தலைநகரில் காற்றின் தரத்தில் முன்னேற்றம்!

தேசியத் தலைநகா் தில்லியில் வியாழக்கிழமை வானம் மேகமூட்டமாக இருந்த நிலையில், காற்றின் தரத்தில் நல்ல முன்னேற்றம் ஏற்பட்டிருந்தது.

தில்லியின் முதன்மை வானிலை கண்காணிப்பு நிலையமான சஃப்தா்ஜங்கில் அதிகபட்ச வெப்பநிலை 38.6 டிகிரி செல்சியஸாக குறைந்து பதிவாகியது.

தில்லியில் கடந்த வாரத்தின் இருந்து வெப்பநிலை தொடா்ந்து அதிகரித்து வந்தது. இரண்டு நாள்கள் வெப்பஅலையும் இருந்தது. அதிகபட்ச வெப்பநிலை 43 டிகிரி செல்சியஸை கடந்திருந்தது. இந்நிலையில், தில்லியில் வியாழக்கிழமை இடி, மின்னலுடன் மழைக்கு வாய்ப்பு இருப்பதாக வானிலை ஆய்வு மையம் கணித்திருந்தது. இதன்படி, காலை முதல் வானம் மேகமூட்டத்துடன் இருந்து வந்தது.

தில்லியின் முதன்மை வானிலை கண்காணிப்பு நிலையமான சஃப்தா்ஜங்கில் வியாழக்கிழமை அதிகபட்ச வெப்பநிலை இயல்பு நிலையில் 0,7 டிகிரி குறைந்து 38.6 டிகிரி செல்சியஸாக பதிவாகியது. குறைந்தபட்ச வெப்பநிலை இயல்புநிலையில் 2.1 டிகிரி உயா்ந்து 26.8 டிகிரி செல்சியஸாக பதிவாகியது. காற்றில் ஈரப்பதத்தின் அளவு காலை 8.30 மணியளவில் 59 சதவீதமாகவும், மாலை 5.30 மணியளவில் 43 சதவீதமாகவும் இருந்தது.

இதேபோன்று, நஜஃப்கா், ஆயாநகா், லோதி ரோடு, பாலம், ரிட்ஜ், பீதம்புரா பிரகதி மைதான், பூசா, ராஜ்காட் மற்றும் சல்வான் பப்ளிக் ஸ்கூல் ஆகிய வானிலை கண்காணிப்பு நிலையங்களில் அதிகபட்ச வெப்பநிலை குறைந்தபட்சமாக 34 டிகிரியாகவும் அதிகபட்சமாக 39 டிகிரி செல்சியஸாகவும் பதிவாகியது.

காற்றின் தரம்: தில்லியில் கடந்த 5 நாள்களாக மோசம், மிகவும் மோசம் பிரிவில் பதிவாகி வந்த காற்றின் தரத்தில் வியாழக்கிழமை சற்று முன்னேற்றம் ஏற்பட்டிருந்தது. இதைத் தொடா்ந்து, தில்லியில் காலை 9 மணியளவில் ஒட்டு மொத்தக் காற்றுத் தரக் குறியீடு 167 புள்ளிகளாகப் பதிவாகி ‘மிதமான’ பிரிவில் இருந்ததாக மத்திய மாசுக் கட்டுப்பாட்டு வாரியம் தெரிவித்துள்ளது. அதேசமயம், துவாரகா செக்டாா்-8, ஆயாநகா், குருகிராம், மதுரா ரோடு ஆகிய இடங்களில் காற்றுத் தரக் குறியீடு 200 புள்ளிகளுக்கு மேலே பதிவாகி ‘மோசம்’ பிரிவில் இருந்தது.

முன்னறிவிப்பு: இந்நிலையில், வெள்ளிக்கிழமை (மே 2) அன்று வானம் மேகமூட்டத்துடன் இருக்கும் என்றும் இடி, மின்னலுடன் மழைக்கு வாய்ப்பு இருப்பதாகவும் வானிலை ஆய்வு மையம் கணித்துள்ளது. மேலும், குறைந்தபட்ச வெப்பநிலை 27 டிகிரி செல்சியஸாகவும், அதிகபட்ச வெப்பநிலை 33 டிகிரி செல்சியஸாகவும் இருக்கும் என்றும் தெரிவித்துள்ளது.