நாளை ஈரோடு வருகிறார் திமுக பொருளாளர் மு.க.ஸ்டாலின்

திமுக பொருளாளர் மு.க.ஸ்டாலின் 2 நாள்கள் சுற்றுப்பயணமாக ஈரோட்டுக்கு ஞாயிற்றுக்கிழமை வருகிறார்.

திமுக பொருளாளரும், மாநில இளைஞர் அணி செயலாளருமான ஸ்டாலின், சென்னையில் இருந்து ஈரோட்டுக்கு ரயில் மூலம் ஞாயிற்றுக்கிழமை காலை 6 மணிக்கு வருகிறார். ரயில் நிலையத்தில் மாவட்ட, மாநகர, இளைஞரணி சார்பில் வரவேற்பு அளிக்கப்படுகிறது.

பின்னர் பெருந்துறை சாலையில் உள்ள சக்தி சுகர்ஸ் விருந்தினர் இல்லத்தில் தங்குகிறார். காலை 9 மணிக்கு சம்பத்நகரில், மறைந்த முன்னாள் சட்டப்பேரவை உறுப்பினர் மா.சுப்பிரமணியன் இல்லத்துக்குச் சென்று திருவுருவ படத்துக்கு மாலை அணிவித்து மரியாதை செலுத்துகிறார்.

பின்னர் அங்கிருந்து புறப்பட்டு காஞ்சிக்கோவிலில் நடைபெற உள்ள திமுக இளைஞரணி பயிற்சிப் பாசறை கூட்டத்தில் கலந்துகொள்கிறார். பின்னர் மாலை 7 மணிக்கு கவுந்தப்பாடியில் நடைபெற உள்ள மாவட்ட திமுக பொதுக்கூட்டத்தில் கலந்து கொண்டு சிறப்புரையாற்றுகிறார்.

திங்கள்கிழமை காலை 9 மணிக்கு கோபியில் நடைபெற உள்ள கள்ளிப்பட்டி மணி, தொமுச செயலாளர் ஜீவா குழந்தைசாமி ஆகியோர் இல்ல திருமண விழாக்களில் கலந்து கொள்கிறார்.

இத்தகவலை மாவட்ட திமுக செயலர் என்கேகே.பி.ராஜா தெரிவித்துள்ளார்.