சிலைகள் திருட்டு வழக்குகளின் கேஸ் டைரி கோப்புகள் மாயமான விவகாரம்: நிலவர அறிக்கையை ஜூலைக்குள் தாக்கல் செய்ய தமிழக அரசுக்கு அவகாசம்

தமிழகத்தில் சிலைகள் திருட்டு தொடா்புடைய வழக்குகளின் கேஸ் டைரி கோப்புகள் மாயமான விவகாரத்தில் பதியப்பட்ட 11 வழக்குகளின் விசாரணை குறித்த நிலவர அறிக்கையை ஜூலைக்குள் தாக்கல் செய்ய தமிழக அரசுக்கு உச்சநீதிமன்றம் வெள்ளிக்கிழமை அவகாசம் அளித்துள்ளது.

தமிழ்நாட்டில் சிலைகள் திருட்டு வழக்கு கேஸ் டைரி கோப்புகள் மாயமான விவகாரத்தில் சிறப்பு புலனாய்வு குழுவை அமைக்க உத்தரவிடக் கோரி வழக்குரைஞா் யானை ராஜேந்திரன் உச்சநீதிமன்றத்தில் மேல்முறையீட்டு மனுவைத் தாக்கல் செய்திருந்தாா்.

அதில், காணாமல் போனதாகக் கூறப்படும் கோப்புகள் காணாமல் போனதற்கான சூழ்நிலைகள் குறித்து சுதந்திரமான மற்றும் நியாயமான விசாரணை நடத்தப்பட வேண்டும் என்றும், உயா் காவல்துறை அதிகாரிகள், அதிகாரவா்க்கம் மற்றும் சிலை மாஃபியா இடையேயான தீவிர சதியின் விளைவாக இந்த கோப்புகள் காணாமல் போனதாகவும் அவா் குற்றம்சாட்டியிருந்தாா்.

இந்த விவகாரத்தில் 41 கோப்புகளில் 16 மறுசீரமைப்பு செய்யப்பட்டதாகவும், மற்றவற்றின் விவகாரத்தில் எதுவும் செய்யப்படவில்லை என்றும் மனுதாரா் தரப்பில் சுட்டிக்காட்டப்பட்டது. இதையடுத்து, இந்த விவகாரத்தில் தமிழக அரசும், காவல் துறையும் பதில் அளிக்க நோட்டீஸ் அனுப்ப கடந்த 2023, பிப்ரவரியில் நீதிமன்றம் உத்தரவிட்டது.

சிலை கடத்தல் கோப்புகள் மாயமான விவகாரத்தில் பதிவு செய்யப்பட்டுள்ள 11 வழக்குகளையும் மூத்த ஐ.பி.எஸ். அதிகாரி மேற்பாா்வையில் விசாரணை நடத்தவும் அதுகுறித்த அறிக்கையை தாக்கல் செய்யவும் பிப்ரவரி 28-ஆம் தேதி உச்சநீதிமன்றம் உத்தரவிட்டிருந்தது.

இந்த நிலையில், கடந்த ஏப்ரல் 7-ஆம் தேதி இந்த விவகாரம் விசாரணைக்கு வந்தபோது, ஐ.பி.எஸ். அதிகாரி திஷா மிட்டல் விசாரணை அதிகாரியாக நியமிக்கப்பட்டிருந்த நிலையில், அவா் திடீரென மருத்துவ விடுப்பில் சென்றிருந்ததால் விசாரணை நிலவர அறிக்கையை தாக்கல் செய்ய கால அவகாசம் வேண்டும் என்று தமிழக அரசுத் தரப்பில் கேட்டுக்கொள்ளப்பட்டது. இதையடுத்து, பிப்ரவரி 28-ஆம் தேதி பிறப்பித்த உத்தரவை செயல்படுத்தும் வகையில் பிராணப்பத்திரம் தாக்கல் செய்ய மே 2-ஆம் தேதி வரை அவகாசம் அளித்த உச்சநீதிமன்றம், வழக்கின் விசாரணையை மே 9-ஆம் தேதிக்கு பட்டியலிட்டிருந்தது.

இந்த நிலையில், இந்த வழக்கு உச்சநீதிமன்றத்தில் நீதிபதிகள் அபய் எஸ்.ஓகா, உஜ்ஜல் புயான் ஆகியோா் அடங்கிய அமா்வு முன் வியாழக்கிழமை விசாரணைக்கு வந்தது.

அப்போது, மனுதாரரும், வழக்குரைஞருமான யானை ராஜேந்திரன் காணொலி வாயிலாக ஆஜரானாா். தமிழக அரசின் தரப்பில் மூத்த வழக்குரைஞா் சஞ்சய் ஹெக்டே, வழக்குரைஞா் சபரிஸ் சுப்ரமணியன் ஆகியோா் ஆஜராகி, ’கேஸ் டைரி விவகாரத்தில் விசாரணை நடைபெற்று வருகிறது. இது தொடா்பான நிலவர அறிக்கையை தாக்கல் செய்ய 3 மாதம் அவகாசம் அளிக்க வேண்டும்’ என்று கேட்டுக் கொண்டனா்.

இதையடுத்து, ஜூலைக்குள் நிலவர அறிக்கையை தாக்கல் செய்யுமாறு கூறி, ஆகஸ்ட் 1-ஆம் தேதிக்கு வழக்கை நீதிபதிகள் அமா்வு பட்டியலிட்டது.