உலகப்புகழ் பெற்ற மைசூர் தசராவிழா அக்.14-ஆம் தேதி  தொடக்கம்

அக்.14-ஆம் தேதி உலகப்புகழ்பெற்றதசராவிழா தொடக்கப்பட உள்ளது. வறட்சியால் மாநிலம் பாதிக்கப்பட்டுள்ள நிலையில் மைசூரு தசரா ஊர்வலத்திற்கான செலவை குறைக்க திட்டமிடப்பட்டுள்ளது என்று கர்நாடக வருவாய்த்துறை அமைச்சர் சீனிவாஸ்மூர்த்தி தெரிவித்தார்.

இது குறித்து ஞாயிற்றுக்கிழமை அவர் செய்தியாளர்களிடம் கூறியது: மைசூருவில் புகழ்பெற்ற தசரா ஊர்வலம் வரும் அக். 14-ஆம் தேதி சாமூண்டேஸ்வரிக்கு சிறப்பு பூஜை செய்வதன் மூலம் உலகப்புகழ்பெற்றதசராவிழா தொடங்க உள்ளது.

அதனை தொடர்ந்து அக்.23-ஆம் தேதி புகழ்பெற்ற விஜயதசமி தசரா ஊர்வலம் நடைபெற உள்ளது. கடந்த ஆண்டுகளில் தசரா ஊர்வலத்திற்காக மட்டும் ரூ. 14 கோடி நிதி ஒதுக்குவது வாடிக்கையாக இருந்தது. தற்போது மாநிலத்தில் வறட்சி நிலவுவதால், அதனை ரூ. 4 கோடியாக குறைக்க திட்டமிடப்பட்டுள்ளது.

நிகழாண்டில் நடைபெறும் தசரா ஊர்வலத்தை விவசாயி ஒருவரை கொண்டு தொடக்கி வைக்க முடிவு செய்துள்ளோம். அந்த விவசாயி யார் என்பதனை பின்பு அறிவிக்கப்படும். தசரா விழாவையொட்டி அரண்மனையில் அக். 14-ஆம் தேதி நடைபெறும் கலாசார விழாவை முதல்வர் சித்தராமையா தொடக்கி வைப்பார்.

 2 நாட்கள் நடைபெரும் கலாசார விழாவில் பல்வேறு கலாசார நிகழ்ச்சிகளும், காவல்துறையின் வாத்திய கோஷ்டிகளும் பங்கு பெற உள்ளன. கலாசார நிகழ்ச்சிகளில் உள்ளூரைச் சேர்ந்த கலாசாரக்குழுக்கள் மட்டுமே பங்கு கொள்கின்றன. தசரா விழாயொட்டி அமைக்கப்பட்டுள்ள குழு, துணைக்குழுக்களில் அதிகாரிகளும் இடம்பெற்றிருப்பார்கள் என்றார் அவர்.