மீண்டும் வாக்குச் சீட்டு முறைக்கு திரும்புவது வாக்குச்சாவடி கைப்பற்றுதலுக்கு வழிவகுக்கும்: எதிா்க்கட்சிகளுக்கு பாஜக பதிலடி

மீண்டும் வாக்குச் சீட்டு முறைக்கு திரும்புவது என்பது வாக்குச்சாவடிகள் கைப்பற்றப்படும் காலகட்டத்துக்கு திரும்புவதாகும் என்று எதிா்க்கட்சிகளுக்கு பாஜக பதிலடி கொடுத்துள்ளது.

மக்களவையில் தோ்தல் சீா்திருத்தங்கள் தொடா்பான விவாதம் செவ்வாய்க்கிழமை தொடங்கியது. புதன்கிழமையும் தொடா்ந்த இந்த விவாதத்தில், வாக்குப்பதிவு இயந்திரங்கள் மீதான எதிா்க்கட்சி எம்.பி.க்களின் குற்றச்சாட்டுகளுக்கு பதிலடி கொடுத்து, பாஜக மூத்த எம்.பி.யும், முன்னாள் மத்திய சட்ட அமைச்சருமான ரவிசங்கா் பிரசாத் பேசியதாவது:

தோ்தலில் வாக்குப்பதிவு இயந்திரங்களின் பயன்பாட்டை உறுதிப்படுத்தும் உச்சநீதிமன்ற-உயா்நீதிமன்றத் தீா்ப்புகள் பல உள்ளன. எனவே, மீண்டும் வாக்குச் சீட்டு முறைக்கு திரும்புவது குறித்து எதிா்க்கட்சிகள் பேசக் கூடாது.

வாக்குப்பதிவு இயந்திரங்களில் ஊடுருவ முடியுமா என்பதை பரிசோதிக்கும் ஆய்வுக்கு வரும்படி, எதிா்க்கட்சிகளுக்கு தோ்தல் ஆணையம் அழைப்பு விடுத்தது. அப்போது வராத எதிா்க்கட்சிகள், இப்போது கூச்சலிடுகின்றன.

சமீபத்திய பிகாா் தோ்தலில் தொகுதிகள்தோறும் தோராயமாக தோ்ந்தெடுக்கப்பட்ட 5 வாக்குப்பதிவு நிலையங்களில் வாக்கு ஒப்புகைச் சீட்டு சரிபாா்ப்பு கட்டாய அடிப்படையில் மேற்கொள்ளப்பட்டது. வாக்கு எண்ணிக்கையில் எந்த இடத்திலும் குறைபாடு கண்டறியப்படவில்லை.

இத்தோ்தலுக்கு முன் வாக்குத் திருட்டு குற்றச்சாட்டை தீவிரமாக எழுப்பிய எதிா்க்கட்சிகள், வாக்கு எண்ணிக்கைக்குப் பிறகு எந்த புகாரையும் தெரிவிக்கவில்லை. வாக்குப்பதிவு இயந்திரங்கள் மூலமே தோ்தலை வெளிப்படையாகவும், விரைவாகவும் மேற்கொள்ள முடியும்.

கடந்த 2004 முதல் 5 மக்களவைத் தோ்தல்களில் வாக்குப்பதிவு இயந்திரங்கள் பயன்படுத்தப்பட்டுள்ளன. இது பெரும் சாதனையாகும். காங்கிரஸ் கட்சி நாட்டு மக்களின் நம்பிக்கையை வெல்வதற்கு பதிலாக, தோ்தல் ஆணையம் மீது தனது விரக்தியை வெளிப்படுத்தக் கூடாது. உங்கள் கட்சியை வலுப்படுத்துங்கள். அடுத்த 15-20 ஆண்டுகளுக்கு பாஜக ஆட்சி தொடரும். எனவே, உங்களுக்கு எந்தக் கவலையும் தேவையில்லை என்றாா் ரவிசங்கா் பிரசாத்.

பிரதமரை நம்ப முடியாதா?: தலைமைத் தோ்தல் ஆணையா், தோ்தல் ஆணையா்களின் தோ்வுக் குழுவில் இருந்து உச்சநீதிமன்ற தலைமை நீதிபதி நீக்கப்பட்டது தொடா்பாக மத்திய சட்ட அமைச்சா் விளக்கமளிக்க வேண்டுமென காங்கிரஸ் மூத்த எம்.பி. கே.சி.வேணுகோபால் கோரிய நிலையில், ‘அணு ஆயுதங்களைக் கட்டுப்படுத்தும் பொறுப்பையே பிரதமா் தலைமையிலான தோ்ந்தெடுக்கப்பட்ட அரசிடம் வழங்கியுள்ள நிலையில், தோ்தல் ஆணையா் பதவிக்கு நல்ல நபா்களைத் தோ்வு செய்யும் பணியில் பிரதமரை நம்ப முடியாதா? அரசின் அனைத்து நடவடிக்கைகளிலும் நீதித் துறையை இணைக்க வேண்டுமா?’ என்று ரவிசங்கா் பிரசாத் கேள்வியெழுப்பினாா்.

‘இதயங்களில் ஊடுருவியவா் பிரதமா் மோடி’

மக்களவையில் ‘தோ்தல் சீா்திருத்தங்கள்’ விவாதத்தில் பங்கேற்றுப் பேசிய பாஜக எம்.பி.யும், நடிகையுமான கங்கனா ரணாவத், ‘தோ்தலில் வெல்ல வாக்குப்பதிவு இயந்திரங்களில் ஊடுருவ வேண்டிய அவசியம் பிரதமா் மோடிக்கு இல்லை; அவா் நாட்டு மக்களின் இதயங்களில்தான் ஊடுருவியுள்ளாா்’ என்றாா்.

‘மக்களவை விவாதத்தின்போது வெளிநாட்டு பெண் ஒருவரின் (பிரேசில் மாடல் அழகி) படத்தை எதிா்க்கட்சி எம்.பி.க்கள் காண்பித்தது விதிகளுக்கு புறம்பானது; அவரது தனிப்பட்ட உரிமைக்கு எதிரானது. மக்களவை சாா்பில் அந்தப் பெண்ணிடம் மன்னிப்புக் கோருகிறேன்’ என்றும் கங்கனா ரணாவத் தெரிவித்தாா்.

ஓம் பிா்லா அறிவுறுத்தல்

மக்களவையில் கேள்வி நேரத்தின்போது கேள்விகளை சுருக்கமாக எழுப்பும்படி, உறுப்பினா்களுக்கு அவைத் தலைவா் ஓம் பிா்லா புதன்கிழமை அறிவுறுத்தினாா்.

மக்களவையில் முதல் ஒரு மணிநேரம் கேள்விநேரமாகும். இதில், அரசின் செயல்பாடுகள் குறித்து உறுப்பினா்கள் கேள்வியெழுப்பி, அரசை பொறுப்புக் கூற செய்யலாம். அமைச்சா்கள் வாய்மொழியாக அல்லது எழுத்துபூா்வமாக பதிலளிக்கும் வகையில் கேள்விகளை எழுப்ப முடியும்.

புதன்கிழமை கேள்வி நேரத்தின்போது பேசிய பாஜக எம்.பி. தேவ்சிங் செளஹான், தூய்மை எரிசக்தி தொடா்பான அரசின் உறுதிப்பாட்டை குறிப்பிட்டு விரிவாக பேசினாா். அப்போது குறுக்கிட்ட அவைத் தலைவா் ஓம் பிா்லா, கேள்வியை சுருக்கமாக கேட்கும்படி அறிவுறுத்தியதுடன், கேள்விநேரத்தில் குறைந்தபட்சம் 20 கேள்விகள் எடுத்துக் கொள்ளப்பட வேண்டும் என்றாா்.