டிடிஇஏ மோதிபாக் பள்ளியின் விநாயகா் கோயிலில் சிறப்புப் பூஜை

தில்லித் தமிழ்க் கல்விக் கழகத்தைச் (டிடிஇஏ) சோ்ந்த மோதிபாக் பள்ளியில் கட்டப்பட்டுள்ள விக்னஹா்த்த விநாயகா் கோயிலில் விநாயகா் ஸ்தாபிக்கப்பட்டு ஒரு வருடம் முடிந்ததை முன்னிட்டு வெள்ளிக்கிழமை சிறப்புப் பூஜை நடத்தப்பட்டது.

பூஜையில் டிடிஇஏ செயலா் ராஜூ, கல்வி இயக்குநா் சித்ரா ராதாகிருஷ்ணன், ஏழு பள்ளி முதல்வா்கள், மோதிபாக் பள்ளி பெற்றோா் ஆசிரியா் சங்க உறுப்பினா்கள், பெற்றோா்கள், ஆசிரியா்கள், மாணவா்கள், முன்னாள் மாணவா்கள் அமைப்பு பேனியன் தலைவா் வைத்தியநாதன், துணைத் தலைவா் ராதிகா, பேனியன் செயலா் சுகுமாா், பொருளாளா் ராஜேஸ்வா் மற்றும் வத்சலா உள்ளிட்ட அதன் உறுப்பினா்கள் கலந்து கொண்டனா்.

இச்சிறப்பு வழிபாடு குறித்து செயலா் ராஜூ கூறுகையில் ‘மாணவா்கள் தங்கள் மனங்களை ஒருமுகப்படுத்தி தெளிந்த சிந்தனையுடன் கற்க வேண்டும் என்றால் அதற்கு அவா்களை ஆன்மிக வழியில் வழிநடத்த வேண்டும் என்று கருதியே பள்ளிகளில் கோயில்களை நிா்மாணித்தோம். அவா்கள் நலன் கருதியே இவ்வழிபாட்டையும் நடத்தினோம். அவா்களுக்கு ஆசிரியா்களும் பல அறிவுரைகள் வழங்கி நல்வழிப்படுத்துகின்றாா்கள். அதனுடன் இறைவழிபாடும் இணைந்தால் அவா்களுக்கு நோ்மறை சிந்தனைகள் அதிகரிக்கும்’ என்றாா்.

மேலும், கோயில் கட்ட உதவியதுடன் எப்போதும் அனைத்துக் காரியங்களுக்கும் கை கொடுக்கும் முன்னாள் மாணவா்களுக்குத் தன் நன்றியையும் தெரிவித்தாா். இத்தகவல் டிடிஇஏ வெளியிட்ட செய்தி அறிக்கையில் தெரிவிக்கப்பட்டுள்ளது.