பிளே ஆஃபில் 2 - ஆவது அணி லக்னௌ

கொல்கத்தா நைட் ரைடர்ஸுக்கு எதிரான புதன்கிழமை ஆட்டத்தில் 2 ரன்கள் வித்தியாசத்தில் வென்ற லக்னெள சூப்பர் ஜயன்ட்ஸ், 2-ஆவது அணியாக பிளே ஆஃப் சுற்றுக்குத் தகுதிபெற்றது. 
ஆட்டத்தில் முதலில் லக்னெள 20 ஓவர்களில் விக்கெட் இழப்பின்றி 210 ரன்கள் சேர்த்தது. அடுத்து கொல்கத்தா 20 ஓவர்களில் 8 விக்கெட் இழப்புக்கு 208 ரன்களே எட்டியது. 
முன்னதாக டாஸ் வென்று முதலில் பேட் செய்த லக்னெளவில் டி காக் 10 பவுண்டரிகள், 10 சிக்ஸர்களுடன் 140 ரன்களை விளாச, உடன் வந்த ராகுல் 3 பவுண்டரிகள், 4 சிக்ஸர்களுடன் 68 ரன்கள் அடித்தார். 
ஐபிஎல் போட்டியின் வரலாற்றிலேயே இதுவரை இல்லாத வகையில் முதல் விக்கெட்டுக்கு அதிக ரன்கள் (210) சேர்த்து சாதனை படைத்தது இந்த பார்ட்னர்ஷிப். அத்துடன் நடப்பு சீசனில் அதிக ஸ்கோரை (140*) டி காக் பதிவு செய்தார். 
பின்னர் கொல்கத்தா இன்னிங்ஸில் நிதீஷ் ராணா 42, கேப்டன் ஷ்ரேயஸ் ஐயர் 4 பவுண்டரிகள், 3 சிக்ஸர்களுடன் 50, சாம் பில்லிங்ஸ் 36 ரன்கள் சேர்த்து வெற்றிக்காக முயற்சித்தனர். கடைசி கட்டத்தில் ரிங்கு சிங் - சுனில் நரைன் கூட்டணி வெற்றியை நெருங்கியது. ஆனால் 40 ரன்கள் அடித்திருந்த ரிங்கு சிங் அவுட்டாக, ஆட்டத்தின் போக்கு மாறியது. 
கடைசி பந்தில் 3 ரன்கள் தேவையிருக்க, களம் புகுந்த உமேஷ் யாதவ் பெளல்டானார். முன்னதாக அபிஜித் தோமர் 4, ஆண்ட்ரே ரùஸல் 5 ரன்கள் அடிக்க, முடிவில் சுனில் நரைன் 21 ரன்களுக்கு ஆட்டமிழக்காமல் இருந்தார். லக்னெள பெளலிங்கில் மோசின் கான், மார்கஸ் ஸ்டாய்னிஸ் ஆகியோர் தலா 3, கிருஷ்ணப்பா கெளதம், ரவி பிஷ்னோய் ஆகியோர் தலா 1 விக்கெட் கைப்பற்றினர்.
இந்த ஆட்டத்தில் லக்னெள இன்னிங்ஸில் டி காக் கொடுத்த கேட்ச்சை அபிஜீத் தவறவிட்டதும், கொல்கத்தா இன்னிங்ஸில் ரிங்கு சிங் கேட்ச்சை எவின் லீவிஸ் அசத்தலாகப் பிடித்ததுமே ஆட்டத்தின் முடிவை தீர்மானிப்பதில் முக்கியமானதாக அமைந்தது.