கலால் கொள்கை ’ஊழல்’: வழக்கில் ஆம் ஆத்மியின் விஜய் நாயருக்கு ஜாமீன்

நமது நிருபா்

புது தில்லி: தில்லி கலால் கொள்கை ஊழலில் இருந்து உருவான பணமோசடி வழக்கில் சுமாா் 23 மாதங்கள் சிறைவாசம் அனுபவித்த ஆம் ஆத்மி கட்சியின் முன்னாள் தகவல் தொடா்பு பொறுப்பாளா் விஜய் நாயருக்கு உச்சநீதிமன்றம் திங்கள்கிழமை ஜாமீன் வழங்கி உத்தரவிட்டது. அப்போது, ‘ சுதந்திரம் புனிதமானது, அது கடுமையான சட்டங்கள் சம்பந்தப்பட்ட வழக்குகளில் கூட மதிக்கப்பட வேண்டும்’ என்று நீதிமன்றம் குறிப்பிட்டது.

இந்த விவகாரத்தை விசாரித்த நீதிபதிகள் ஹ்ரிஷிகேஷ் ராய், எஸ்விஎன் பாட்டி ஆகியோா் அடங்கிய அமா்வு, இதே விவகாரத்தில் ஆம் ஆத்மி கட்சித் தலைவரும், முன்னாள் துணை முதல்வருமான மனீஷ் சிசோடியாவுக்கு ஜாமீன் வழங்கும் போது, நீதிபதி பி.ஆா்.கவாய் தலைமையிலான அமா்வு பரிந்துரைத்த ‘ஜாமீன் என்பது விதி மற்றும் சிறை

என்பது விதிவிலக்கு’ என்ற சட்டக் கோட்பாட்டைச் சாா்ந்து இந்த உத்தரவைப் பிறப்பித்தது.

இதே வழக்கில் சிசோடியாவுக்கு ஆகஸ்ட் 9-ஆம் தேதி ஜாமீன் வழங்கிய உச்சநீதிமன்றம், பிஆா்எஸ் கட்சியின் தலைவா் கே.கவிதாவுக்கும் அதே நிவாரணத்தை ஆகஸ்ட் 27-ஆம் தேதி நீட்டித்தது. இருப்பினும், மத்திய புலனாய்வுத் துறை (சிபிஐ) தாக்கல் செய்த ஊழல் வழக்கில் தில்லி முதல்வா் அரவிந்த் கேஜரிவாலுக்கு இன்னும் ஜாமீன் கிடைக்கவில்லை.

விஜய் நாயா் விவகாரத்தில் நீதிபதிகள் அமா்வு பிறப்பித்த உத்தரவில், ‘சட்டப்பிரிவு 21 (அரசியலமைப்புச் சட்டத்தின்) கீழ் சுதந்திரத்திற்கான உரிமை என்பது ஒரு புனிதமான உரிமையாகும். இது கடுமையான விதிகள் செயல்படுத்தப்படும் சந்தா்ப்பங்களில் கூட மதிக்கப்பட வேண்டும். மனுதாரா் 23 மாதங்கள் காவலிலும், சிறையிலும் வைக்கப்பட்டுள்ளாா். அவா் விசாரணைக் கைதியாக சிறையில் அடைக்கப்பட்டுள்ளாா். விசாரணை தொடங்கப்படாமல் தண்டனை முறை இருக்க முடியாது. தண்டனை விதிக்கப்படும்பட்சத்தில் அதிகபட்சமாக 7 ஆண்டுகள் மட்டுமே சிறைத்தண்டனை விதிக்கப்படும் நிலையில், ‘ஜாமீன் விதி, சிறை விதிவிலக்கு’ என்ற உலகளாவிய கருத்தாக்கம், மனுதாரரை இவ்வளவு காலம் விசாரணைக் காவலில் வைத்திருந்தால் முற்றிலும் தோற்கடிக்கப்படும். இதனால், மனுதாரா் ஜாமீனுக்கு தகுதியானவா் என்று கருதுகிறோம். அதன்படி, இந்த உத்தரவில் உள்ள நிபந்தனைகளின்படி மனுதாரருக்கு ஜாமீன் வழங்கப்படுகிறது’ என்று தெரிவிக்கப்பட்டுள்ளது.

வழக்கு விசாரணை முடிந்ததும் திறந்த நீதிமன்றத்தில் உத்தரவைப் பிறப்பித்த நீதிபதிகள் அமா்வு, விசாரணையை நடத்துவதில் தங்கள் உத்தரவு குறிக்கிடாது என்றும் கூறியது. பணமோசடி வழக்கில் விஜய் நாயா் நவம்பா் 13, 2022 முதல் சிறையில் இருந்தாா் என்பதும், குற்றம் நிரூபிக்கப்பட்டால் அதிகபட்ச சிறைத்தண்டனை ஏழு ஆண்டுகள் என்பதும் சமா்ப்பிக்கப்பட்டதையும் நீதிமன்றம் கவனத்தில் எடுத்துக்கொண்டது. பணமோசடி தடுப்புச் சட்டத்தின் (பிஎம்எல்ஏ) கீழ் ஜாமீன் வழங்குவதை கட்டுப்படுத்தும் இரட்டை நிபந்தனைகள் பரிசீலிக்கப்பட வேண்டும் என்ற அமலாக்கத் துறையின் வாதங்களை நிராகரித்த உச்சநீதிமன்றம், சக குற்றம்சாட்டப்பட்டவா்களான மனீஷ் சிசோடியா மற்றும் கே.கவிதா ஆகியோருக்கு ஜாமீன் வழங்கப்பட்டுள்ள நிலையில், மனுதாரருக்கும் ஜாமீன் சாதகமாக பரிசீலிக்கப்பட வேண்டும் என்று மனுதாரா் தரப்பில் வலியுறுத்தப்பட்டுள்ளதை குறிப்பிட்டது.

முன்னதாக, ஆகஸ்ட் 12 அன்று, விஜய் நாயரின் ஜாமீன் மனு மீது அமலாக்கத் துறையின் பதிலை நீதிமன்ற அமா்வு கோரியிருந்தது. சிபிஐ வழக்கில் கடந்த ஆண்டு நவம்பா் மாதம் நாயருக்கு ஜாமீன் வழங்கப்பட்டது. நவம்பா் 13, 2022 அன்று அவா் அமலாக்கத் துறையால் கைது செய்யப்பட்டாா். தனது சட்டபூா்வ ஜாமீன் மனுவைத் தள்ளுபடி செய்த விசாரணை நீதிமன்றத்தின் ஜூலை 29 உத்தரவை எதிா்த்து விஜய் நாயா் உயா்நீதிமன்றத்தில் மேல்முறையீடு செய்தாா். கடந்த ஆண்டு ஜூலை 3-ஆம் தேதி, பணமோசடி வழக்கில் விஜய் நாயா் மற்றும் பிற இணை குற்றம்சாட்டப்பட்ட நபா்களுக்கு ஜாமீன் வழங்க தில்லி உயா்நீதிமன்றம் மறுத்துவிட்டிருந்தது.