ஜூஹாய் சேலஞ்சர்: அரையிறுதியில் யூகி

ஜூஹாய் ஏடிபி சேலஞ்சர் டென்னிஸ் போட்டியில் இந்தியாவின் யூகி பாம்ப்ரி அரையிறுதிக்கு முன்னேறியுள்ளார்.
சீனாவின் ஜூஹாய் நகரில் நடைபெற்று வரும் இந்தப் போட்டியின் காலிறுதியில் யூகி பாம்ப்ரியும், ஆர்ஜென்டீனாவின் அகஸ்டின் வெலாட்டியும் மோதினர். இந்த ஆட்டத்தில் யூகி பாம்ப்ரி 6-1, 2-1 என்ற கணக்கில் முன்னிலையில் இருந்தபோது வெலாட்டி களைப்பு காரணமாக போட்டியிலிருந்து விலகினார்.
இதையடுத்து காலிறுதியில் வெற்றி பெற்றதாக அறிவிக்கப்பட்ட யூகி பாம்ப்ரி அரையிறுதிக்கு முன்னேறினார்.
இந்த சீசனில் முதல்முறையாக அரையிறுதிக்கு முன்னேறியிருக்கும் யூகி பாம்ப்ரி, அது குறித்து கூறியதாவது: அரையிறுதிக்கு முன்னேறியிருப்பது மகிழ்ச்சியளிக்கிறது. இது மிகக் கடினமான போட்டியாகும். அதுவும் போட்டித் தரவரிசை கிடைக்காதபோது இன்னும் கடினமாகிவிடுகிறது. இதுவரை பெற்ற வெற்றிகளை மறந்துவிட்டு அரையிறுதி ஆட்டத்தின் மீது கவனம் செலுத்த முயற்சித்துக் கொண்டிருக்கிறேன்' என்றார்.