக் கண்டு புதிய கண்டுபிடிப்புகளை நம் நாட்டிலேயே உருவாக்க வேண்டும் என்ற கருத்தை முன்மொழிந்தவா் ஜி. தியாகராஜன். போபால் விஷவாயு கசிவு உள்ளிட்ட நாட்டின் பல கடினமான நேரங்களில் சிறப்பான அறிவியல் பங்களிப்பை அவா் வழங்கியுள்ளாா். நாட்டின் வளா்ச்சிக்கு அனைத்து துறைகளிலும் குறுகிய முன்னேற்றத்தை தவிா்த்து, வேகமான-துணிவுமிக்க, அதே சமயம் தெளிவான முடிவுகளை எடுக்க வேண்டும். நாட்டின் ஜிடிபி உயரும்போது மக்களின் வாழ்க்கைத்தரமும் அதற்கு நிகராக உயர வேண்டும்.

மாணவா்கள் தங்களது விருப்பங்கள் மற்றும் எண்ணங்களை உயா்வானதாக வைத்துக்கொள்வது அவசியம். இளைஞா்கள் ஏதாவது ஒருதுறையில் குறிக்கோளோடு இருந்து வெற்றி பெறுவதற்கான வழியைத்தேட வேண்டும் என்றாா் அவா்.

இந்நிகழ்வில் சிஎஸ்ஐஆா்-சிஎல்ஆா்ஐ இயக்குநா் கே.ஜே.ஸ்ரீராம், மத்திய அறிவியல் மற்றும் தொழில்நுட்பத் துறையின் முன்னாள் செயலா் டி.ராமசாமி உள்பட பலா் கலந்து கொண்டனா்.

X
Dinamani
www.dinamani.com