தோனிக்கு எதிரான கிரிமினல் வழக்குக்கு இடைக்காலத் தடை: உச்ச நீதிமன்றம்

வார இதழ் அட்டைப் படத்தில் ஹிந்துக் கடவுளான மகாவிஷ்ணுவை அவமதிக்கும் தோற்றத்தில் இருந்ததாக குற்றம்சாட்டி இந்தியாவின் ஒருநாள் கிரிக்கெட் போட்டி அணியின் கேப்டன் மகேந்திர சிங் தோனிக்கு எதிராக தொடரப்பட்ட கிரிமினல் வழக்குக்கு உச்ச நீதிமன்றம் இடைக்காலத் தடை விதித்தது.
 இதுதொடர்பாக மகேந்திர சிங் தோனி தாக்கல் செய்த மனுவையும், இதேபோன்ற மற்றொரு விவகாரத்துக்காக தொடரப்பட்ட மனுவையும் உச்ச நீதிமன்றம் திங்கள்கிழமை ஒன்றாக விசாரித்தது.
 அப்போது உச்ச நீதிமன்றம் கூறுகையில், "தோனிக்கு எதிரான கிரிமினல் வழக்குக்கு தடை விதிக்க முடியாது என்று கர்நாடக உயர் நீதிமன்றம் பிறப்பித்த தீர்ப்புக்கு இடைக்காலத் தடை விதிக்கப்படுகிறது; இந்த விவகாரத்தில் தோனிக்கு எதிராக வழக்குத் தொடர்ந்தவருக்கு நோட்டீஸ் அனுப்பும்படி உத்தரவிடப்படுகிறது' என்று அறிவித்தது.
 வர்த்தக வார இதழ் ஒன்றின் அட்டைப் படத்தில், மகாவிஷ்ணு தோற்றத்தில் தோனியின் புகைப்படம் வெளியிடப்பட்டிருந்தது. அதில், தோனி தனது கையில் பிரபல நிறுவனத்தின் காலனியை வைத்திருப்பார்.
 இந்நிலையில், தோனிக்கு எதிராக பெங்களுரூ கூடுதல் தலைமை மெட்ரோபாலிட்டன் நீதிமன்றத்தில் சமூக ஆர்வலர் ஜெயகுமார் ஹிரேமட் என்பவர் வழக்கு தொடுத்தார். அதை விசாரித்த நீதிமன்றம், தோனிக்கு எதிராக இந்திய தண்டனையியல் சட்டத்தின் 295, 34 ஆகிய பிரிவுகளின்கீழ் வழக்குப்பதிவு செய்யும்படி உத்தரவிட்டது. அத்துடன், தோனியை நேரில் ஆஜராகும்படியும் நீதிமன்றம் உத்தரவிட்டது.
 இதைத் தொடர்ந்து, கர்நாடக உயர் நீதிமன்றத்தில் தோனி மேல்முறையீடு செய்தார்.
 ஆனால், விசாரணை நீதிமன்றத்தில் நடைபெறும் கிரிமினல் வழக்குக்கு தடை விதிப்பதற்கு கர்நாடக உயர் நீதிமன்றம் மறுத்துவிட்டது. எனவே, கர்நாடக உயர் நீதிமன்றத்தின் உத்தரவை எதிர்த்து, உச்ச நீதிமன்றத்தில் அவர் மனு தாக்கல் செய்தார்.