சவுக்கு சங்கா் மீதான 16 வழக்குகளில் நடவடிக்கை எடுக்க இடைக்காலத் தடை -உச்சநீதிமன்றம் உத்தரவு

நமது நிருபா்

புது தில்லி, ஆக.14: ‘ யூடியூபா்’ சவுக்கு சங்கருக்கு எதிரான 16 வழக்குகள் மீது நடவடிக்கை எடுக்க தமிழக அரசுக்கு இடைக்காலத் தடை விதித்து உச்சநீதிமன்றம் புதன்கிழமை உத்தரவிட்டுள்ளது.

‘யூடியூபா்’ சவுக்கு சங்கா் தனக்கு எதிராக தமிழகத்தில் காவல்துறை தொடா்ந்துள்ள 16 வழக்குகளையும் ரத்து செய்ய வேண்டும் எனக் கோரி உச்சநீதிமன்றத்தில் மனு தாக்கல் செய்திருந்தாா். இந்த மனு மீதான விசாரரணை உச்சநீதிமன்ற தலைமை நீதிபதி டி.ஒய். சந்திரசூட், நீதிபதிகள் ஜே.பி. பா்திவாலா, மனோஜ் மிஸ்ரா ஆகியோா் அடங்கிய அமா்வில் புதன்கிழமை நடைபெற்றது.

அப்போது சவுக்கு சங்கா் தரப்பில் ஆஜரான வழக்குரைஞா் பாலாஜி சீனிவாசன், ‘உச்சநீதிமன்றம், சென்னை உயா்நீதிமனறம் சவுக்கு சங்கரை விடுவிக்க உத்தரவிட்ட பிறகும், அவா் மீண்டும் தமிழக காவல் துறையால் குண்டா் சட்டத்தின் கீழ் கைது செய்யப்பட்டுள்ளாா். பொய் வழக்குகளில் தொடா்ந்து கைது செய்யப்படும் அவா், காவலில் சித்திரவதை செய்யப்படுவதாகத் தெரிவித்தாா்.

இதைக்கேட்ட தலைமை நீதிபதி, இந்த விவகாரத்தில் சவுக்கு சங்கருக்கு நிவாரணம் வழங்கிய பிறகும், அவா் மீது நடவடிக்கை எடுக்கப்பட்டுள்ளதா என கேள்வி எழுப்பி அதற்கான பதிலையும் உறுதிப்படுத்திக் கொண்டாா். இதைத் தொடா்ந்து, சவுக்கு சங்கருக்கு எதிரான வழக்குகளில் அவா் மீது நடவடிக்கை எடுக்க நீதிபதிகள் இடைக்காலத் தடை விதித்தனா்.

மேலும், சவுக்கு சங்கா் மீது தற்போது போடப்பட்டுள்ள குண்டா் சட்டத்தை எதிா்த்தும் உச்சநீதிமன்றத்தில் நேரடியாக மனு தாக்கல் செய்யவும் அனுமதி வழங்கப்பட்டது. சங்கா் மீதான அனைத்து வழக்குகளின் விவரங்கள் மற்றும் அவா் அளித்த நோ்காணல்களை அறிக்கையாக அரசு தாக்கல் செய்ய வேண்டும் என்று நீதிபதிகள் உத்தரவிட்டனா்.

இதையடுத்து, சவுக்கு சங்கரின் மனுவுக்கு பதில் அளிக்க தமிழக அரசுக்கு நோட்டீஸ் அனுப்ப உத்தரவிட்டு, அடுத்த விசாரணையை ஆகஸ்ட் 22-ஆம் தேதிக்கு நீதிபதிகள் ஒத்திவைத்தனா்.