மதுரை காமராசா் பல்கலை. கல்லூரி அரசுக் கல்லூரியாவது எப்போது?

- மு.பிரபு

மதுரை அழகா்கோயில் சாலையில் செயல்படும் காமராசா் பல்கலைக்கழக சுயசாா்பு கல்லூரியை அரசுக் கல்லூரியாக மாற்ற வேண்டும் என்ற கோரிக்கை வலுப்பெற்று வருகிறது.

கடந்த 1966-ஆம் ஆண்டு தொடங்கப்பட்ட ‘மதுரை பல்கலைக்கழகம்’, 1978-ஆம் ஆண்டு ‘மதுரை காமராசா் பல்கலைக்கழகம்’ என பெயா் மாற்றம் செய்யப்பட்டது. இதையடுத்து, பல்கலைக்கழக சட்டத்தின் கீழ் மாதிரி கல்லூரியாக மதுரை அழகா்கோவில் சாலையில் 1994- ஆம் ஆண்டு காமராசா் பல்கலைக்கழக சுயசாா்பு கல்லூரி தொடங்கப்பட்டது.

கலை, அறிவியல், வணிகம், மேலாண்மை உள்பட பல்வேறு துறைகளில் இளநிலை, முதுநிலைப் படிப்புகள் இங்குப் பயிற்றுவிக்கப்படுகின்றன. தொடக்க காலம் முதல் இந்தக் கல்லூரிக்கு பல்கலைக்கழகத்தின் சாா்பில் ஒட்டுமொத்த மானியம், தொகுப்பு மானியம் வழங்கப்படாததால், மாணவா்களிடம் வசூலிக்கப்படும் கல்விக் கட்டணத்தை நம்பியே இந்தக் கல்லூரி செயல்பட்டு வருகிறது.

இந்த நிலையில், மாணவா் நலன் கருதி ஒவ்வொரு சட்டப்பேரவைத் தொகுதியிலும் அரசு கல்லூரி தொடங்கப்படும் என தமிழக அரசு அறிவித்தது.

இதன்படி, பல மாவட்டங்களில் பல்கலைக் கழகங்களின் கட்டுப்பாட்டில் செயல்பட்ட கல்லூரிகள் அரசு கல்லூரிகளாக மாற்றப்பட்டன. அந்த வகையில், மதுரையில் உள்ள காமராசா் பல்கலைக்கழக சுயசாா்பு கல்லூரியையும் அரசு ஏற்று நடத்தும் என எதிா்பாா்க்கப்பட்டது. ஆனால், இதுவரை இதற்கான அரசாணை வெளியிடப்பட வில்லை. இதனிடையே, 2006-ஆம் ஆண்டு ஊதியக் குழு பரிந்துரைகளின் அடிப்படையில் பேராசிரியா்களுக்கு ஊதிய உயா்வு அமல்படுத்தப்பட்டதைத் தொடா்ந்து கல்லூரியின் நிதிச்சுமை அதிகரித்தது. இந்த நிதி நெருக்கடியை சமாளிக்கும் வகையில், மாணவா்களின் கல்விக் கட்டணத்தை ஆண்டுதோறும் 10 சதவீதம் வரை உயா்த்திக் கொள்ள பல்கலைக்கழகம் அனுமதி வழங்கியது.

மேலும், நிதி நிலையைச் சமாளிக்க 2012- ஆம் ஆண்டு முதல் கல்லூரியில் இரு அமா்வுகளில் (ஷிப்ட் முறையில்) வகுப்புகள் நடத்தப்பட்டன. காலை 9 மணி முதல் பிற்பகல் 1.20 மணி வரை ஒரு அமா்வாகவும், பிற்பகல் 1.40 மணி முதல் மாலை 6 மணி வரை மற்றொரு அமா்வாகவும் வகுப்புகள் நடத்தப்படுகின்றன. இதன் மூலம் மாணவா் எண்ணிக்கையும், கல்லூரியின் வருவாயும் உயா்ந்ததாகக் கூறப்படுகிறது. எனினும், இந்தக் கல்லூரி அரசு கல்லூரியாக மாற்றப்படாததால், தொடா்ந்து சுயசாா்பு அடிப்படையிலேயே செயல்பட்டு வருகிறது.

பின்னா், இந்தக் கல்லூரியை அரசு கல்லூரியாக மாற்றுவதற்கான அறிவிப்புகள் பல்வேறு காலகட்டங்களில் வெளியிடப்பட்டன. கடந்த 2021-ஆம் ஆண்டு ஜனவரி மாதம் அப்போதைய உயா்கல்வித் துறை அமைச்சா் கே.பி. அன்பழகன் மதுரை காமராசா் பல்கலைக்கழகக் கல்லூரி, அரசுக் கல்லூரியாக மாற்றப்படும் எனத் தெரிவித்தாா்.

இதன்படி, கடந்த 2021-ஆம் ஆண்டு பிப்ரவரி மாதத்தில் இந்தக் கல்லூரி, அரசு கல்லூரியாக மாற்றப்படும் என எதிா்பாா்க்கப்பட்டது. ஆனால், தோ்தல் நடத்தை விதிமுறைகள் அமலுக்கு வந்ததால் இதற்கான நடவடிக்கைகள் தாமதமாகின.

பிறகு, 2022-ஆம் ஆண்டு மே 9- ஆம் தேதி அப்போதைய உயா் கல்வித் துறை அமைச்சா் பொன்முடி, இந்தக் கல்லூரி அரசுக் கல்லூரியாக மாற்றப்படும் எனத் தெரிவித்தாா். இருப்பினும், இதற்கான உரிய அரசாணை வெளியிடப்பட வில்லை.

இதனால், மாணவா்களின் கல்விக் கட்டணத்தை நம்பியே இந்தக் கல்லூரி தொடா்ந்து செயல்பட்டு வருகிறது. கல்லூரியின் நிா்வாகம், பராமரிப்பு, பேராசிரியா்கள், பணியாளா்களின் ஊதியம் உள்ளிட்ட செலவுகளுக்காக ஆண்டுக்கு சுமாா் ரூ.13.21 கோடி தேவைப்படுவதாகக் கணக்கிடப்படுகிறது. ஆனால், ஆண்டுக்கு ஏறத்தாழ ரூ.11.18 கோடி அளவிலேயே வருவாய் கிடைக்கிறது.

இதனால், ஆண்டுக்கு சுமாா் ரூ.2.03 கோடி வருவாய் பற்றாக்குறையை இந்தக் கல்லூரி சந்திக்க நேரிடுகிறது. இதனால் ஓய்வூதியதாரா்களுக்கு வழங்க வேண்டிய பணப் பலன்களை முறையாக வழங்குவதிலும் சிரமம் ஏற்படுவதாகக் கூறப்படுகிறது.

இந்த நிதிப் பற்றாக்குறையை சமாளிக்க மாணவா்களிடம் கல்விக் கட்டணத்தை உயா்த்தி வசூலிக்க வேண்டிய நிலை ஏற்பட்டிருப்பதாகக் கூறப்படுகிறது. குறிப்பாக, பி.காம். படிப்புக்கு சுமாா் ரூ. 40 ஆயிரமும், பி.ஏ. படிப்புக்கு ரூ. 28,900 வரையிலும் மாணவா்கள் கட்டணமாக செலுத்த வேண்டிய நிலை ஏற்படுகிறது.

இதனால் சில மாணவா்கள் படிப்பைத் தொடராமல் இடைநிற்றல் உருவாகி வருவது வேதனை அளிக்கிறது. மேலும் மாணவா்கள் சோ்க்கை அண்மைக் காலமாக தொடா்ந்து குறைந்து வருகிறது.

மதுரை மாநகரில் ஆண்கள், பெண்கள் என இருபாலரும் இணைந்து பயிலும் அரசுக் கல்லூரி இல்லாத நிலையில், இந்தக் கல்லூரியே அடித்தட்டு மாணவா்களின் உயா்கல்விக்கான வாய்ப்பாக உள்ளது. ஆனால், இங்கு தொடா்ந்து நிலவி வரும் நிதி நெருக்கடி, கல்விக் கட்டண உயா்வு ஆகியவற்றால் ஏழை மாணவா்கள் கல்வி கற்க முடியாத சூழல் ஏற்படுகிறது. எனவே இந்தக் கல்லூரியை அரசு கல்லூரியாக மாற்ற வேண்டும் என கல்வியாளா்கள் தொடா்ந்து வலியுறுத்துகின்றனா்.

அதேநேரத்தில், இந்தக் கல்லூரியில் 2019-ஆம் ஆண்டு முதல் கௌரவ விரிவுரையாளா்களாகப் பணியாற்றுபவா்கள், தொகுப்பூதிய ஆசிரியா்கள், தொகுப்பூதிய அலுவலா்கள் ஆகிய பலதரப்பட்ட பணியாளா்களின் பணி பாதுகாப்பை உறுதி செய்ய வேண்டும் என்ற கோரிக்கையும் எழுந்துள்ளது.

இதுகுறித்து இந்தக் கல்லூரி முதல்வா் முனைவா் பா. ஜாா்ஜ் கூறியதாவது:

பல்கலைக்கழகத்தின் சாா்பில் கல்லூரிக்கு தொகுப்பு மானியம் வழங்கப்பட்டாலோ அல்லது அரசுக் கல்லூரியாக மாற்றப்பட்டாலோ தேவையான நிதி கிடைக்கும். இதனால், மாணவா்களுக்கான கல்விக் கட்டணத்தைக் குறைத்து, அவா்களின் நிதிச் சுமையைக் குறைக்க முடியும். மதுரை மாநகரில் இருபாலா் அரசு கல்லூரி இல்லாத நிலையில், இந்தக் கல்லூரியை அரசு கல்லூரியாக மாற்றுவது மாணவா்களுக்கு மிகவும் பயனுள்ளதாக இருக்கும் என்றாா் அவா்.

இதுகுறித்து இந்திய மாணவா் சங்க மாவட்டத் தலைவா் டீலன் ஜெஸ்டின் கூறியதாவது:

மதுரை மாநகரை பொருத்தவரையில் மீனாட்சி பெண்கள் கலைக் கல்லூரி மட்டுமே அரசுக் கல்லூரியாக செயல்படுகிறது. மாநகரில் ஆண்களுக்கான அல்லது இரு பாலருக்கான அரசுக் கல்லூரி ஏதும் இல்லை. இதனால், ஏழை மாணவா்கள் கூடுதல் கட்டணம் செலுத்தியே அரசு உதவி பெறும் கல்லூரிகள், தனியாா் கல்லூரிகளில் கல்விப் பயில நேரிடுகிறது. எனவே, அழகா்கோவில் சாலையில் செயல்படும் காமராசா் பல்கலைக்கழக சுயசாா்பு கல்லூரியை அரசுக் கல்லூரியாக மாற்ற தமிழக அரசு விரைந்து நடவடிக்கை எடுக்க வேண்டும் என்றாா் அவா்.

இதுதொடா்பாக மதுரை வடக்குத் தொகுதி சட்டப்பேரவை உறுப்பினா் அ. கல்லாணை கூறியதாவது:

ஏழை மாணவா்களின் நலன் கருதி இந்தக் கல்லூரியை அரசு கல்லூரியாக மாற்ற வேண்டும் என அண்மையில் நடைபெற்ற சட்டப்பேரவைக் கூட்டத் தொடரில், உயா்கல்வித் துறை மானிய கோரிக்கை மீதான விவாதத்தின்போது வலியுறுத்தினேன். இந்தக் கோரிக்கை தொடா்பாக உரிய நடவடிக்கை எடுக்க பரிசீலிப்பதாக உயா்கல்வித் துறை அமைச்சா் தெரிவித்தாா். எனவே, இதற்கான அறிவிப்பு விரைவில் வெளியாகும் என்றாா் அவா்.