தோனியைத் தொடர்ந்து அச்சுறுத்தும் சுனில் நரேன்: நம்பமுடியாத புள்ளிவிவரம்!

ஒரு பந்துவீச்சாளரின் பந்துவீச்சை 57 முறை எதிர்கொண்டு சிக்ஸர் மட்டுமல்ல ஒரு பவுண்டரி கூட தோனி அடிக்கவில்லை என்கிற புள்ளிவிவரத்தை உங்களால் நம்பமுடிகிறதா? அதுவும் ஐபிஎல்-லில்!

துல்லியமான சுழற்பந்துவீச்சில் அதிரடியாக விளையாட தோனி அவ்வளவாக முயற்சி செய்யமாட்டார். ஆனால் அது இந்தளவுக்கா என்று ஆச்சர்யப்படவைக்கிறது இந்தப் புள்ளிவிவரம். 

இந்த ஐபிஎல் போட்டியில் அதிக சிக்ஸ் அடித்தவர்களின் பட்டியலில் தோனிதான் முதலிடத்தில் உள்ளார். இதுவரை 24 சிக்ஸர்கள். அதேபோல ஐபிஎலில் இதுவரை மொத்தமாக 180 சிக்ஸர்களும் 269 பவுண்டரிகளும் அடித்துள்ளார் தோனி.

ஆனால் ஐபிஎல்-லில் சுனில் நரேன் பந்துவீச்சை 57 முறை எதிர்கொண்டும் இதுவரை தோனி ஒரு பவுண்டரி கூட அடித்ததில்லை. 

நேற்றைய ஆட்டத்தில் நரேனின் 5 பந்துகளை எதிர்கொண்டார் தோனி. அதில் அவரால் 4 ரன்கள் மட்டுமே எடுக்கமுடிந்தது.

ஐபிஎல்-லில் நரேன் வீசிய 57 பந்துகளில் சிக்ஸர், பவுண்டரி எதுவும் இன்றி 29 ரன்கள் மட்டுமே எடுத்துள்ளார் தோனி!

ஐபிஎல்-லில் வேறு எந்தவொரு பேட்ஸ்மேனும் இதுபோல ஒரு பந்துவீச்சாளரின் பந்துவீச்சை 50 முறை எதிர்கொண்டு ஒரு பவுண்டரியும் அடிக்காமல் இருந்ததில்லை.