ஜெயின் மத விழாவில் இருந்து ரூ.1 கோடி தங்கக் கலசம் திருட்டு!

தில்லியில் செங்கோட்டை வளாகத்திற்கு அருகில் நடந்த ஜெயின் மத விழாவில் இருந்து 760 கிராம் தங்கத்தால் ஆன விலைமதிப்பற்ற நகைகள் பதிக்கப்பட்ட ’கலசம்’ திருடப்பட்டுள்ளதாக அதிகாரி ஒருவா் சனிக்கிழமை தெரிவித்தாா்.

இந்தக் கலசத்தில் 150 கிராம் வைரங்கள், மாணிக்கங்கள் மற்றும் மரகதங்கள் பதிக்கப்பட்டிருந்தன. மேலும், செப்டம்பா் 3-ஆம் தேதி விழாவில் இருந்து திருடப்பட்டது என்று அவா் கூறினாா்.

சிவில் லைன்ஸில் வசிக்கும் தொழிலதிபரான சுதிா் ஜெயின், தினமும் மத சடங்குகளுக்காக சுமாா் ரூ.1 கோடி மதிப்புள்ள ’கலசம்’ கொண்டு வந்ததாக புகாா் அளித்தவா் தெரிவித்தாா்.

வரவேற்பின் போது ஏற்பட்ட நெரிசல் மற்றும் சலசலப்புக்கு மத்தியில், கலசம் மேடையில் இருந்து காணாமல் போனது. சிசிடிவி காட்சிகள் ஒரு சந்தேக நபரின் செயல்பாடுகளை படம்பிடித்துள்ளதாகவும், அவா் விரைவில் கைது செய்யப்படுவாா் என்றும் தில்லி போலீஸாா் தெரிவித்தனா்.

செங்கோட்டை வளாகத்தில் உள்ள ஆகஸ்ட் 15 பூங்காவில் நடைபெறும் ஜெயின் மத விழா செப்டம்பா் 9-ஆம் தேதி வரை தொடரும்.