பிகாா் தொகுதி ஒதுக்கீடு: பாஜக கூட்டணிக் கட்சிகள் அதிருப்தி

பிகாா் சட்டப்பேரவைத் தோ்தலில் ஆளும் கூட்டணியில் தங்கள் கட்சிகளுக்கு தலா 6 தொகுதிகள் மட்டுமே ஒதுக்கப்பட்டுள்ளது குறித்து மத்திய அமைச்சா் ஜிதன்ராம் மாஞ்சி தலைமையிலான ஹிந்துஸ்தானி அவாம் மோா்ச்சா, மாநிலங்களவை எம்.பி. உபேந்திர குஷ்வாஹா தலைமையிலான ராஷ்ட்ரீய லோக் மோா்ச்சா ஆகிய கட்சிகள் அதிருப்தி தெரிவித்துள்ளன.

பிகாரில் மொத்தமுள்ள 243 தொகுதிகளில் முதல்வா் நிதீஷ் குமாா் தலைமையிலான ஐக்கிய ஜனதா தளம் (ஜேடியு), பாஜக ஆகிய கட்சிகள் தலா 101 இடங்களில் போட்டியிட உள்ளன. மத்திய அமைச்சா் சிராக் பாஸ்வான் தலைமையிலான லோக் ஜனசக்தி (ராம்விலாஸ்) கட்சிக்கு 29 இடங்கள் ஒதுக்கப்பட்டுள்ளன. அதே நேரத்தில் கூட்டணியில் சிறிய கட்சிகளின் மாஞ்சி, குஷ்வாஹா தலைமையிலான கட்சிகளுக்கு தலா 6 தொகுதிகள் மட்டுமே அறிவிக்கப்பட்டன.

இது தொடா்பாக பிகாா் முன்னாள் முதல்வா் ஜிதன் ராம் மாஞ்சி செய்தியாளா்களிடம் கூறியதாவது:

கூட்டணித் தலைமை முடிவு செய்வதை நாங்கள் ஏற்றுக் கொண்டுதான் ஆக வேண்டும். ஆனால், 6 தொகுதிகள் மட்டுமே ஒதுக்கியதன் மூலம் எங்கள் கட்சியைக் குறைத்து மதிப்பிட்டுவிட்டாா்கள். இது தோ்தலில் கூட்டணிக்கு பாதிப்பை ஏற்படுத்த வாய்ப்புள்ளது என்றாா்.

முன்னதாக, தங்கள் கட்சிக்கு 15 தொகுதிகள் ஒதுக்க வேண்டும் என்றும், இதில் 8 தொகுதிகளில் வெற்றி பெற்று அங்கீகரிக்கப்பட்ட கட்சியாக உருவெடுப்போம் என்றும் மாஞ்சி கூறிவந்தாா்.

பிகாரில் சிராக் பாஸ்வான் போலவே மாஞ்சியும் தலித் தலைவராக உள்ளாா். சிராக் பாஸ்வான் கட்சிக்கு 29 தொகுதிகள் ஒதுக்கிவிட்டு தங்களுக்கு 6 தொகுதிகளை ஒதுக்கியதே மாஞ்சியின் அதிருப்திக்கு முக்கியக் காரணமாக உள்ளது. இப்போதைய பேரவையில் மாஞ்சி கட்சிக்கு 4 எம்எல்ஏக்கள் உள்ளனா். சிராக் பாஸ்வான் கட்சியில் ஒரு எம்எல்ஏகூட இல்லை என்பதும் குறிப்பிடத்தக்கது.

மற்றொரு கூட்டணிக் கட்சித் தலைவரான உபேந்திர குஷ்வாஹா, கட்சியினரிடம் பேசும் வகையில் ‘எக்ஸ்’ வலைதளத்தில் வெளியிட்ட பதிவில், ‘தொண்டா்களே, உங்களிடம் மன்னிப்பு கேட்டுக் கொள்கிறேன். நாம் எதிா்பாா்த்த அளவுக்கு நமது கட்சிக்கு தொகுதிகள் ஒதுக்கப்படவில்லை. நமது கட்சி சாா்பில் தோ்தலில் போட்டியிட ஆா்வத்துடன் இருந்த உங்களுக்கு இது ஏமாற்றமாக இருக்கும் என்பது தெரிகிறது. எனினும், இந்த விஷயத்தில் எனது சூழ்நிலையையும், கட்சியின் சூழ்நிலையையும் நீங்கள் புரிந்து கொள்ள வேண்டும். உங்கள் கோபத்தைக் குறைத்துக் கொள்ளுங்கள். இது எதனால் நோ்ந்தது என்பதை சிந்தித்துப் பாருங்கள். காலம் மற்றவற்றை முடிவு செய்யும்’ என்று கூறியுள்ளாா்.

சமாதானப்படுத்த முயற்சி: இதனிடையே, அதிருப்தியில் உள்ள கூட்டணிக் கட்சிகளை சமாதானப்படுத்த பாஜக, ஜேடியு கட்சிகள் முயற்சித்து வருகின்றன. அதன்படி, ஜேடியு செயல் தலைவா் சஞ்சய் குமாா் ஜா, மாநில அமைச்சரும், பாஜக மூத்த தலைவருமான நிதின் நபின் ஆகியோா் திங்கள்கிழமை ஆலோசனை நடத்தினா். அப்போது தங்கள் பங்கீட்டில் இருந்து கூட்டணிக் கட்சிகளுக்கு கூடுதல் தொகுதியை அளிப்பது, வெற்றிவாய்ப்பு அதிகமுள்ள தொகுதிகளை அவா்களுக்கு ஒதுக்குவது உள்ளிட்டவை குறித்து ஆலோசிக்கப்பட்டதாகத் தெரிகிறது.

காங்கிரஸ் கருத்து: பாஜக கூட்டணி தொகுதி ஒதுக்கீடு குறித்து கருத்துத் தெரிவித்த மாநில காங்கிரஸ் செய்தித் தொடா்பாளா் ராஜேஷ் ரத்தோா், ‘முதல்வா் நிதீஷ் குமாா் கட்சி போட்டியிடும் தொகுதி படிப்படியாக குறைந்து, பாஜக போட்டியிடும் தொகுதி அதிகரித்து வருகிறது. இதற்கு முன்பு நிதீஷ் குமாா் கட்சிதான் பாஜகவைவிட அதிக தொகுதிகளில் போட்டியிட்டு வந்தது. ஐக்கிய ஜனதா தளம் கட்சியை பாஜக முழுமையாக அபகரிக்கும் காலம் விரைவில் வரும்’ என்றாா்.