மாணவா்கள் இடைநீக்கத்தை நியாயப்படுத்தியது அம்பேத்கா் பல்கலை.

தில்லி அம்பேத்கா் பல்கலைக்கழகம் ஞாயிற்றுக்கிழமை ஐந்து மாணவா்களை இடைநீக்கம் செய்த முடிவை நியாயப்படுத்தியது. போராட்டக்காரா்கள் அதிகாரப்பூா்வ வாகனங்களை சேதப்படுத்தியதாகவும் பல்கலைக்கழக செயல்பாடுகளைத் தடுத்ததாகவும் கூறப்பட்டதை அடுத்து இந்த நடவடிக்கை எடுக்கப்பட்டது என்றும் கூறியது.

இது தொடா்பாக செய்தி ஏஜென்சியிடம் பேசிய பதிவாளா் நவலேந்திர குமாா் சிங், ‘முந்தைய ஒழுங்கு நடவடிக்கைக்கு எதிா்ப்புத் தெரிவித்த மாணவா்கள் வெள்ளிக்கிழமை தனது காரையும் துணைவேந்தா் அனு சிங் லாதரின் காரையும் தடுத்தனா்’ என்று கூறினாா்.

‘அவா்கள் எனது வாகனத்தில் தொங்கிக் கொண்டு அதை நகர அனுமதிக்கவில்லை. அவா்கள் துணைவேந்தரின் காரையும் தடுத்து சேதப்படுத்தினா். பாதுகாப்புப் பணியாளா்கள் மற்றும் போலீஸாா் தலையிட வேண்டியிருந்தது. இந்தச் சம்பவம் தொடா்பாக முறையான புகாா் பதிவு செய்யப்பட்டுள்ளது. மேலும் எஃப்ஐஆா் பதிவு செய்யப்படும்’ என்று துணைவேந்தா் அனு சிங் லாதா் கூறினாா்.

இடைநீக்கம் செய்யப்பட்ட மாணவா்கள் ‘அதிகாரப்பூா்வ கடமைகளைத் தடுத்தல், தாக்க முயற்சித்தல் மற்றும் வளாக ஊழியா்களுக்கு ஆபத்தை விளைவித்தல்’ ஆகியவற்றில் ஈடுபட்டதாக பல்கலைக்கழக நிா்வாகம் கூறியது.

இடைநீக்கம் செய்யப்பட்ட மாணவா்களில் சரண்யா வா்மா (மாணவா் சங்கப் பொருளாளா்), சுபோஜீத் டே (பிஎச்டி மாணவா்), ஷெஃபாலி (அம்பேத்கா் பல்கலை. எஸ்எஃப்ஐ செயலாளா்), கீா்த்தனா மற்றும் அஜய் ஆகியோா் அடங்குவா்.

முதல் ஆண்டு மாணவா் தற்கொலை முயற்சியுடன் தொடா்புடைய கொடுமைப்படுத்துதல் வழக்கை அரசியலாக்கியதாகக் கூறி, அனன், ஹா்ஷ் மற்றும் நதியா ஆகிய மூன்று மாணவா்களுக்கு எதிராக மாா்ச் 5 அன்று பிறப்பிக்கப்பட்ட முந்தைய இடைநீக்கங்களை ரத்து செய்யக் கோரி நடந்து வரும் போராட்டங்களைத் தொடா்ந்து இந்தச் சம்பவம் நிகழ்ந்துள்ளது.

‘உண்மைகளைத் திரித்து, ஒரு முக்கியமான பிரச்னைக்கு அரசியல் சாயம் பூச முயன்ன் காரணமாகவே மாணவா்கள் இடைநீக்கம் செய்யப்பட்டனா்’ என்று பல்கலை. துணைவேந்தா் கூறினாா்.

போராட்டத்தை வழிநடத்தும் இந்திய மாணவா் கூட்டமைப்பு (எஸ்எஃப்ஐ), குற்றச்சாட்டுகளை மறுத்து, நிா்வாகத்தின் நடவடிக்கைகளை ‘தன்னிச்சையானது மற்றும் அடக்குமுறை’ என்று கூறியது. ஒரு அறிக்கையில், மாணவா் அமைப்பு பல்கலைக்கழகம் ‘கருத்து வேறுபாடுகளை அமைதிப்படுத்துவதாக’‘ குற்றம் சாட்டியது. மேலும் ‘பெண் மாணவா்கள் பாதுகாப்புக் காவலா்கள் மற்றும் காவல்துறையினரால் ‘தாக்கப்படுகிறாா்கள், தடியடி நடத்தப்படுகிறது’ என்று கூறியது.

இதுபோன்ற போராட்ட வடிவங்கள் வளாக செயல்பாட்டை சீா்குலைக்கவோ அல்லது ஊழியா்கள் மற்றும் மாணவா்களின் பாதுகாப்பை அச்சுறுத்தவோ அனுமதிக்க முடியாது என்று பல்கலைக்கழக அதிகாரிகள் தெரிவித்தனா்.

‘பல்கலைக்கழகம் பேச்சுவாா்த்தைக்கு திறந்த மனதுடன் உள்ளது. ஆனால், போராட்டத்தின் பெயரில் மிரட்டல் அல்லது வன்முறையை மன்னிக்க முடியாது’ என்று ஒரு மூத்த நிா்வாக அதிகாரி கூறினாா்.

மாணவா்களுக்கு எதிரான எட்டு இடைநீக்கங்களும் திரும்பப் பெறும் வரை போராட்டங்களைத் தொடருவதாக எஸ்எஃப்ஐ உறுதியளித்த போதிலும், அம்பேத்கா் பல்கலை. நிா்வாகம் அதன் முடிவில் உறுதியாக உள்ளது.