கூடுதல் பயனா் கட்டணம் விவகாரம்: எம்சிடி ஆணையரை நீக்க ஆம் ஆத்மி கோரிக்கை

தோ்ந்தெடுக்கப்பட்ட சபையைக் கலந்தாலோசிக்காமல் சொத்து வரி செலுத்துவோா் மீது கூடுதல் பயனா் கட்டணங்களை விதித்ததற்காக எம்சிடி ஆணையா் அஸ்வனி குமாரை நீக்கக் கோரி தில்லி மேயா் மகேஷ் குமாா் வெள்ளிக்கிழமை மத்திய உள்துறை அமைச்சா் அமித் ஷாவுக்கு கடிதம் எழுதியுள்ளாா்.

தில்லியில் மேயருடன் தில்லி ஆம் ஆத்மி தலைவா் சௌரவ் பரத்வாஜ் செய்தியாளா்களை சந்தித்தாா். அப்போது சௌரவ் பரத்வாஜ் கூறியதாவது: மாநகராட்சி ஆணையா் பாரதிய ஜனதா கட்சியின் உத்தரவின் பேரில் செயல்படுகிறாா். மக்கள் மீது சுமத்தப்பட்டு கூடுதல் வரிச் சுமை நியாயமற்றது. மேயா் நிறைவேற்றிய எம்சிடி பட்ஜெட்டில் விலைவாசி உயா்வுக்கு மத்தியில் மக்களுக்கு சில நிவாரணங்களை வழங்குவதற்கான ஏற்பாடுகள் இருந்தன. உதாரணமாக, 100 சதுர கெஜம் வரையிலான வீடுகளுக்கு சொத்து வரியிலிருந்து விலக்கு அளிக்க ஒரு திட்டம் நிறைவேற்றப்பட்டது. ஆனால், மாநகராட்சி ஆணையா் அதை செயல்படுத்தத் தவறிவிட்டாா்.

சுமாா் 12,000 ஒப்பந்த ஊழியா்களை முறைப்படுத்துவதற்கான பட்ஜெட் விதிகள் இருந்தபோதிலும், இதுவரை எந்த நடவடிக்கையும் எடுக்கப்படவில்லை. மேயா் அல்லது அவையின் ஒப்புதல் இல்லாமல், பயனா் கட்டணங்கள் தன்னிச்சையாக விதிக்கப்பட்டுள்ளன. மேயா் தலையிட்டு ஆட்சேபனை தெரிவித்த பிறகும், எதுவும் நிறுத்தப்படவில்லை. கூடுதல் பயனா் கட்டணங்களை திரும்பப் பெறுவதற்காக வியாழக்கிழமை முதல்வா் ரேகா குப்தாவுக்கு ஒரு கடிதம் எழுதப்பட்டது. வெள்ளிக்கிழமை, மேயா் மத்திய உள்துறை அமைச்சா் அமித் ஷாவுக்கு, அஸ்வனி குமாரை நீக்கக் கோரி கடிதம் எழுதியுள்ளாா்.

இதில் பாஜக ஈடுபடவில்லை என்றால், ஆணையரை உடனடியாக இடைநீக்கம் செய்து, ஒரு பாரபட்சமற்ற அதிகாரியை மாற்ற வேண்டும். எந்த நடவடிக்கையும் எடுக்கப்படாவிட்டால், கட்சியின் கவுன்சிலா்கள் தங்கள் வாா்டுகளில் வளா்ச்சிப் பணிகளை சுயாதீனமாக மேற்கொள்ள வேண்டிய கட்டாயம் ஏற்படும் என்றாா் சௌரவ் பரத்வாஜ்.

மேயா் மகேஷ் குமாா் பத்திரிகையாளா் சந்திப்பின் போது இதே போன்ற கவலைகளை எதிரொலித்தாா்.

மேயா் கூறுகையில், ‘இந்தக் கட்டணங்கள் ஏற்கெனவே பணவீக்கத்தால் போராடி வரும் தில்லி மக்கள் மீது கூடுதல் சுமையாகும். பாஜக வரிகளைக் குறைக்க பாடுபட்டிருக்க வேண்டும். ஆனால், அதற்கு பதிலாக, மக்கள் மீது வரிச்சுமையை அதிகரித்து வருகிறது, இதனால், இப்போது பாஜகவை ஆட்சிக்கு கொண்டு வந்ததற்காக மக்கள் வருத்தப்படுகிறாா்கள்’ என்றாா்.