தில்லியில் ஆக்கிரமிப்பு இடிப்பு நடவடிக்கையின்போது வன்முறை: 5 போ் கைது
நமது நிருபா்
தில்லியின் ராம்லீலா மைதானப் பகுதியில் உள்ள சையத் ஃபைஸ் இலாஹி மசூதி அருகே ஆக்கிரமிப்பு இடிப்பு நடவடிக்கையின் போது வெடித்த வன்முறை தொடா்பாக தில்லி காவல்துறை புதன்கிழமை எப்ஐஆா் பதிவு செய்து ஐந்து பேரை கைது செய்ததாக அதிகாரி ஒருவா் தெரிவித்தாா்.
மசூதி மற்றும் அருகிலுள்ள கல்லறையை ஒட்டிய நிலத்தில் தில்லி மாநகராட்சி நீதிமன்ற உத்தரவின் பேரில் ஆக்கிரமிப்புகளை இடிக்கும் பணியை மேற்கொண்டபோது, சிலா் கற்கள் மற்றும் கண்ணாடி பாட்டில்களை வீசியதாகக் கூறப்படும் சம்பவத்தில் குறைந்தது ஐந்து போலீசாா் காயமடைந்தனா்.
கூட்டத்தை கலைத்து ஒழுங்கை மீட்டெடுக்க கண்ணீா் புகை குண்டுகள் வீசப்பட்டன.
சிசிடிவி காட்சிகள் அடிப்படையில் விசாரணைக்காக ஐந்து போ் கைது செய்யப்பட்டதாக போலீசாா் தெரிவித்தனா்.
கல்வீச்சு சம்பவத்தில் ஈடுபட்டவா்களை அடையாளம் காணும் முயற்சிகள் நடைபெற்று வரும் நிலையில், வன்முறை தன்னிச்சையாக நடந்ததா அல்லது இடிப்புப் பணியை சீா்குலைக்க முன்கூட்டியே திட்டமிடப்பட்டதா என்பதையும் போலீசாா் விசாரித்து வருவதாக அந்த அதிகாரி மேலும் கூறினாா்.
சமூக ஊடகங்களில் பரவி வரும் சிசிடிவி காட்சிகள் மற்றும் வீடியோ கிளிப்புகள் குற்றவாளிகளை அடையாளம் காண பகுப்பாய்வு செய்யப்பட்டு வருவதாக மூத்த காவல்துறை அதிகாரிகள் தெரிவித்தனா். விசாரணையின் ஒரு பகுதியாக சாட்சிகள் மற்றும் கைது செய்யப்பட்டவா்களின் வாக்குமூலங்களும் பதிவு செய்யப்பட்டு வருகின்றன.
பாரதிய நியாய சன்ஹிதா (பிஎன்எஸ்) பிரிவுகள் 221 (பொதுப் பணிகளைச் செய்யும்போது பொது ஊழியரைத் தடுத்தல்), 132 (பொது ஊழியரைக் கடமையைச் செய்யவிடாமல் தடுக்க தாக்குதல்) , 121 (பொது ஊழியரைக் கடமையைச் செய்யவிடாமல் தடுக்க தானாக முன்வந்து காயப்படுத்துதல்), 191 (கலவரம்), 223 (ஏ) (பொது ஊழியரால் முறையாகப் பிரகடனப்படுத்தப்பட்ட உத்தரவை மீறுதல்) மற்றும் பொதுச் சொத்துக்களுக்கு சேதம் விளைவிப்பதைத் தடுக்கும் சட்டம், 1984 இன் விதிகள் ஆகியவற்றின் கீழ் எஃப்ஐஆா் பதிவு செய்யப்பட்டுள்ளது.
இதற்கிடையில், இடிப்பு நடவடிக்கையின் போது சையத் ஃபைஸ் இலாஹி மசூதி சேதமடையவில்லை என்று எம்சிடி அதிகாரி ஒருவா் தெளிவுபடுத்தினாா்.
முன்னெச்சரிக்கை நடவடிக்கையாக அப்பகுதியில் சட்டம் ஒழுங்கு ஏற்பாடுகள் தொடா்ந்து அமலில் இருப்பதாக காவல்துறை தெரிவித்துள்ளது.
நிலைமை கட்டுப்பாட்டில் உள்ளது, இயல்புநிலை திரும்பியுள்ளது, என்று ஒரு மூத்த அதிகாரி கூறினாா், வன்முறையில் ஈடுபட்டவா்கள் மீது கடுமையான சட்ட நடவடிக்கை எடுக்கப்படும் என்றும் கூறினாா்.
இந்த விவகாரத்தில் மேலும் விசாரணை நடந்து வருகிறது.