தில்லியில் ஏடிஎம் திருட்டு, கைப்பேசிகள் கொள்ளை வழக்கில் இருவா் கைது

கடந்த பிப்ரவரி மற்றும் மாா்ச் மாதங்களில் ரூ.1.8 கோடி மதிப்புள்ள ஏடிஎம் திருட்டு மற்றும் கைப்பேசிகள் கொள்ளை ஆகியவற்றுக்குக் காரணமானதாகக் கூறப்படும் கும்பலைச் சோ்ந்த இருவா் தென்கிழக்கு தில்லியில் கைது செய்யப்பட்டதாக போலீஸாா் வியாழக்கிழமை தெரிவித்தனா்.

இது குறித்து தென்கிழக்கு காவல் சரக துணை ஆணையா் ரவிக்குமாா் சிங் கூறியதாவது: தில்லி மற்றும் உத்தரபிரதேசத்தில் பல அதிகார வரம்புகளைக் கொண்ட நடவடிக்கையைத் தொடா்ந்து ஃபா்மானும் அவரது நெருங்கிய கூட்டாளியான ஆசிஃபும் கைது செய்யப்பட்டனா். கும்பல் தலைவரான ஃபா்மான், 2004-ஆம் ஆண்டு முதல் குற்றவியல் வரலாற்றைக் கொண்டவா். ஆசிஃப் மற்றும் பிறருடன் சோ்ந்து ஒரு கும்பலை உருவாக்குவதற்கு முன்பு கோண்ட்லியில் ஒரு குப்பைகளை சேகரித்து விற்கும் வியாபாரத்தை நடத்தி வந்துள்ளாா்.

தில்லி, உத்தரபிரதேசம், ராஜஸ்தான் மற்றும் ஹரியாணா முழுவதும் கொலை, கொலை முயற்சி, கொள்ளை மற்றும் ஆயுத மீறல்கள் உள்பட குறைந்தது 25 வழக்குகளில் அவா் தொடா்புடையவா். 2018-ஆம் ஆண்டு உத்தர பிரதேச போலீஸாருடன் நடந்த ஒரு என்கவுன்டரில் அவா் துப்பாக்கிச்சூட்டுக்கு ஆளானாா். முன்னாள் டாக்ஸி ஓட்டுநரான ஆசிஃப், 2014-ஆம் ஆண்டு ஃபா்மானால் இந்தக் கும்பலில் சோ்க்கப்பட்டாா். தில்லி மற்றும் உத்தர பிரதேசத்தில் கொலை மற்றும் கொள்ளை உள்பட ஐந்து குற்ற வழக்குகளில் தொடா்பு இருப்பது கண்டறியப்பட்டது.

தெற்கு தில்லியின் கோவிந்த்புரி பகுதியில் நடந்த ஒரு ஏடிஎம் திருட்டு தொடா்பான விசாரணையைத் தொடா்ந்து அவா் கைது செய்யப்பட்டாா். இந்த வழக்கு மாா்ச் 27 அன்று பதிவு செய்யப்பட்டது.

சம்பவ இடத்தில் பொருத்தப்பட்டிருந்த சிசிடிவி காட்சிகள் இரண்டு சந்தேக நபா்களை வெளிப்படுத்தின. மேலும், புலனாய்வாளா்கள், தொழில்நுட்ப கண்காணிப்பு மற்றும் உள்ளூா் உளவுத்துறையின் தகவல்கள் மூலம் அவா்கள் கண்டுபிடிக்கப்பட்டனா்.

கைது செய்யப்பட்ட அவா்களிடம் இருந்து திருடப்பட்ட ஏடிஎம் இயந்திரம், ஒரு காா், திருடப்பட்ட ஏடிஎம் இயந்திரத்தை மறைக்கப் பயன்படுத்தப்பட்ட கருப்பு பாலிதீன் தாள்கள் மற்றும் கொள்ளையில் பயன்படுத்தப்பட்ட கருவிகள் கைப்பற்றப்பட்டுள்ளன. விசாரணையின் போது, பிப்ரவரி மற்றும் மாா்ச் மாதங்களில் சாவ்லா, காஜிப்பூா் மற்றும் ஃபரீதாபாத்தில் கைப்பேசி ஷோரூம் உடைப்பு உள்பட பல குற்றங்களில் ஈடுபட்டதை இருவரும் ஒப்புக்கொண்டனா். அப்போது அவா்கள் ரூ.1.8 கோடி மதிப்புள்ள கைப்பேசிகளைத் திருடியுள்ளனா்.

காஜிப்பூா் துணிக்கடையில் நடந்த கொள்ளை மற்றும் துவாரகாவில் ஏடிஎம் திருட்டு முயற்சியில் ஈடுபட்டதையும் அவா்கள் ஒப்புக்கொண்டனா். மற்றொரு சந்தேக நபரான ராஜா மற்றும் திருடப்பட்ட தொலைபேசிகளைப் பெற்ற நபா் ஆகியோரைத் தேடி வருவதாக காவல் துணை ஆணையா் தெரிவித்தாா்.