புள்ளிப்பட்டியலில் முதலிடம் பெறுமா பஞ்சாப்? இந்த போட்டியில் முதல் பேட்டிங்

11-ஆவது ஐபிஎல் சீசனின் 22-ஆவது லீக் ஆட்டம் தில்லியில் உள்ள ஃபெரோஸ் ஷா கோட்லா மைதானத்தில் திங்கள்கிழமை இரவு 8 மணிக்கு தொடங்கி நடைபெறுகிறது. இதில் டெல்லி டேர்டெவில்ஸ், கிங்ஸ் லெவன் பஞ்சாப் அணிகள் மோதுகின்றன.

இதுவரை இவ்விரு அணிகளும் மோதிய ஆட்டங்களில் டேர்டெவில்ஸ் 9 முறையும், பஞ்சாப் 12 முறையும் வெற்றிபெற்றுள்ளன. தில்லியில் நடைபெற்ற போட்டிகளில் டெல்லி 5 முறையும், பஞ்சாப் 4 முறையும் வென்றுள்ளன.

இப்போட்டியின் மூலம் அதிக டி20 போட்டிகளில் கேப்டனாக செயல்பட்டவர்களில் மேற்கிந்திய தீவுகளின் டேரன் சமியை பின்னுக்குத்தள்ளி 170-ஆவது முறை கேப்டனாக செயல்பட்டு கௌதம் கம்பீர் 2-ஆம் இடம் பிடிக்கிறார். அதிக டி20 போட்டிகளில் கேப்டனாக செயல்பட்டவர்களில் மகேந்திர சிங் தோனி 244 போட்டிகளுடன் முதலிடத்தில் உள்ளார்.

நடப்பு சீசனில் சென்னை சூப்பர் கிங்ஸ் மற்றும் கிங்ஸ் லெவன் பஞ்சாப் ஆகிய அணிகள் 5 போட்டிகளில் 4 வெற்றி, 1 தோல்வியுடம் 8 புள்ளிகள் பெற்றுள்ளன. இருப்பினும் ரன்ரேட் அடிப்படையில் சென்னை முதலிடத்திலும், பஞ்சாப் 2-ஆம் இடத்திலும் உள்ளன.

இப்போட்டியில் டாஸ் வென்ற டெல்லி டேர்டெவில்ஸ் அணி கேப்டன் கௌதம் கம்பீர் பந்துவீச்சை தேர்வு செய்தார்.