முக அங்கீகார தொழில்நுட்பத்தைப் பயன்படுத்தி கொள்ளை வழக்குக்கு தீா்வு கண்ட தில்லி காவல் துறை: இருவா் கைது

முக அங்கீகார அமைப்பு (எஃப்ஆா்எஸ்) தொழில்நுட்பத்தைப் பயன்படுத்தி தில்லி காவல் துறை கொள்ளை வழக்குக்கு தீா்வு கண்டுள்ளதாக அதிகாரிகள் தெரிவித்தனா். மேலும், இந்த வழக்கில் இரண்டு பேரைக் கைது செய்துள்ளதாகவும் அவா்கள் வெள்ளிக்கிழமை தெரிவித்தனா்.

இது குறித்து வடமேற்கு தில்லி காவல் சரக துணை ஆணையா் பீஷாம் சிங் கூறியதாவது: திருடப்பட்ட நகைகளில் இருந்து உடைக்கப்பட்ட வைரங்கள் மற்றும் முத்துகளுடன் ரூ.5.87 லட்சம் மதிப்புள்ள திருடப்பட்ட பணம் மீட்கப்பட்டுள்ளது. வடமேற்கு தில்லியில் உள்ள முகா்ஜி நகரில் உள்ள ஒரு வீட்டில் நடந்த கொள்ளை குறித்து பிப்.16 அன்று பிசிஆா் அழைப்பு வந்தது. புகாா்தாரா் நவீன் குமாா் சோப்ரா, தனது வீடு உடைக்கப்பட்டு தங்கப் பொருள்கள் திருடப்பட்டதாகத் தெரிவித்தாா். அவரது புகாரைத் தொடா்ந்து எஃப்ஐஆா் பதிவு செய்யப்பட்டு விசாரணை தொடங்கப்பட்டது.

சிசிடிவி காட்சிகளை ஆய்வு செய்த காவல் துறை குழு, சந்தேக நபரின் தெளிவான படத்தைப் பெற்றது. எஃப்ஆா்எஸ் தொழில்நுட்பத்தைப் பயன்படுத்தி, சந்தேக நபா் திமாா்பூரைச் சோ்ந்த இம்ரான் (28) என அடையாளம் காணப்பட்டாா். அவா் முன்பு திருட்டில் ஈடுபட்ட ஒரு குற்றவாளி என்று விசாரணையில் தெரியவந்தது.

குற்றம் சாட்டப்பட்டவரின் சொந்த கிராமத்தில் உள்ள வீட்டில் போலீஸ் குழு சோதனை நடத்தியது. இதன் மூலம் அவா் கைது செய்யப்பட்டாா். விசாரணையில், அவா் குற்றத்தை ஒப்புக்கொண்டாா். திருடப்பட்ட நகைகளை தங்க வியாபாரி சச்சின் வா்மா (36) என்பவருக்கு விற்ாகவும் அவா் தெரிவித்தாா்.

இம்ரானின் தகவலைத் தொடா்ந்து, போலீஸாா் ரூ.5.87 லட்சம் ரொக்கத்தையும், வைரங்கள் மற்றும் முத்துகள் உள்ளிட்ட சில திருடப்பட்ட பொருள்களையும் மீட்டனா். மேலும், விசாரணையில் வா்மா கைது செய்யப்பட்டாா். அவரிடமிருந்து போலீஸாா் உடைக்கப்பட்ட நகைகளின் துண்டுகளை மீட்டனா். காஜியாபாத்தில் உள்ள நகைக் கடைக்காரா்களுக்கு தங்கத்தை விற்ாக சச்சின் ஒப்புக்கொண்டாா்.

இருப்பினும், அவருக்கு முந்தைய குற்றப் பின்னணி எதுவும் இல்லை. மீதமுள்ள திருடப்பட்ட நகைகளை மீட்க தொடா்ந்து முயற்சி மேற்கொள்ளப்பட்டு வருகிறது என்று அந்த அதிகாரி தெரிவித்தாா்.