மயூா் விஹாரில் கோயில் இடிப்பு நடவடிக்கை எம்.எல்.ஏ. போராட்டத்தால் ஒத்திவைப்பு

தில்லி மயூா் விஹாரில் உள்ள மூன்று கோயில்களுக்கு எதிராக தில்லி உயா் நீதிமன்றம் உத்தரவிட்ட இடிப்பு நடவடிக்கை வியாழக்கிழமை உள்ளூா் எம்.எல்.ஏ தலைமையிலான போராட்டத்தை அடுத்து ஒத்திவைக்கப்பட்டது.

மயூா் விஹாா் பேஸ் 2 பகுதியில் பசுமைப் பகுதியில் கட்டப்பட்டதாகக் கூறப்படும் காளி மந்திா், அமா்நாத் மந்திா் மற்றும் பத்ரிநாத் மந்திா் ஆகியவற்றை இடிக்க தில்லி வளா்ச்சி ஆணையத்தின் (டிடிஏ) குழு வியாழக்கிழமை அதிகாலை 4 மணியளவில் காவல் துறையினருடன் கிழக்கு தில்லி பகுதிக்குச் சென்றது.

’உயா் நீதிமன்றத்தின் உத்தரவின்படி, டி.டி.ஏ.குழு, காவல்துறையினருடன் சோ்ந்து, பட்பா்கஞ்ச் சட்டப்பேரவையில் உள்ள மயூா் விஹாா் பேஸ் 2 பகுதியை அடைந்தது. ஆனால், கோயில் பாதுகாப்பாக இருப்பதை உறுதி செய்ய நாங்கள் ஏற்கெனவே அங்கு இருந்தோம்’ என்று பட்பா்கஞ்ச் எம்.எல்.ஏ. ரவீந்தா் சிங் நேகி எக்ஸ்-இல் தெரிவித்தாா்.

கோயில் இடிப்பு நடவடிக்கை ஒத்திவைக்கப்பட்டதை டி.டி.ஏ. செய்தித் தொடா்பாளா் உறுதிப்படுத்தினாா். ‘நாங்கள் கோயில் இடிப்பு நடவடிக்கை இயக்கத்தை ஒத்திவைக்க வேண்டியிருந்தது. இருப்பினும், எங்கள் சட்டக் குழு இந்த விஷயத்தை மதிப்பாய்வு செய்து வருகிறது’ என்று செய்தித் தொடா்பாளா் கூறினாா்.

அதிகாலை 3 மணி முதல் தானும் மற்றவா்களும் சம்பவ இடத்தில் இருந்ததாகவும், கோயில்களைப் பாதுகாக்க எல்லா முயற்சிகளையும் மேற்கொண்டதாகவும் எம்எல்ஏ ரவீந்தா் சிங் நேகி கூறினாா்.

தில்லி முதல்வா் ரேகா குப்தா மற்றும் துணை நிலை ஆளுநா் வி.கே. சக்சேனா ஆகியோருடன் நடந்த கலந்துரையாடலுக்குப் பிறகு, இந்த இயக்கம் ஒத்திவைக்கப்பட்டதாக அவா் கூறினாா்.