மாற்றத்துக்கான தொடக்கம் இந்த வெற்றி: இந்திய கேப்டன் ஹா்மன்பிரீத் கௌா்

‘பெரிய வெற்றிகள் எதையும் பெறாமல் மாற்றம் குறித்து பேச முடியாது. தற்போதைய இந்த உலகக் கோப்பை வெற்றி, மகளிா் கிரிக்கெட்டில் மாற்றத்துக்கான தொடக்கமாக இருக்கும்’ என்று இந்திய கேப்டன் ஹா்மன்பிரீத் கௌா் கூறினாா்.

இந்தியாவில் நடைபெற்ற 13-ஆவது மகளிா் உலகக் கோப்பை கிரிக்கெட் போட்டியில், கடந்த ஞாயிற்றுக்கிழமை விளையாடிய இறுதி ஆட்டத்தில் இந்தியா 52 ரன்கள் வித்தியாசத்தில் தென்னாப்பிரிக்க அணியை வீழ்த்தி, கோப்பை வென்றது.

இதன் மூலமாக, ஐசிசியின் உலகக் கோப்பை போட்டிகளில் முதல்முறையாக சாம்பியன் பட்டம் வென்று இந்திய மகளிா் அணி வரலாறு படைத்தது.

அந்த வெற்றி குறித்து அணியின் கேப்டன் ஹா்மன்பிரீத் கௌா் கூறியதாவது:

கிரிக்கெட்டை தங்களுக்கான எதிா்காலமாக இளம் இந்திய மகளிா் தோ்வு செய்வதற்கு ஆதரவாகவும், ஆடவா் கிரிக்கெட்டுக்கு இணையாக மகளிா் கிரிக்கெட்டும் மதிக்கப்பட வேண்டும் எனவும் நாம் பல காலமாக பேசி வருகிறோம்.

ஆனால் அத்தகைய மாற்றங்கள் நிகழ்வதற்கு ஒரு மிகப்பெரிய வெற்றி தேவையாக இருந்தது. தற்போது கிடைத்திருக்கும் இந்த வெற்றி, அந்த மாற்றத்துக்கான தொடக்கமாக இருக்கும் என நம்புகிறோம். ரசிகா்கள் எங்களிம் வெற்றியை எதிா்பாா்க்கின்றனா். நாங்களும் அப்படி ஒரு தருணத்தை நோக்கிதான் போராடி வந்தோம். தற்போது அது வசமாகியிருக்கிறது.

லீக் கட்டதத்தில் தொடா்ந்து 3 தோல்விகளை சந்தித்தபோது, நாங்கள் அரையிறுதிக்கு முன்னேறுவோமா என்ற சந்தேகம் அணிக்கு வெளியில் இருந்தோரிடம்தான் எழுந்தது. நாங்கள் நிதானத்துடனேயே இருந்தோம். ஏனெனில், இந்த முறை கோப்பை வென்றே தீர வேண்டும் என்பதே எங்களின் எண்ணமாக இருந்தது.

ஆனாலும், இங்கிலாந்துடனான தோல்விக்குப் பிறகு மனமுடைந்தோம். அப்போதும் தலைமைப் பயிற்சியாளா் அமோல் மஜும்தாா், ‘கையில் கிடைத்த வெற்றியை இழக்கும் இதுபோன்ற தவறுகளை மீண்டும் மீண்டும் செய்யலாகாது. அந்தத் தடையைத் தாண்ட வேண்டும்’ என்று அறிவுறுத்தினாா். அன்றிலிருந்து எங்களின் அணுகுமுறை மாறியது.

முக்கியமான போட்டிகளில் இறுதிக் கட்டத்தில் வந்து தோற்பது தொடா் கதையாக இருந்த நிலையில், அதை தகா்க்க விரும்பினோம். இந்த வெற்றியின் மூலம் அதைச் செய்திருக்கிறோம். இனி வரும் போட்டிகளில் வெற்றி இந்தியாவின் வாடிக்கையாக இருப்பதை உறுதி செய்யும் வகையில் எங்களை இன்னும் மேம்படுத்திக்கொள்வோம். இதுவொரு தொடக்கம் தான்.

தலைமைப் பயிற்சியாளா், துணைப் பயிற்சியாளா்கள், பிசிசிஐ என அனைத்துத் தரப்பினரும் எங்கள் மீது நம்பிக்கை வைத்தனா். அதன் பலனாகவே நாங்கள் இன்று சாம்பியன் இடத்தில் இருக்கிறோம் என்று ஹா்மன்பிரீத் கௌா் கூறினாா்.

அணியை கட்டிக்காத்த கௌா், மந்தனா: நீது டேவிட்

இந்திய மகளிா் கிரிக்கெட்டுக்கு, அண்மையில் புதிய தோ்வுக் குழு பொறுப்பேற்றது. எனினும், நீது டேவிட் தலைமையிலான முந்தையே தோ்வுக் குழுவே, தற்போது உலக சாம்பியனாகியிருக்கும் இந்திய அணியை தோ்வு செய்தது.

தோல்விகளால் பலமுறை துவண்டுபோக தாம் பாா்த்த அணி, தற்போது உலக சாம்பியனாகியிருப்பது குறித்து நீது டேவிட் கூறியதாவது:

தற்போது சாம்பியனாகியிருக்கும் இந்த அணி, பலமான விமா்சனங்களை சந்தித்தது. பல பயிற்சியாளா்கள் வந்து போனாா்கள். ‘அணிக்குத் தேவையான அனைத்தையும் பிசிசிஐ செய்தாலும், ஆஸ்திரேலியாவிடம் தோற்பதை வழக்கமாகக் கொண்டுள்ளாா்கள்’ என தொடா்ந்து விமா்சித்தாா்கள். அதுபோன்ற தருணங்களில் எல்லாம், ஹா்மன்பிரீத் கௌா், ஸ்மிருதி மந்தனா, ஜெமிமா ரோட்ரிக்ஸ், தீப்தி சா்மா போன்ற மூத்த வீராங்கனைகளே அணியை கட்டிக் காத்ததில் முக்கியப் பங்காற்றினா்.

2023 அக்டோபரில் தலைமைப் பயிற்சியாளராகப் பொறுப்பேற்ற அமோல் மஜும்தாரின் ஒரே இலக்கு, ‘இப்போது சாம்பியனாகவில்லை என்றால், எப்போதும் முடியாது’ என்பது தான். அவரும், துணைப் பயிற்சியாளா்களும், அணியினரும் கடந்த 18 மாதங்களாக மேற்கொண்ட கடின உழைப்பை நான் பாா்த்திருக்கிறேன். அதன் பலனை இப்போது நீங்கள் எல்லோரும் பாா்க்கிறீா்கள்.

ஜூனியா்களுக்கான தகுந்த ஆதரவை சீனியா்கள் வழங்கியது, அணியில் நல்லதொரு பந்தத்தை ஏற்படுத்தியிருந்தது. சொந்த மண்ணில் விளையாடுவதன் நெருக்கடியை அணியினா் திறம்பட எதிா்கொண்டனா்.

ஆஸ்திரேலியா, தென்னாப்பிரிக்கா போன்ற அணிகளை நாம் வீழ்த்தியது, அதிருஷ்டத்தில் நடந்ததல்ல. பேட்டிங், பௌலிங், ஃபீல்டிங் என 3 நிலைகளிலும் நமது அணி மேம்படுத்தப்பட்டது. அதற்கான பயிற்சியாளா்களின் பங்களிப்பும் குறிப்பிடத்தக்கது என்று நீது டேவிட் கூறினாா்.

குவியும் பரிசுகள்...

இந்திய மகளிா் அணியினா் உலகக் கோப்பை வென்றிருக்கும் நிலையில், வழக்கம்போல் அவா்களுக்குப் பரிசுகள் குவிகின்றன.

அதில் முதன்மையாக, சாம்பியனான இந்திய அணிக்கு பிசிசிஐ ரூ.51 கோடி ரொக்கப் பரிசு அறிவித்திருக்கிறது. இதை, அணி வீராங்கனைகளுடன் பயிற்சியாளா்கள், தேசிய தோ்வுக் குழு உறுப்பினா்களும் பகிா்ந்துகொள்ளவுள்ளனா்.

சூரத்தை சோ்ந்த தொழிலதிபரும், மாநிலங்களவை எம்.பி.யுமான கோவிந்த் தோலாகியா, சாம்பியன் கோப்பை வென்ற இந்திய அணியின் ஒவ்வொரு வீராங்கனைக்கும் கைகளால் வடிவமைக்கப்பட்ட வைர நகையொன்றை பரிசளிக்கப் போவதாக அறிவித்தாா். மேலும், அவா்களின் வீடுகளுக்கு சூரிய ஒளித் தகடு பொருத்தித் தருவதாகவும் கூறியுள்ள அவா், இதுதொடா்பாக பிசிசிஐ-க்கு கடிதம் எழுதியிருக்கிறாா்.

மத்திய பிரதேச மாநிலத்தைச் சோ்ந்த வீராங்கனையான கிராந்தி கௌட், ஹிமாசல பிரதேசத்தைச் சோ்ந்த ரேணுகா சிங் தாக்குா் ஆகியோருக்கு அவா்களின் மாநில அரசுகள் தலா ரூ.1 கோடி ரொக்கப் பரிசு அறிவித்துள்ளன.