கோவா அணிக்கு ரூ.50 லட்சம் அபராதம்

இந்தியன் சூப்பர் லீக் (ஐஎஸ்எல்) கால்பந்து போட்டியின் பரிசளிப்பு விழா நிகழ்ச்சியை புறக்கணித்த கோவா எப்.சி. அணிக்கு ரூ.50 லட்சம் அபராதம் விதிக்கப்பட்டுள்ளது. அதை 10 நாள்களுக்குள் செலுத்த வேண்டும் என அகில இந்திய கால்பந்து சம்மேளனம் உத்தரவிட்டுள்ளது.
 கடந்த டிசம்பரில் நடந்த ஐஎஸ்எல் இறுதி ஆட்டத்தில் கோவா 2-3 என்ற கோல் கணக்கில் சென்னையின் எப்.சி. அணியிடம் தோல்வி கண்டது.
 வெற்றி கொண்டாட்டத்தின்போது தங்கள் அணியின் உரிமையாளர்களில் ஒருவரான தத்தாராஜ் சல்கோகரை சென்னை வீரர் இலானோ தாக்கியதாகக் கூறி கோவா அணியினர் பரிசளிப்பு விழாவில் கலந்துகொள்ளவில்லை. இலானோ மீது காவல் நிலையத்திலும் புகார் அளித்தனர்.
 இந்த விவகாரத்தை விசாரித்த அகில இந்திய கால்பந்து சம்மேளனத்தின் ஒழுங்கு நடவடிக்கை குழு, கோவா அணிக்கு ரூ.50 லட்சம் அபராதம் விதித்து உத்தரவிட்டுள்ளது. அணியை தவறாக வழிநடத்தியது, மோசமாக நடந்துகொண்டது, மிரட்டல் விடுக்கும் வகையில் செயல்பட்டது ஆகிய பிரிவுகளின் கீழ் அந்த அணிக்கு ரூ.50 லட்சம் அபராதம் விதிக்கப்பட்டுள்ளது.