லேயில் ஊரடங்கு 4 மணி நேரம் தளா்வு: கண்காணிப்பைத் தீவிரப்படுத்திய போலீஸாா்

வன்முறை போராட்டத்தால் பாதிக்க லடாக் யூனியன் பிரதேசத்தின் லே மாவட்டத்தில் மூன்று நாளாக ஊரடங்கு தொடா்ந்த நிலையில், மக்கள் அத்தியாவசியப் பொருள்கள் வாங்க வசதியாக சனிக்கிழமை பகுதி, பகுதியாக சில மணி நேரம் கட்டுப்பாடுகள் தளா்த்தப்பட்டன.

பருவநிலை ஆா்வலா் சோனம் வாங்சுக் கைதைத் தொடா்ந்து, அசம்பாவித சம்பவங்கள் எதுவும் நடைபெறாமல் இருப்பதை உறுதிப்படுத்தும் வகையில், போலீஸாா் மற்றும் துணை ராணுவப் படையினா் கண்காணிப்பு மற்றும் ரோந்துப் பணிகளைத் தீவிரப்படுத்தியதோடு, தீவிர சோதனைகளிலும் ஈடுபட்டனா்.

இதுதொடா்பாக, துணைநிலை ஆளுநா் தலைமையிலான லடாக் யூனியன் பிரதேச நிா்வாகம் வெள்ளிக்கிழமை இரவு வெளியிட்ட செய்திக்குறிப்பில், ‘சோனம் வாங்சுக் நேபாள போராட்டங்களை மேற்கோள் காட்டி தொடா்ந்து ஆத்திரமூட்டும் வகையில் கருத்துகளையும் அறிக்கைகளையும் வெளியிட்டு வந்தாா். இதுவே, லே வன்முறைக்கு காரணமாக அமைந்தது. அமைதியை விரும்பும் லே நகரில் இயல்பு நிலையை மீட்டெடுப்பதற்கும், பொது அமைதிக்கு தொடா்ந்து பாதிப்பை ஏற்படுத்துவதை தடுப்பதற்கும் சோனம் வாங்சுக் கைது மிக முக்கியமான நடவடிக்கையாகும்.

இந்த வன்முறை போராட்டம் மற்றும் சோனம் வாங்சுக் குறித்து கிடைத்த முக்கிய தகவல்கள் மற்றும் ஆதாரங்களின் அடிப்படையில், அவரை தேசிய பாதுகாப்புச் சட்டத்தின் (என்எஸ்ஏ) கீழ் கைது செய்வதற்கான முடிவும், பொதுந நலனைக் கருத்தில் கொண்டு அவரை ராஜஸ்தான் மாநிலம் ஜோத்பூா் சிறைக்கு மாற்றும் முடிவும் எடுக்கப்பட்டது’ என்று தெரிவிக்கப்பட்டது.

அதிகாரிகள் கூறுகையில், ‘சோனம் வாங்சுக் கைதைத் தொடா்ந்து, மாவட்டம் முழுவதும் போலீஸாா் மற்றும் துணை ராணுவப் படையினா் குவிக்கப்பட்டு கண்காணிப்பு பலப்படுத்தப்பட்டுள்ளது. கடந்த 24 மணி நேரத்தில் மாவட்டத்தில் எந்தவொரு அசம்பாவிதமும் பதிவாகவில்லை’ என்றனா்.

மேலும், ராணுவத்தின் வடக்கு மண்டல தளபதி லெப்டினன்ட் ஜெனரல் பிரதிக் சா்மா துணைநிலை ஆளுநா் கவிந்தா் குப்தாவை சனிக்கிழமை சந்தித்து யூனியன் பிரதேசத்தின் தற்போதைய நிலவரம் குறித்து ஆலோசனை மேற்கொண்டதாகவும் அதிகாரிகள் தெரிவித்தனா்.

ஊரடங்கு தளா்வு: லேயில் மூன்று நாள்களாக ஊரடங்கு அமல்படுத்தப்பட்ட நிலையில், சனிக்கிழமை சில மணி நேரம் மட்டும் கட்டுப்பாடுகளில் தளா்வு அறிவிக்கப்பட்டது.

இதுகுறித்து லடாக் காவல் துறை தலைமை இயக்குநா் எஸ்.டி.சிங் ஜம்வால் கூறுகையில், ‘ஊரடங்கு சனிக்கிழமை மொத்தமாக நான்கு மணி நேரம் தளா்த்தப்பட்டது. பிற்பகல் 1 மணி முதல் 3 மணி வரை பின்னா் பிற்பகல் 3.30 மணி முதல் மாலை 5.30 மணி வரை என பகுதி பகுதியாக ஊரடங்கு தளா்த்தப்பட்டது.

மேலும் வன்முறையின்போது நிலைமை மேலும் மோசமடைவதைத் தடுக்கவும் தற்காப்புக்காக மட்டுமே பாதுகாப்புப் படையினா் துப்பாக்கிச் சூடு நடத்த வேண்டிய கட்டாயச் சூழல் ஏற்பட்டது.

இந்த வன்முறையில் 70 முதல் 80 போலீஸாா் மற்றும் பாதுகாப்புப் படையினா் காயமடைந்தனா். வன்முறை நாளில் மத்திய ரிசா்வ் காவல் படை இல்லாமல் இருந்திருந்தால் ஒட்டுமொத்த நகரமும் எரிந்திருக்கும்’ என்றாா்.

பாகிஸ்தான் தொடா்பு குறித்து விசாரணை... மேலும், ‘சோனம் வாங்சுக் மீதான விசாரணையில் பல்வேறு தகவல்கள் கிடைத்துள்ளன. மேலும், எல்லைக்கு அப்பால் நடைபெறும் விஷயங்கள் குறித்து உளவுத் தகவல் அளிக்க காவல்துறை தரப்பில் நியமித்துள்ள இந்திய வம்சாவளி நபரிடமிருந்து பல்வேறு தகவல்கள் கிடைத்துள்ளன. வாங்சுக் தலைமையில் நடைபெற்ற போராட்டங்கள் தொடா்பான விடியோ பதிவுகளும் கிடைத்துள்ளன. மேலும், சா்ச்சைக்குரிய வகையில் சில வெளிநாடுகளுக்கு வாங்சுக் சென்று வந்துள்ளாா். பாகிஸ்தானில் நடைபெற்ற ‘தி டான்’ ஊடக நிறுவனத்தின் நிகழ்ச்சிக்கும், வங்கதேசத்துக்கும் அவா் சென்று வந்துள்ளாா். இந்த தொடா்புகள் குறித்து அவரிடம் விசாரணை நடத்தப்பட்டு வருகிறது’ என்றாா்.

லடாக் யூனியன் பிரதேசத்துக்கு மாநில அந்தஸ்து, ஆறாவது அட்டவணை அந்தஸ்து கோரி தொடா் போராட்டம் நடத்தி வந்த சோனம் வாங்சுக், கடந்த செப்டம்பா் 10-ஆம் தேதி முதல் தொடா் உண்ணாவிரதப் போராட்டத்தை நடத்தினாா். ‘லே உச்ச அமைப்பை’ (எல்ஏபி)’ சோ்ந்த சிலரும் உண்ணாவிரதப் போராட்டத்தில் ஈடுபட்டனா். அவா்களுக்கு ஆதரவாக லடாக் தலைநகா் லேயில் புதன்கிழமை நடத்தப்பட்ட போராட்டம் வன்முறையாக மாறியது. போராட்டக்காரா்களுக்கும் பாதுகாப்புப் படையினருக்கும் இடையே நடைபெற்ற மோதலில் 4 போ் உயிரிழந்தனா். 40 போலீஸாா் உள்பட 90 போ் காயமடைந்தனா்.

இந்த வன்முறை சம்பவம் தொடா்பாக 50 பேரை போலீஸாா் கைது செய்தனா். வன்முறையைத் தூண்டியதாக சோன் வாங்சுக்கும் கைது செய்யப்பட்டாா்.