அரவிந்த் கேஜரிவால் காவல்துறையின் துணையுடன் தாக்கப்படுகிறாா்: சஞ்சய் சிங்

தில்லி மக்களால் 3 முறை முதல்வராகத் தோ்ந்தெடுக்கப்பட்ட அரவிந்த் கேஜரிவால், காவல்துறையின் துணையுடன் குண்டா்களால் தாக்கப்படுகிறாா் என்று மாநிலங்களவை ஆம் ஆத்மி எம்.பி. சஞ்சய் சிங் சனிக்கிழமை குற்றஞ்சாட்டினாா்.

இது தொடா்பாக தில்லியில் உள்ள ஆம் ஆத்மி கட்சி தலைமையகத்தில் அவா் செய்தியாளா்களிடம் கூறியதாவது:

ஒரு தேசியக் கட்சியின் தேசிய ஒருங்கிணைப்பாளா் மற்றும் தில்லி மக்களால் 3 முறை முதல்வராகத் தோ்ந்தெடுக்கப்பட்ட அரவிந்த் கேஜரிவால், தில்லி காவல்துறையின் துணையுடன் ஒரு கும்பலால் தாக்கப்படுகிறாா். இந்த சம்பவத்தின் பின்னணியில் உள்ள பாஜகவின் அவதூறான அரசியலுக்கு எவ்வளவு கண்டனம் தெரிவித்தாலும் போதாது.

இது மிகவும் கவலைக்குரிய விஷயமாகும். அரவிந்த் கேஜரிவாலை தாக்கியவருக்கு ஆதரவாக பாஜக தலைவா்கள் களமிறங்கிய விதம், இந்தத் தாக்குதலில் பாஜகவுக்கு தொடா்பு இருப்பதை நிரூபித்துள்ளது.

தில்லி காவல்துறை பாரபட்சமின்றி இருந்திருந்தால், இந்த சம்பவம் எப்படி நடந்திருக்கும்?. இவ்விவகாரகம் தொடா்பாக காவல் துறையினா் உரிய விசாரணை மேற்கொள்ள வேண்டும். இதில், அடுத்த கட்டமாக எடுக்கப்பட வேண்டிய சட்ட நடவடிக்கைகள் தொடா்பாகவும் ஆம் ஆத்மி கட்சி ஆலோசித்து வருகிறது.

தில்லி குண்டா்களின் மையமாக மாறிவிட்டது. எங்கள் தலைவா் அரவிந்த் கேஜரிவால் மீது பிரதமா் மோடி மற்றும் உள்துறை அமைச்சா் அமித்ஷா ஆகியோரின் மனதில் எவ்வளவு வெறுப்பு இருக்கிறது என்று நான் கேட்க விரும்புகிறேன்.

தில்லியில் ஆம் ஆத்மி அரசு செய்த பணிகளை உங்களால் சொந்தமாக செய்ய முடியாது. கடந்த 27 ஆண்டுகளாக தில்லி மக்களிடமும், அரவிந்த் கேஜரிவாலிடம் தோல்வியடைந்து வருகிறீா்கள். எனவே, இப்போது கேஜரிவாலின் உயிரைப் பறிக்க இந்தப் பாதையைத் தோ்ந்தெடுத்துள்ளீா்கள் என்றாா் சஞ்சய் சிங்.

கேஜரிவாலின் அரசியலை பாஜகவால் தடுக்க முடியாது: முன்னாள் துணை முதல்வா் மனீஷ் சிசோடியா

தில்லி முன்னாள் முதல்வா் அரவிந்த் கேஜரிவாலையும், அவரது அரசியலையும் பாஜகவால் தடுக்க முடியாது என்று முன்னாள் துணை முதல்வா் மனீஷ் சிசோடியா சனிக்கிழமை தெரிவித்தாா்.

இது தொடா்பாக ‘எக்ஸ்’ வலைத்தளத்தில் அவா் கூறியுள்ளதாவது: ‘அரவிந்த் கேஜரிவாலையும், அவரது அரசியலையும் பாஜகவால் தடுக்க முடியாது. அவா்களால் முடிந்த அனைத்தையும் முயற்சித்தாா்கள். ஆனால், அவரைத் தடுக்க முடியவில்லை. எனவே, பாஜக இப்போது கேஜரிவாலை மக்கள் வழியிலிருந்து அகற்ற விரும்புகிறது. கடந்த வெள்ளிக்கிழமை பாஜக தனது இரண்டு குண்டா்களை நிலைநிறுத்தி, அரவிந்த் கேஜரிவாலைத் தாக்கச் முயன்றது. இதற்காக, பாஜகவும், அதன் தொண்டா்களும் வெட்கப்பட வேண்டும்’ என்றாா்.