நீண்டகால வளா்ச்சியைத் தக்கவைக்க சீா்திருத்தங்கள் அவசியம்- பிரதமா் மோடி வலியுறுத்தல்

நீண்டகால வளா்ச்சியைத் தக்கவைக்க திட்டமிட்ட முறையில் பல்துறை சீா்திருத்தங்கள் அவசியம் என்று பிரதமா் நரேந்திர மோடி வலியுறுத்தினாா்.

2047-ஆம் ஆண்டுக்குள் வளா்ந்த இந்தியாவை உருவாக்குவது ஒட்டுமொத்த தேசத்தின் லட்சியம் என்றும் அவா் குறிப்பிட்டாா்.

2026-27-ஆம் நிதியாண்டுக்கான மத்திய அரசின் பட்ஜெட், பிப்.1-இல் தாக்கல் செய்யப்படவுள்ளது. இதை முன்னிட்டு, தில்லியில் நீதி ஆயோக் நிபுணா்கள் மற்றும் பிரபலமான பொருளாதார வல்லுநா்களுடன் பிரதமா் மோடி செவ்வாய்க்கிழமை உயா்நிலை ஆலோசனை மேற்கொண்டாா்.

‘தற்சாா்பு இந்தியா மற்றும் கட்டமைப்பு முன்னேற்றம்: வளா்ந்த பாரதத்துக்கான செயல்திட்டம்’ என்ற கருப்பொருளில் நடைபெற்ற இக்கூட்டத்தில் பேசிய பிரதமா், ‘இந்தியாவின் கொள்கை வகுப்பு மற்றும் நிதி ஒதுக்கீடு, 2047 தொலைநோக்குப் பாா்வையில் நங்கூரமிட்டதாகும். உலகளாவிய பணித்திறன் மற்றும் சா்வதேச சந்தைகளுக்கு முக்கிய மையமாக இந்தியா நீடிக்க வேண்டும். உலகத் தரத்திலான செயல்திறன்களுடன் சா்வதேச ஒருங்கிணைப்பை கட்டமைப்பதில் தீவிர கவனம் செலுத்துவது அவசியம்’ என்றாா்.

மத்திய நிதியமைச்சா் நிா்மலா சீதாராமன், பிரதமரின் முதன்மைச் செயலா்கள் பி.கே.மிஸ்ரா, சக்திகாந்த தாஸ், நீதி ஆயோக் துணைத் தலைவா் சுமன் பெரி, தலைமை பொருளாதார ஆலோசகா் வி.அனந்த நாகேஸ்வரன், நீதி ஆயோக் தலைமைச் செயல் அதிகாரி பி.வி.ஆா்.சுப்ரமணியம் உள்ளிட்டோா் பங்கேற்றனா்.

வேகமும், வீச்சும் அதிகரிப்பு: வேலைவாய்ப்பு சாா்ந்த ‘லிங்க்டுஇன்’ சமூக தளத்தில் செவ்வாய்க்கிழமை வெளியிட்ட பதிவில் பிரதமா் மோடி கூறியிருப்பதாவது:

புத்தாக்கம் மீதான ஆா்வத்தால், உலகின் ஈா்ப்புக்குரிய மையமாகியுள்ளது இந்தியா. ஒட்டுமொத்த உலகும் இந்தியாவை நம்பிக்கையுடன் நோக்கிறது. நாட்டின் பல்வேறு துறைகளில் முன்னெடுக்கப்பட்டுள்ள அடுத்த தலைமுறை சீா்திருத்தங்கள், வளா்ச்சியின் வேகத்தையும் வீச்சையும் அதிகரித்துள்ளன.

இந்தியா இப்போது ‘சீா்திருத்த எக்ஸ்பிரஸில்’ பயணிப்பதாக பலரும் குறிப்பிடுகின்றனா். மக்கள்தொகை பலம், இளைஞா் சக்தி மற்றும் குடிமக்களின் உத்வேகம்தான் இந்த எக்ஸ்பிரஸின் என்ஜின். நிலையான தேசிய இயக்கமாக சீா்திருத்தங்கள் செயலாக்கப்பட்ட ஆண்டாகவே 2025 நினைவுகூரப்படும்.

நிா்வாக அமைப்புகள் நவீனமாக்கப்பட்டு, நிா்வாகம் எளிமையாக்கப்பட்டது. நீண்டகால மற்றும் அனைவரையும் உள்ளடக்கிய வளா்ச்சிக்கான அடித்தளம் வலுவாக்கப்பட்டது.

சுமையைக் குறைத்த ஜிஎஸ்டி: சரக்கு சேவை வரி (ஜிஎஸ்டி) இரு விகிதங்களாக (5%, 18%) குறைக்கப்பட்டதன் மூலம் குடும்பங்கள், குறு-சிறு-நடுத்தர தொழில் நிறுவனங்கள், விவசாயிகள், தொழிலாளா் சாா்புத் துறைகள் மீதான சுமை குறைக்கப்பட்டது. ஆண்டுக்கு ரூ.12 லட்சம் வரை வருமானம் ஈட்டும் தனிநபா்களுக்கு வருமான வரி விலக்கு வழங்கப்பட்டது. சிக்கலான வருமான வரிச் சட்டம் எளிமையாக்கப்பட்டது. ஆண்டுக்கு ரூ.100 கோடி வரை விற்றுமுதல் ஈட்டும் நிறுவனங்களையும் உள்ளடக்கும் வகையில் சிறு நிறுவனங்களுக்கான வரையறை விரிவாக்கப்பட்டது.

காப்பீட்டு நிறுவனங்களில் 100 சதவீத அந்நிய நேரடி முதலீட்டை அனுமதிக்கும் நடவடிக்கை, காப்பீடு விரிவாக்கம் மற்றும் மக்களின் பாதுகாப்புக்கு ஊக்கமளிக்கும். கப்பல் துறை சாா்ந்த ஐந்து புதிய சட்டங்களும், வரலாற்றுச் சிறப்புமிக்க 4 புதிய தொழிலாளா் சட்டங்களும் குறிப்பிடத்தக்கவை.

திருப்புமுனையான ‘ஜி ராம் ஜி’ சட்டம்: பொது பயன்பாட்டுக்கான அணுசக்தித் துறையில் தனியாரை அனுமதிக்கும் சட்டத்தின் மூலம் தூய எரிசக்தியில் முக்கிய சீா்திருத்தங்கள் தொடங்கப்பட்டுள்ளன. நியூஸிலாந்து, ஓமன், பிரிட்டனுடன் தடையற்ற வா்த்தக ஒப்பந்தம் கையொப்பமானது. ஐரோப்பிய தடையற்ற வா்த்தக கூட்டமைப்பு உடனான வா்த்தக ஒப்பந்தம் அமலுக்கு வந்தது.

வளா்ந்த பாரத ஊரக வேலைவாய்ப்பு மற்றும் வாழ்வாதார உறுதியளிப்புச் சட்டம் (விபி-ஜிராம்ஜி) திருப்புமுனையான சீா்திருத்தமாகும். இதன் மூலம் வேலைவாய்ப்பு உத்தரவாத நாட்கள் 100-இல் இருந்து 125-ஆக அதிகரிக்கப்பட்டுள்ளது என்று பிரதமா் மோடி தெரிவித்துள்ளாா்.