மணப்பாடு திருச்சிலுவை ஆலய மகிமைப் பெருவிழா: ஆயிரக்கணக்கானோர் பங்கேற்பு

தூத்துக்குடி மாவட்டம், மணப்பாடு திருச்சிலுவை திருத்தலத்தில் 436ஆவது மகிமைப் பெருவிழா திங்கள்கிழமை நடைபெற்றது.
 மணப்பாடு கடற்கரையோரம் இயற்கையாக அமைந்த மணல் குன்றின் மேல் அமைந்துள்ளது திருச்சிலுவை திருத்தலம். இந்த ஆலயத்தில் ஆண்டுதோறும் 11 நாள்கள் நடைபெறும் மகிமைப் பெருவிழா, நிகழாண்டு செப். 4ஆம் தேதி கொடியேற்றத்துடன் தொடங்கியது. விழா நாள்களில் காலையில் பங்கு ஆலயத்திலும், திருச்சிலுவை திருத்தலத்திலும் திருப்பலி, நவநாள் திருப்பலி, மாலையில் பங்கு ஆலயத்தில் ஜெபமாலை, மறையுரை, நற்கருணை ஆசீர் ஆகிய நிகழ்ச்சிகள் நடைபெற்றன.
 ஞாயிற்றுக்கிழமை (செப். 13) மாலை 4.30 மணிக்கு திருச்சிலுவை ஆலயத்தில் மலையாளத்தில் திருப்பலி, ஐந்து திருக்காய சபையினர் பவனி ஆகியன நடைபெற்றது. இரவு 7 மணிக்கு திருவிழா மாலை ஆராதனை நடைபெற்றது. மணவை மறை மாவட்ட முதன்மை குரு சகாயம் தலைமை வகித்தார். இதில் தமிழகம், கேரளம் உள்பட நாட்டின் பல்வேறு பகுதிகளில் இருந்து ஆயிரக்கணக்கான கிறிஸ்தவர்கள் குடும்பத்துடன் பங்கேற்றனர். முக்கியத் திருவிழாவான திருச்சிலுவை மகிமைப் பெருவிழா திங்கள்கிழமை நடைபெற்றது. அதிகாலை 4 மணிக்கு பங்கு ஆலயத்திலும், திருச்சிலுவை ஆலயத்திலும் திருப்பலிகள், 5 மணிக்கு திருச்சிலுவை ஆலயத்தில் மலையாளத்தில் திருப்பலியும், 6 மணிக்கு திருத்தலத்திற்கு ஐந்து திருக்காய சபையினர் பவனியைத் தொடர்ந்து பெருவிழா திருப்பலி நடைபெற்றது. மாலை 4.30 மணிக்கு பங்கு ஆலயத்தில் நற்கருணை ஆசீர், மெய்யான திருச்சிலுவைக்கு முத்தம் செய்யப்படல் ஆகியன நடைபெற்றது. 5.30 மணிக்கு கொடியிறக்கம் நடைபெற்றது.
 இதில் அருள்பணியாளர்கள் டேவிட் மைக்கேல், கிங்ஸ்லி, ஜெகன், ஸ்டார்வின், ஆண்டனி ஜெகதீஷ், ஜேம்ஸ் பீட்டர், ரொனால்டு ரெக்ஸ், ஜோசப் ராஜேஷ் ஆகியோர் மறையுரை வழங்கினர்.
 விழா ஏற்பாடுகளை பங்குத்தந்தையர்கள் இருதயராஜ் பர்னாந்து, கிங்ஸ்லி, ஆலய ஆன்மகுரு தெயோபிலஸ், மணப்பாடு அருள்சகோதரிகள், இறைமக்கள் செய்திருந்தனர்.