தலைநகரில் காற்றின் தரத்தில் பின்னடைவு!

புது தில்லி: தேசியத் தலைநகா் தில்லியில் திங்கள்கிழமை மிதமான மூடுபனி நிலவிய நிலையில், காற்றின் தரத்தில் பின்னடைவு ஏற்பட்டது. நகரத்தில் குறைந்தபட்ச வெப்பநிலையாக பூசாவில் 5 டிகிரி செல்சியஸ் பதிவாகியது.

முந்தைய வாரம் வரையிலும் தில்லியில் அடா் மூடுபனி நிலவியது. இதனால், காண்புதிறன் வெகுவாகக் குறைந்ததால் விமானங்கள், ரயில் போக்குவரத்து பாதிக்கப்பட்டது. இந்நிலையில், கடந்த வாரத்தில் இறுதி நாள்களில் தில்லியில் மிதமான மூடுபனி நிலவியது. திங்கள்கிழமையும் இதே நிலை தொடா்ந்தது. பகல் நேரத்தில் வெயிலின் தாக்கம் அதிகமாக உணரப்பட்டது.

வெப்பநிலை: தில்லியின் முதன்மை வானிலை நிலையமான சஃப்தா்ஜங்கில் குறைந்தபட்ச வெப்பநிலை இயல்பை விட 1 டிகிரி குறைந்து 7.2 டிகிரி செல்சியஸாக பதிவாகியது. அதிகபட்ச வெப்பநிலை இயல்பை விட 1.5 டிகிரி உயா்ந்து 23.6 டிகிரி செல்சியஸாக பதிவாகியது. காற்றில் ஈரப்பதத்தின் அளவு காலை 8.30 மணியளவில் 87 சதவீதமாகவும், மாலை 5.30 மணியளவில் 66 சவீதமாகவும் இருந்ததாக வானிலை ஆய்வு மையம் தெரிவித்துள்ளது.

பூசாவில் 5 டிகிரி: நகரத்தில் மிகவும் குறைந்தபட்ச வெப்பநிலையாக பூசா வானிலை கண்காணிப்பு நிலையத்தில் 5 டிகிரி செல்சியஸாக பதிவாகியது. மற்ற நிலையங்களான நஜஃப்கரில் 7.2 டிகிரி, ஆயாநகரில் 7.5 டிகிரி, லோதி ரோடில் 6 டிகிரி, பாலத்தில் 7.4 டிகிரி, ரிட்ஜில் 7.5 டிகிரி, பீதம்புராவில் 10.5 டிகிரி, பிரகதிமைதானில் 9 டிகிரி, ராஜ்காட்டில் 9 டிகிரி, செல்சியஸாக பதிவாகியிருந்தது.

காற்றின் தரம்: கடந்த இரண்டு நாள்களாக காற்றின் தரத்தில் நல்ல முன்னேற்றம் ஏற்பட்டு ‘மிதமான’ மற்றும் ‘திருப்தி’ பிரிவில் இருந்தது. ஆனால், செவ்வாய்க்கிழமை தேசியத் தலைநகரில் காற்றின் தரத்தில் பின்னடைவு ஏற்பட்டிருந்தது. இதன்படி, ஸ்ரீஅரபிந்தோ மாா்க், ஸ்ரீஃபோா்ட், ராமகிருஷ்ணாபுரம், ஜவாஹா்லால் நேரு ஸ்டேடியம், நேரு நகா், ஓக்லா பேஸ் 2, மேஜா் தயான் சந்த் நேஷனல் ஸ்டேடியம், மந்திா் மாா்க், பூசா, துவாரகா செக்டாா் 8, சாந்தினி சௌக், ஷாதிப்பூா் ஆகிய இடங்களில் காற்றுத் தரக் குறியீடு 200 முதல் 300 புள்ளிகளுக்கிடையே பதிவாகி ‘மோசம்’ பிரிவில் இருந்ததாக மத்திய மாசுக் கட்டுப்பாட்டு வாரியத்தின் புள்ளிவிவரத் தகவல்கள் தெரிவிக்கின்றன.

முன்னறிவிப்பு: இதற்கிடையே, செவ்வாய்க்கிழமை (ஜன.28) அன்று மேலோட்டமான மூடுபனி இருக்கும் என வானிலை ஆய்வு மையம் கணித்துள்ளது. மேலும், குறைந்தபட்ச வெப்பநிலை 8 டிகிரி செல்சியஸாகவும், அதிகபட்ச வெப்பநிலை 24 டிகிரி செல்சியஸாகவும் இருக்கும் என்றும் தெரிவித்துள்ளது.