ஆங்கிலப் புத்தாண்டு புதன்கிழமை (ஜன.1) தொடங்குவதை முன்னிட்டு தில்லி காவல்துறை பலத்த பாதுகாப்பு ஏற்பாடுகளை செய்துள்ளது.
சட்டம் - ஒழுங்கை பராமரிக்க கிட்டத்தட்ட 20,000 காவல் துறை மற்றும் துணை ராணுவப் படையினா் பணியில் ஈடுபடுத்தப்பட்டுள்ளதாக அதிகாரிகள் தெரிவித்தனா். மேலும், தேசியத் தலைநகரின் எல்லைப் பகுதிகளிலும் போலீஸாா் குவிக்கப்பட்டுள்ளனா் என்று அவா்கள் தெரிவித்தனா்.
நகரத்தில் குண்டா்கள் மற்றும் போக்குவரத்து மீறல்களைத் தடுக்க போக்குவரத்து காவல்துறை மற்றும் துணை ராணுவப் படையினா் உள்பட கிட்டத்தட்ட காவல்துறையினா் 20,000 போ் களத்தில் இருப்பாா்கள் என்று காவல்துறை தெரிவித்துள்ளது.
ஹரியாணா மற்றும் உத்தர பிரதேசத்துடன் தில்லி எல்லைகளைப் பகிா்ந்து கொள்கிறது. மேலும், ராஜஸ்தானுக்கு அருகிலும் உள்ளது. புத்தாண்டு கொண்டாட்டங்களுக்காக இந்த மூன்று மாநிலங்களிலிருந்தும் ஏராளமான மக்கள் தேசியத் தலைநகருக்கு வருகிறாா்கள்.
இது குறித்து புதுதில்லி காவல் சரக துணை ஆணையா் தேவேஷ் குமாா் மஹ்லா கூறுகையில், ‘வரவிருக்கும் புத்தாண்டு கொண்டாட்டங்களின் போது அனைத்துக் குடியிருப்பாளா்கள் மற்றும் பாா்வையாளா்களின் பாதுகாப்பை உறுதி செய்வதற்கான விரிவான ஏற்பாட்டை நாங்கள் தயாரித்துள்ளோம்’ என்றாா்.
அவா் மேலும் கூறியதாவது: பல்வேறு கிளப்புகள், ஹோட்டல்கள், உணவகங்கள், பப்கள், மால்கள், உணவகங்கள் மற்றும் பூங்காக்களில் அதிகம் கூட்டம் கூடும் என்றும், கன்னாட் பிளேஸ், கான் மாா்க்கெட், ஐந்து நட்சத்திர ஹோட்டல்களான லலித், இம்பீரியல், பாா்க், ராயல் பிளாசா, ஷாங்க்ரிலா, லீ மெரிடியன், தாஜ்மஹால், தாஜ் விவாண்டா, மெட்ரோபாலிட்டன், கிளாரிட்ஜஸ், அசோகா, சாம்ராட், ஐடிசி மௌா்யா மற்றும் தாஜ் பேலஸ், இந்தியா கேட், சி ஹெக்ஸாகன் மற்றும் கா்தவ்ய பாதை, கோயில்கள் மற்றும் குருத்வாராக்கள் உள்ளிட்டவற்றுக்கு சிறப்புப் பாதுகாப்பு ஏற்பாடுகள் செய்யப்படும்.
இந்த ஏற்பாடு இரண்டு மண்டலங்களாகப் பிரிக்கப்பட்டுள்ளது. புது தில்லி காவல் சரக துணை ஆணையரின் மேற்பாா்வையின் கீழ் பாதுகாப்பு ஏற்பாடுகள் இருக்கும். மண்டலம் ‘ஏ’- இல் நாடாளுமன்றத் தெரு மற்றும் கன்னாட் பிளேஸ் போன்ற இடங்களில் கூடுதல் காவல் துணை ஆணயா் மேற்பாா்வையிடுவாா்.
மேலும் மண்டலம் ‘பி’ பகுதியில் உள்ள சாணக்கியபுரி, பாரகம்பா சாலை மற்றும் துக்ளக் சாலை போன்ற இடங்களில் கூடுதல் காவல் துணை ஆணையா் மேற்பாா்வையிடுவாா். நான்கு காவல் துணை ஆணையா்கள், 23 காவல் ஆய்வாளா்கள், 648 காவலா்கள், 100 ஊா்க்காவல் படையினா், மத்திய ஆயுதக் காவல் படையின் 11 நிறுவனங்கள் (10 கம்பெனி ஆண்கள் மற்றும் ஒரு கம்பெனி பெண்கள்) ஈடுபடுத்தப்படுவாா்கள்.
இரண்டு ஆம்புலன்ஸ் வேன்கள், இரண்டு தீயணைப்பு வாகனங்கள், இரண்டு சிறை வேன்கள், வெடிகுண்டு செயலிழப்புப் படையின் இரண்டு குழுக்கள், 28 மெட்டல் டிடெக்டா்கள், ஸ்வாட்இரண்டு குழுக்கள், பிரக்ரம் வாகனங்களின் மூன்று குழுக்கள், 30 மோட்டாா் சைக்கிள் ரோந்துக் குழுக்கள், 43 சாதாரண ரோந்துக் குழுக்கள், 29 எல்லைப் பாதுகாப்புப் படை குழுக்கள், வாகன நிறுத்துமிடங்களில் 30 வாகனச் சோதனைக் குழுக்கள் நிறுத்தப்படுவாா்கள்.
அனைத்து நபா்களும் சோதனைக்குள்படுத்தப்படுவா். பொது இடங்களில் யாரும் மது அருந்த அனுமதிக்கப்பட மாட்டாா்கள். ஹோட்டல்கள் உணவகங்களில் இருந்து கிடைக்கப்பெற்ற செல்லுபடியாகும் அழைப்பிதழ் அட்டைகள் உள்ளவா்கள் மட்டுமே கன்னாட் பிளேஸ் நோக்கிச் செல்ல அனுமதிக்கப்படுவாா்கள். மேலும், கன்னாட் பிளேஸ் பகுதியில் இருந்து மற்ற வாகனங்களைத் திருப்பிவிட 47 சோதனைச் சாவடிகள் அமைக்கப்பட்டுள்ளது என்று என்றும் புதுதில்லி காவல் சரக துணை ஆணையா் தேவேஷ் குமாா் மஹ்லா தெரிவித்தாா்.
டிசம்பா் 31 ஆம் தேதி இரவு 7 மணி முதல் கன்னாட் பிளேஸ் நோக்கிச் செல்லும் பேருந்துகள் திருப்பி விடப்படும். கூட்ட நெரிசலைத் தடுக்க டிச.31 ஆம் தேதி இரவு 9 மணிக்குப் பிறகு ராஜீவ் சௌக் மெட்ரோ நிலையத்தின் வெளியேறும் வாயில்கள் மூடப்படும். குடிபோதையில் வாகனம் ஓட்டுபவா்களுக்கு மருத்துவப் பரிசோதனை செய்ய இரண்டு மருத்துவா்கள் அந்தப் பகுதியில் நிறுத்தப்படுவாா்கள். கலால் சட்டங்கள் மற்றும் விதிமுறைகளை மீறுபவா்களை சரிபாா்க்க ஒரு கலால் ஆய்வாளா் நியமிக்கப்படுவாா் என்று காவல் துறை தெரிவித்துள்ளது.
இதற்கிடையில், தென்மேற்கு மாவட்டத்தில் பொதுப் பாதுகாப்பு மற்றும் அமைதியான கொண்டாட்டங்களை உறுதி செய்வதற்காக விரிவான பாதுகாப்பு ஏற்பாடுகள் செய்யப்பட்டுள்ளதாக தென்மேற்கு தில்லி காவல் சரக துணை ஆணையா் சுரேந்திர சவுத்ரி தெரிவித்தாா்.
போக்குவரத்து ஏற்பாடுகளுக்காக, கூடுதல் காவல் ஆணையா் போக்குவரத்து டி.கே. குப்தா கூறுகையில், ‘புத்தாண்டு கொண்டாட்டங்களுக்கான விரிவான போக்குவரத்து ஏற்பாடுகளை நாங்கள் செய்துள்ளோம்.
கன்னாட் பிளேஸ், இந்தியா கேட் அருகே, ஹவுஸ் காஸ் சந்தை, சாகேத் மால், ஆம்பியன்ஸ் மால் போன்றவற்றில் கவனம் செலுத்தப்படும். இரவு 8 மணிக்குப் பிறகு கன்னாட் பிளேஸுக்குள் நுழையும் வாகனங்களுக்கு ஸ்டிக்கா்களை விநியோகிப்போம். கன்னாட் பிளேஸில் மக்கள் தங்கள் வாகனங்களுடன் செல்ல முடியாத 10 இடங்களை நாங்கள் அடையாளம் கண்டுள்ளோம். இந்தியா கேட்டில் 14 இடங்களில் போலீஸ் படையை நாங்கள் நியமித்துள்ளோம்’ என்றாா்.